រដ្ឋាភិបាលនឹងប្រជុំផ្សព្វផ្សាយពីយន្តការប្រមូលទិញស្រូវពីករសិករនៅសប្តាហ៍ក្រោយ

2017-08-10 03:08:14
ចំនួនមតិ 0 | ចំនួនចែករំលែក 0

ចន្លោះមិនឃើញ

សម្តេចហ៊ុន សែន នឹងជួបពិភាក្សាជាមួយអភិបាលនៃគណៈអភិបាលខេត្តមួយចំនួនដើម្បីពិភាក្សាពីយន្តការក្នុងការប្រមូលទិញស្រូវពីប្រជាពលរដ្ឋនៅដើមសប្តាហ៍ក្រោយ ដែលដំណឹងនេះធ្វើឲ្យកសិកររំពឹងថាស្រូវនឹងមានតម្លៃសមរម្យអាចទទួលយកបាន។

ក្នុងសេចក្តីជូនដំណឹងមួយរបស់ក្រសួងសេដ្ឋកិច្ច និងហិរញ្ញវត្ថុ ដែលចេញផ្សាយកាលពីថ្ងៃទី៤ ខែសីហា ឆ្នាំ២០១៧ បានអញ្ជើ្ញអភិបាលនៃគណៈអភិបាលខេត្តចំនួន១៩ឲ្យមកចូលរួមសិក្ខាសាលាផ្សព្វផ្សាយពីយន្តការអន្តរាគមន៍របស់រាជរដ្ឋាភិបាលក្នុងការប្រមូលទិញស្រូវ។ សិក្ខាសាលានេះនឹងរៀបចំនៅព្រឹកថ្ងៃទី១៤ ខែសីហា ឆ្នាំ២០១៧។ នេះបើតាមសេចក្តីជូនដំណឹងដដែល។

លោក ឆាំ ខន កសិករក្នុងស្រុកបាកាន ខេត្តពោធិសាត់ស្វាគមន៍ចំពោះដំណឹងនេះ ដោយលោករំពឹងថាយន្តការនេះនឹងធ្វើឲ្យស្រូវរបស់កសិករអាចលក់បានក្នុងតម្លៃសមរម្យ និងអាចទទួលយកបាន។ លោកថាៈ «ល្អតើ វានឹងអាចឲ្យតម្លៃស្រូវថ្លៃ អាចទទួលយកបាន និងលើកទឹកចិត្តកសិករ»។

លោកបន្តថាបច្ចុប្បន្នកសិករក្នុងមូលដ្ឋានរបស់លោកកំពុងប្រមូលផលស្រូវសែនក្រអូប និងលក់បានក្នុងតម្លៃ៩៦០រៀលក្នុងមួយគីឡូក្រាម ដែលលោកថាតម្លៃនេះកសិករមិនទាន់ពេញចិត្តនៅឡើយ។ លោកអះអាងថាកសិករចង់បានតម្លៃ១០០០រៀលក្នុងមួយគីឡូក្រាម។ លោកបន្តថានៅខែតុលា ខាងមុខកសិករក្នុងមូលដ្ឋានរបស់លោកនឹងប្រមូលផលស្រូវសូម៉ាលីលើផ្ទៃដីប្រមាណជាបីទៅបួនពាន់ហិកតាបន្តទៀត និងថាក្នុងមួយឆ្នាំពួកលោកធ្វើស្រែពីរដង៕

ចុចអាន៖

អត្ថបទ៖ ទូច សុខា