កម្ពុជានឹងចំណេញលើសពីការគិត បើកសិករនាំគ្នាដាំស្រូវសរីរាង្គ
- 2017-08-04 08:24:16
- ចំនួនមតិ 0 | ចំនួនចែករំលែក 0
កម្ពុជានឹងចំណេញលើសពីការគិត បើកសិករនាំគ្នាដាំស្រូវសរីរាង្គ
ចន្លោះមិនឃើញ
ស្រូវសរីរាង្គជាប្រភេទស្រូវដែលពិបាកធ្វើជាងស្រូវធម្មតា និងត្រូវការចំណេះដឹង បច្ចេកទេសធ្វើដោយប្រើប្រាស់ជីធម្មជាតិគ្មានជាតិគីមី។ អ្នកជំនាញ បានអះអាងថា បើកសិករ និងវិស័យឯកជននាំគ្នាផលិតស្រូវនេះ កម្ពុជានឹងចំណេញច្រើនលើសពីការគិត។ តួយ៉ាង ទីផ្សារអង្ករសរីរាង្គមានតម្រូវការខ្ពស់នៅទីផ្សារសហភាពអឺរ៉ុប និងអាមេរិក ប៉ុន្តែការផលិតនៅកម្ពុជានៅមានតិចតួចនៅឡើយ។
លោកបណ្ឌិត សេង សារី អ្នកស្រាវជ្រាវសង្គមសិក្សាក្នុងវិស័យកសិកម្មយល់ឃើញថា ការបង្កបង្កើនស្រូវតាមបែបសរីរាង្គជាកសិកម្មប្រកបមនុស្សធម៌ ដែលជួយដល់ប្រជាជនខ្មែរអាចទទួលអាហារមានសុវត្ថិភាព មិនបង្កការប៉ះពាល់សុខភាព និងមានតម្លៃថ្លៃសម្រាប់ទីផ្សារបរទេស។
លោក មានប្រសាសន៍ កម្ពុជាចាំបាច់ត្រូវផ្លាស់ប្ដូរការផលិតចំណីអាហារសុវត្ថិភាព ឬកសិកម្មបែបសរីរាង្គទើបអាចប្រកួតប្រជែងជាមួយប្រទេសក្បែរខាងបាន។ លោកថា៖ « បើកម្ពុជា ប្រកាសខ្លួននឹងផលិតផលិតផលកសិកម្មសរីរាង្គនោះ កម្ពុជានឹងទាក់ទាញភ្ញៀវទេសចរបានកាន់តែច្រើនទៀត។
លោកស្រី ឃី មុនី នាយិកានៃក្រុមហ៊ុនផលិត និងនាំចេញអង្ករអេមរុ រ៉ាយស៍ (ខេមបូឌា) ដែលជាក្រុមហ៊ុននាំចេញអង្ករឈានមុខមួយនៅកម្ពុជា បានឲ្យដឹងថា អង្ករសរីរាង្គមានទីផ្សារល្អជាងគេនៅទីផ្សារអន្តរជាតិ។ លោកស្រីប្រាប់ថា កាលពីឆ្នាំ ២០១៦ លោកស្រីបាននាំចេញអង្ករសរីរាង្គប្រមាណ ២០០តោនទៅបរទេស ។
លោកស្រី មុនី បានគូសបញ្ជាក់ មូលហេតុដែលលោកស្រីបែរមកផលិតអង្ករសរីរាង្គវិញនោះ ដោយសារតែពិភពលោកមាននិន្នាការបរិភោគអាហារសុវត្ថិភាព មិនប៉ះពាល់បរិស្ថាន និងកាត់បន្ថយភាពក្រីក្រ មួយវិញទៀតវាជាទីផ្សារកម្រ ដែលមានឱកាសទទួលបានជោគជ័យច្រើនជាងអង្ករធម្មតា។ ដោយឡែកលោកស្រី រំពឹងថា ការប្រមូលទិន្នផលសូ្រវសរីរាង្គនឹងសម្រេចបាន ២ម៉ឺន ៥ពាន់តោន ក្នុងឆ្នាំនេះ ។
គួរជម្រាបថា កាលពីខែមីនា ឆ្នាំ ២០១៧ ក្រុមហ៊ុនផលិតអង្ករសរីរាង្គមួយនេះ បានសហការជាមួយសារជីវកម្មហិរញ្ញវត្ថអន្តរជាតិ IFC ក្នុងទំហំថវិកាប្រមាណ ១០លានដុល្លារ ជួយដល់ប្រជាកសិករប្រមាណ ៧០០គ្រួសារក្នុងខេត្តចំនួនពីរ (បាត់ដំបង និងព្រះវិហារ) ងាកមកផលិតស្រូវសរីរាង្គ ដើម្បីលើកកម្ពស់ជីវភាពកសិករកាន់តែប្រសើរឡើង។ បញ្ជាក់ តម្លៃអង្ករសរីរាង្គ មានតម្លៃខ្ពស់ជាងអង្ករធម្មរតាប្រមាណ ៣០ ទៅ ៣៥ ភាគរយទៅតាមគុណភាពអង្ករ៕
ចុចអានពត៌មានបន្ទាប់៖
ធនាគារស្រូវកម្ពុជាខេត្តបាត់ដំបង ប្រកាសឲ្យកសិករឈប់លក់ស្រូវក្នុងតម្លៃទាប
ក្រសួងពាណិជ្ជកម្មប្រកាសប្រមូលទិញអង្ករ ដើម្បីលក់ឲ្យបង់ក្លាដែស បន្ទាន់
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
