វិធីសាស្ត្រងាយៗ ធ្វើឲ្យជីវិតកាន់តែប្រសើរ អាចធ្វើបានចាប់ពីថ្ងៃនេះ

2017-08-09 00:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពិភពលោកពោរពេញដោយឱកាស ប៉ុន្តែពេលខ្លះត្រូវគិតច្រើនបន្តិច ទើបអាចចាប់យកបាន។ ផ្លាស់ប្ដូរជីវិតឲ្យកាន់តែប្រសើរ គឺត្រូវចាប់ផ្ដើមផ្លាស់ប្ដូរការគិត នាំឲ្យជីវិតរីករាយជាមុនសិន ដើម្បីបន្តដំណើរលើវិថីដ៏វែងឆ្ងាយ។

វិធីសាស្ត្រងាយៗ អាចចាប់ផ្ដើមបានពីថ្ងៃនេះ៖

ពេញចិត្តអ្វីដែលខ្លួនមាន៖ មើលទៅគេ ពេញចិត្តអ្វីដែលគេមាន តែគេវិញបែរពេញចិត្តអ្វីដែលអ្នកមាន។ ធម្មតា ចង់ឲ្យជីវិតប្រសើរ ត្រូវចាប់ផ្ដើមពេញចិត្តអ្វីដែលខ្លួនមានសិន រួចគិតពីអ្វីដែលចង់បាន ដើម្បីសម្រេចគោលដៅ។

គិតទុកមុន ថាស្អែកត្រូវធ្វើអ្វី៖ មនុស្សជោគជ័យបំផុត តែងបញ្ចប់ការងារនៅថ្ងៃនេះ ដោយដឹងរួចជាស្រេចថាត្រូវធ្វើអ្វីនៅថ្ងៃស្អែក។ មនុស្សមានពេល ២៤ម៉ោងក្នុងមួយថ្ងៃដូចគ្នា គ្រាន់តែប្រើពេលនោះខុសគ្នា ទើបមានអ្នកខ្លះជោគជ័យ ហើយអ្នកខ្លះបរាជ័យ។

ត្រៀមខ្លួនទទួលយក៖ គ្រប់យ៉ាងមិនមែនដូចចិត្តទាំងអស់ទេ ហើយក៏មិនមែនសុទ្ធតែបានសម្រេចដែរ។ ដូចនេះ ត្រូវត្រៀមខ្លួនទទួលយកអ្វីដែលកើតឡើង និងរកដំណោះស្រាយសមស្រប បើរឿងកើតឡើងមិនដូចការគិត។

កុំតាមអារម្មណ៍ពេក៖ អារម្មណ៍ មិនអាចប្រកែកបាន ព្រោះវាផ្លាស់ប្ដូរគ្រប់ពេល តែមិនត្រូវបណ្ដោយតាមអារម្មណ៍ពេកនោះទេ។ ពេលខ្លះ អារម្មណ៍មិនសុទ្ធតែត្រូវ គួរព្យាយាមរកហេតុផលដើម្បីបន្លប់អារម្មណ៍នោះវិញ។

ទទួលយកចំណុចអវិជ្ជមាន៖ គ្មាននរណាអាចធ្វើត្រូវគ្រប់ពេលនោះទេ ហើយក៏គ្មានអ្នកល្អគ្រប់១០ ដែរ។ ចង់ក្លាយខ្លួនជាមនុស្សកាន់តែប្រសើរ ត្រូវរៀនទទួលយកគំនិតពីអ្នកដទៃ មកពិចារណា។

បង្កើតទម្លាប់ល្អ៖ ព្យាយាមហាត់ប្រាណជាប្រចាំ ដើម្បីមានអារម្មណ៍ល្អគ្រប់ពេល ហើយបង្កើតវាជាទម្លាប់ នោះអ្នកនឹងឃើញគុណប្រយោជន៍របស់វា។ ចំណែកទម្លាប់មិនល្អ ដូចជាក្រោកយឺត ឬខ្ជិល គួរបោះបង់ឲ្យអស់។