វិធីធ្វើលំហាត់សម្រាកចិត្ត-កាយ ក្រោយមានសម្ពាធតានតឹងពីការងារ
- 2017-01-17 00:03:00
- ចំនួនមតិ 0 | ចំនួនចែករំលែក 0
វិធីធ្វើលំហាត់សម្រាកចិត្ត-កាយ ក្រោយមានសម្ពាធតានតឹងពីការងារ
ចន្លោះមិនឃើញ
យុវវ័យជាច្រើន មិនថាអ្នកធ្វើការ ឬអ្នកសិក្សា ក្នុងសកម្មភាពប្រចាំថ្ងៃ មនុស្សមួយចំនួនតែងជួបបញ្ហាភាពតានតឹងបន្តិចបន្តួច ជាសម្ពាធ នៅកន្លែងការងារ ឬការសិក្សា។
ដើម្បីជាការណែនាំ ក្នុងការដោះស្រាយបញ្ហានោះ អង្គការចិត្តសង្គម អន្តរវប្បធម៌ នៃកម្មវិធីសុខភាពផ្លូវចិត្តបានបង្ហាញពីវិធីមួយចំនួន ជាវិធីសាស្ត្រសម្រាក ចិត្ត-កាយ ដែលអាចជួយកាត់បន្ថយអាការៈនៃ ភាពតឹងផ្លូវចិត្ត និងផ្លូវកាយ ធ្វើឲ្យបុគ្គលមានអារម្មណ៍ធូរស្រាលទាំងផ្លូវចិត្ត និងផ្លូវកាយឡើយវិញ វិធីទាំងនោះមានដូចជា៖
១. លំហាត់ដកដង្ហើម
លំហាត់ដកដង្ហើម គឺជាវិធីសម្រាកចិត្ត-កាយម្យ៉ាង ដែលបុគ្គលអាចហាត់ធ្វើរាល់ថ្ងៃ ដើម្បីឲ្យបានកាន់តែស្ទាត់ជំនាញ និងងាយស្រួល។
របៀបអនុវត្ត៖
-អង្គុយក្នុងស្ថានភាពងាយស្រួល ឬដេកសណ្ដូកត្រង់ដកដង្ហើមចូលវែង ចេញវែង។ ផ្ចង់អារម្មណ៍លើខ្យល់ដង្ហើមចេញ-ចូល តាមច្រមុះ (ចូលដឹង ចេញដឹង)។
-ផ្ទៃពោះប៉ោងឡើងពេលដកដង្ហើមចូល និងផតចុះ ពេលដកដង្ហើមចេញ។
ធ្វើលំហាត់ដកដង្ហើមចូលវែង ចេញវែងបែបនេះរយៈពេលប្រមាណពី ១០ ទៅ១៥នាទី (ឬឲ្យបានយូរជាងនេះ បើអាចធ្វើបាន) ។
២. លំហាត់សម្រាកសាច់ដុំ
លំហាត់សម្រាកសាច់ដុំ អាចជួយធ្វើសាច់ដុំក្នុងរាងកាយ បានធូរស្បើយពីភាពតានតឹង និងធ្វើឲ្យផ្លូវចិត្តបានស្រស់ថ្លាផងដែរ។
របៀបអនុវត្ត៖
សម្រាកសាច់ដុំក្នុងរាងកាយ ជាដំណាក់ៗដូចខាងក្រោមនេះ៖
ក្នុងស្ថានភាពដេកសណ្ដូកត្រង់ ផ្ចង់អារម្មណ៍លើសាច់ដុំផ្នែកផ្សេងៗនៃរាងកាយ ដោយផ្ដើមគិតពីម្រាមជើង ជាដំណាក់ៗ រហូតដល់ក្បាល។
ឧទាហរណ៍៖ កម្រើកម្រាមជើង រួចហើយទុកវាឲ្យសម្រាក នៅស្ងៀមដោយសុខស្រួល។ បន្តធ្វើវិធីនេះលើប្រអប់ជើង កជើង កំភួនជើង ភ្លៅ ត្រគាក ចង្កេះ សាច់ដុំគូទ ខ្នង ក្បាលពោះ ដើមទ្រូង ម្រាមដៃ (ទាំងសងខាង) កំភួនដៃ ដើមដៃ ស្មា កញ្ចឹងក រហូតដល់ក្បាល។
ពេលគិតសម្រាកត្រង់កន្លែងណាមួយ និយាយក្នុងចិត្តថា ឧទាហរណ៍៖ កំភួនជើងរបស់ខ្ញុំ បានសម្រាកដោយសុខហើយ សន្តិ សន្តិ សន្តិ...។
៣. ការតាំងសមាធិ
អង្គុយក្នុងលក្ខណៈសម្រាកស្រួល(ដូចរូប) គិតជ្រើសយកវត្ថុអ្វីម្យ៉ាងជាគោលសំអាង ដូចជា ផ្កាឈូក ពន្លឺទាន ទេសភាពល្អត្រកាល ឬអ្វីមួយដែលអ្នកស្រលាញ់ ចូលចិត្ត ហើយផ្ដោតចិត្តរបស់អ្នកទៅលើវត្ថុ ជាគោលនោះឲ្យជាប់។
ផ្ចង់អារម្មណ៍ តាំងចិត្តសមាធិ បែបនេះឲ្យបានរយៈពេលប្រមាណ ១៥ ទៅ២០នាទី ២ដងក្នុង១ថ្ងៃ ព្រឹកម្ដង ល្ងាចម្ដង (មុនពេលទទួលទានអាហារ) ។
ការតាំងសមាធិ មានប្រយោជន៍ចំពោះមនុស្សទូទៅ ទាំងក្មេងទាំងមនុស្សចាស់ ព្រោះវាជួយធ្វើឲ្យផ្លូវចិត្តបានស្ងប់ ជាជំនួយដល់ការគិតគូរ ប្រកបកិច្ចការងារឲ្យបានល្អប្រសើរ។
សម្គាល់៖
-បុគ្គលអាចជ្រើសយកវិធីសម្រាកចិត្ត-កាយណាមួយខាងលើតាមការចូលចិត្ត (ឬវិធីទាំង៣ បន្តបន្ទាប់គ្នា)។
-វិធីនីមួយៗខាងលើត្រូវធ្វើ ដោយសំលៀកបំពាក់ធូររលុង។
-ការតាំងសមាធិត្រូវធ្វើនៅពេលដូចគ្នាជាប្រចាំ និងនៅកន្លែងស្ងៀមស្ងាត់ គ្មានការរំខាន៕