តម្លៃស្រូវចាប់ផ្ដើមមានហាងឆេងឡើងវិញ ព្រោះហេតុផល៣

2017-08-03 09:37:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងពាក់ព័ន្ធលូកដៃជ្រៅជុំវិញបញ្ហាទីផ្សារកសិកម្ម

ឱកាសល្អពីប្រទេសជិតខាង

តម្លៃស្រូវហក់ឡើងដល់ជាង៨០០រៀល

ក្រោយបញ្ហាតម្លៃស្រូវនៅកម្ពុជា បានប្រសើរឡើងនៅប៉ុន្មានខែចុងក្រោយមកនេះ គេសង្កេតឃើញថា មន្ត្រីពាក់ព័ន្ធក្នុងវិស័យកម្ម ក៏ពាណិជ្ជកម្ម បានខិតខំប្រឹងប្រែងរកដោះស្រាយទាំងបច្ចេកទេស និងទីផ្សារជួយដល់ប្រជាកសិករ។ ទន្ទឹមគ្នានេះ ទាំងមន្ត្រីជាន់ខ្ពស់ក្រសួងពាណិជ្ជកម្ម និងវិស័យឯកជន បានបង្ហាញសុទិដ្ឋិនិយម ជុំវិញតម្លៃស្រូវឆ្នាំនេះ ព្រោះមូលហេតុសំខាន់បី៖

ទី ១. ក្រសួងកសិកម្មបានលូកដៃជ្រៅ

ក្រោយផ្ទុះបាតុកម្មបិទផ្លូវរបស់ប្រជាកសិករនៅតាមបណ្ដាខេត្តមួយចំនួន ព្រោះតែតម្លៃស្រូវធ្លាក់ចុះ កាលពីឆ្នាំទៅ រដ្ឋាភិបាល ជាពិសេសក្រសួងកសិកម្ម បានចាប់ផ្ដើមចុះជួបផ្ទាល់ជាមួយកសិករ ដើម្បីស្វែងរកដំណោះស្រាយ បណ្ដុះបណ្ដាល ចំពោះបច្ចេកទេសដាំដុះឲ្យបានទិន្នផលខ្ពស់ និងមានគុណភាព។

ទី២. ទទួលការបញ្ជាទិញពីប្រទេសផលិតស្រូវធំទី៤

បង់ក្លាដេស ជាប្រទេសផលិតអង្ករធំជាងគេទីបួនក្នុងពិភពលោក បានក្លាយជាប្រទេសនាំចូលអង្ករដ៏សំខាន់ បន្ទាប់ពីទឹកជំនន់នៅខែមេសា បានប៉ះពាល់ដល់ផលិតផលក្នុងស្រុក។ នៅថ្ងៃទី ០២ សីហា ឆ្នាំ ២០១៧ រដ្ឋមន្ត្រីក្រសួងពាណិជ្ជកម្មកម្ពុជា លោក ប៉ាន សូរស័ក្កិ និងរដ្ឋមន្ត្រីក្រសួងស្បៀងអាហារបង់ក្លាដេស លោក កាមរុល អ៊ីស្លាម (Kamrul Islam) បានចុះកិច្ចព្រមព្រៀងទិញអង្ករកម្ពុជាឲ្យបានចំនួន ១លានតោន ក្នុងរយៈពេល ៥ឆ្នាំ (២០១៧-២០២២) ។ ដែលនេះគឺជាដំណឹងដ៏ល្អសម្រាប់ទីផ្សារអង្កររបស់កម្ពុជា។

ទី៣. ប្រទេសថៃបញ្ចេញស្រូវអស់ពីស្តុក

លោកស្រី ឃី មុនី អគ្គនាយកក្រុមហ៊ុន Amru Rice យល់ឃើញថា ឆ្នាំនេះតម្លៃស្រូវ អង្ករឆ្នាំនេះ ចាប់ផ្ដើមមានហាងឆេងល្អគួរសម ព្រោះតែប្រទេសស្ដុកស្រូវធំ ដូចប្រទេសជិតខាង(ថៃ) បានបញ្ចេញស្រូវដែលនៅសល់ពីស្តុកជិតអស់ ដែលវាបានធ្វើឲ្យមានតម្រូវការស្រូវ និងអង្ករកម្ពុជាខ្ពស់ជាងឆ្នាំមុន។

ជាមួយគ្នានេះ លោក ជា វណ្ណា កសិកររស់នៅភូមិក្ដីដូង ឃុំរូងដំរី ស្រុកបាភ្នំ ខេត្តព្រៃវែង បង្ហាញអារម្មណ៍រីករាយ ចំពោះដំណឹងនេះ។ យ៉ាងណាលោកបន្ថែមថា បច្ចុប្បន្នតម្លៃស្រូវលក់ ខ្ពស់បំផុតបាន ៨២០រៀល និងទាបបំផុត ៧៨០រៀល ក្នុងមួយគីឡូក្រាម។ ត្បិតតម្លៃបានខ្ពស់ជាងឆ្នាំមុន តែលោកវណ្ណាថា ចំណេញតិចតួច លោកសង្ឃឹមថា តម្លៃស្រូវនឹងឡើងដល់ ១ ០០០រៀល ក្នុងមួយគីឡូក្រាម ទើបលោកអាចផាតការចំណាយធំៗដូចជា គ្រឿងម៉ាស៊ីន និងកម្លាំងពលកម្មបានប្រសើរ៕

ចុចអានបន្ទាប់

ក្រសួងពាណិជ្ជកម្មប្រកាសប្រមូលទិញអង្ករ ដើម្បីលក់ឲ្យបង់ក្លាដែស បន្ទាន់

កម្ពុជានឹងទម្លាក់លុយ ២៧លានដុល្លារ ជួយវិស័យកសិផលពោត និងដំឡូង

មន្ទីរកសិកម្ម៖ ដំណោះស្រាយទីផ្សារកសិកម្មល្អបំផុតគឺ ការបង្កើតសហគមកសិករ

អត្ថបទ៖ ស៊ិន សាវ៉េត