ហេតុផល៥ យ៉ាងមិនគួររៀបការទាំងបង្ខំចិត្ត
- 2016-12-09 07:35:04
- ចំនួនមតិ 0 | ចំនួនចែករំលែក 0
ហេតុផល៥ យ៉ាងមិនគួររៀបការទាំងបង្ខំចិត្ត
ចន្លោះមិនឃើញ
ស្នេហាមួយអាចកើតឡើងបាន គឺបណ្ដាលមកពីក្ដីស្រឡាញ់ដែលកើតចេញពីក្រអៅបេះដូង ដ៏ពិតប្រាកដរបស់បុគ្គលពីរនាក់រត់ត្របាញ់រកគ្នា។ ក្ដីស្រឡាញ់របស់មនុស្សពីរនាក់មានចិត្តលើគ្នាទៅវិញទៅមកទើបអាចឈានទៅរកពាក្យជាសង្សារ ឈានដល់ការរៀបអាពាហ៍ពិពាហ៍ជាមួយគ្នា។ ប៉ុន្តែស្នេហាកើតឡើងដោយសារការបង្ខំពីឪពុកម្ដាយឬដោយការបង្ខំចិត្តនឹងទទួលជួបនូវរឿងរ៉ាវជាច្រើនក្នុងជីវិត។
១. មិនបានស្រឡាញ់ចេញពីចិត្ត
នៅត្រង់ចំណុចនេះមានន័យថា យល់ព្រមរៀបការជាមួយនរណាម្នាក់ដោយមានហេតុផលចាំបាច់ ឬមានការបង្ខំពីឪពុកម្ដាយ។ ស្នេហានេះធ្វើឱ្យបុគ្គលនោះ មានវិប្បដិសារីក្នុងចិត្តអស់មួយជីវិត ដោយសារធ្វើរឿងមួយប្រឆាំងនឹងបេះដូងដែលបញ្ជា ទាំងមិនដែលស្រឡាញ់ម្នាក់នោះសូម្បីបន្តិច។ ការរស់នៅជាមួយមនុស្សដែលខ្លួនឯងមិនស្រឡាញ់ គឺជាការក្បត់ឧត្ដមគតិខ្លួនឯងទាំងស្រុង ហើយអាចកើតជាជំងឺផ្លូវចិត្តក៏ថាបានដែរ ជាពិសេសភាគីម្ខាងទៀតក៏អាចគ្រាំចិត្តដោយសារស្នេហាមួយមិនបានកើតចេញពីចិត្តពិតប្រាកដ។
២. រស់នៅមិនចុះសម្រុង
រៀបការរួចគឺ ត្រូវរួមរស់ជាមួយគ្នាអស់មួយជីវិត ប៉ុន្តែរៀបការដោយការបង្ខំនោះក្នុងសង្គមគ្រួសារមួយប្រាកដជារស់នៅ គ្មានសុភមង្គលនោះទេ។ រៀបការជាមួយមនុស្សដែលយើងស្រឡាញ់គ្នា នៅតែមានរឿងឈ្លោះ ចុះទម្រាំរៀបការទាំងបង្ខំនឹងមានរឿងអ្វីកើតឡើង។ ដូច្នេះគួររៀបការដោយសារឪពុកម្ដាយបង្ខំ ឬដោយសារហេតុផលដែរឬទេ?
៣. ដាក់សម្ពាធលើជីវិត
រៀបការជាមួយមនុស្សដែលខ្លួនមិនបានស្រឡាញ់ ប្រៀបដូចជាយកអម្រែកដ៏ធ្ងន់មកដាក់លើស្មា ហើយត្រូវរែកអម្រែកនោះអស់មួយជីវិត។ ធ្វើបែបនេះ ដូចជាធ្វើបាបខ្លួនឯងពេកទេដឹង បើ កាលទេសៈមួយបង្ខំឱ្យរៀបការជាមួយនរណាម្នាក់ គឺត្រូវហ៊ានអារកាត់នឹងជម្នះរឿងនោះឱ្យបាន។ ព្រោះក្ដីសុខឬក្ដីទុក្ខមិនមានអ្នកណាមករ៉ាប់រងជំនួស យើងនោះទេ មានតែខ្លួនឯងនេះហើយជាអ្នកទទួលរ៉ាប់រង។ ដូច្នេះមុនរៀបការត្រូវគិតឱ្យច្បាស់ ព្រោះគ្មាននរណាម្នាក់អាចសម្រេចបានក្រៅពីខ្លួនឯងនោះឡើយ។
៤. គ្មានភាពរីកចម្រើនក្នុងគ្រួសារ
បន្ទាប់ពីរៀបការរួចការចាប់ដៃគ្នា កសាងគ្រួសារគឺជាកាតព្វកិច្ចរបស់ប្ដីប្រពន្ធ។ ប៉ុន្តែការស្រឡាញ់គ្នាជាកាតព្វកិច្ចដែរនោះ គឺគ្មានការរីកចម្រើនទេ ដោយភាគីទាំងសងខាងគ្មានកម្លាំងចិត្តក្នុងការខិតខំប្រឹងប្រែងធ្វើការនោះឡើយ។ កម្លាំងចិត្តដែលខំធ្វើអ្វីមួយ គឺមកពីដើម្បីមនុស្សដែលខ្លួនស្រឡាញ់ ចុះបើម្នាក់នោះ យើងមិនបានស្រឡាញ់ផងតើខំប្រឹងដើម្បីនរណា។ ដូចនេះទាំងបុគ្គលផ្ទាល់ ដែលជួបរឿងបែបនេះ ទាំងឪពុកម្ដាយដែលតែងមានហេតុផល យកមកបង្ខំចិត្តកូនគួរគិតសារឡើងវិញទៅលើបញ្ហានេះ។
៥. ប្រឈមមុខនឹងការលែងលះ
លទ្ធផលចុងក្រោយ នៃការរៀបការដោយមិនបានស្រឡាញ់គ្នា ចេញពីចិត្ត ចុងក្រោយគឺមានតែជ្រើសរើសការបែក។ ការលែងលះនេះគ្មាននរណាចង់ជួបនោះទេ ស្ត្រី ក៏មិនចង់ជាប់ឈ្មោះជាស្រីមេម៉ាយ រីឯបុរសក៏មិនចង់មានឈ្មោះជាពោះម៉ាយដែរ។ ដូច្នេះបើដឹងមុនថាលទ្ធផលចុងក្រោយ ទៅជាបែបនេះកុំរៀបការជាមួយគ្នាអីល្អជាង។ ប្រសិនបើមានកូនទៀតគឺកាន់តែជាបញ្ហាធ្ងន់ធ្ងរបន្ថែមទៀត ព្រោះក្រៅពីនាក់ទាំងពីរឈឺចាប់ហើយនោះ គឺកូនជាអ្នកឈឺកាន់តែខ្លាំង។