ចម្លែកមែន! ផឹកស្រាស្រវឹងជោគជាំ ភ្ញាក់ដឹងខ្លួនឡើងនៅក្នុងលូតាមផ្លូវ

2017-08-10 03:26:52
ចំនួនមតិ 0 | ចំនួនចែករំលែក 0

ចន្លោះមិនឃើញ

លូជម្រៅ ២ម៉ែត្រ គ្មានច្រក ពិបាកចូល
បុរសរងគ្រោះផឹកពីល្ងាច ដឹងខ្លួនពេលព្រឹក
មិនដឹងមូលហេតុ តែបាត់របស់មានតម្លៃខ្លះ

បុរសម្នាក់នៅក្រុងឈៀងម៉ៃ ប្រទេសថៃ បានភ្ញាក់ដឹងខ្លួនឡើងនៅក្នុងលូទឹកស្អុយតាមផ្លូវ បន្ទាប់ពីផឹកស្រវឹងយ៉ាងជោគជាំនាពេលយប់។

កាលពីថ្ងៃអង្គារ មន្ត្រីប៉ូលិសក្នុងតំបន់ មានការចម្លែកចិត្តយ៉ាងខ្លាំង នៅពេលមានអ្នករាយការណ៍ថា ឮសំឡេងមនុស្សស្រែកឲ្យជួយពីក្នុងលូបង្ហូរទឹកស្អុយ។ បុរសដែលជាប់ក្នុងលូនោះ មានឈ្មោះ Jaseu Jafoo អាយុ ២៩ឆ្នាំ ហើយជាប់ក្នុងលូ ជម្រៅ ២ម៉ែត្រក្រោមដី ដោយមិនដឹងមូលហេតុច្បាស់។

ដោយសារលូកន្លែងនោះពិបាកនឹងបើកដើម្បីជួយទាញឡើង គេបានឲ្យបុរសរងគ្រោះដើរប្រហែល ១០ម៉ែត្រទៅរកគម្របលូ ទើបអាចជួយបាន។ ភ្លាមៗនោះ ប៉ូលិសបានបញ្ជូនបុរសរងគ្រោះឲ្យទៅផ្ទះងូតទឹកសម្អាតខ្លួនសិន ព្រោះក្លិនស្អុយខ្លាំងពេក ពេលចេញពីលូភ្លាម។ បន្ទាប់មក ទើបប្រាប់ឲ្យបុរសរងគ្រោះទៅបំភ្លឺនៅប៉ុស្តិ៍ប៉ូលិស។

ចៃដន្យអី Jaseu អត់មានចម្លើយយកជាការណ៍បានឡើយ គឺឆ្ងល់ដូចដែលអ្នកគ្រប់គ្នាឆ្ងល់ដែរ។ អ្នកធ្វើការនៅផ្នែកចុងភៅ បានប្រាប់ប៉ូលិសថា កាលពីល្ងាច រូបគេនិងមិត្តភក្តិបាននាំគ្នាទៅផឹករហូតស្រវឹង ហើយក្រោយមកក៏មិនដឹងថាកើតរឿងអ្វី។ Jaseu ថែមទាំងមិនដឹងថា ហេតុអ្វីខ្លួនទៅដេកក្នុងលូអស់មួយយប់ទៀតផង។

យ៉ាងណាក្ដី បុរសរងគ្រោះបានបាត់បង់របស់មានតម្លៃជាច្រើនជាប់ខ្លួនដូចជា កាបូបលុយ កាក់កម្រដែលមានរូបព្រះរាជា Rama ទី៥ និងខ្សែកមាសមួយខ្សែ។ ប៉ូលិសមិនទាន់អាចបញ្ជាក់បានទេថា តើបុរសរងគ្រោះជ្រុះបាត់របស់ ឬត្រូវគេបង្អកឲ្យស្រវឹងរួចប្លន់។ ចំណែកមូលហេតុដែលនាំឲ្យរូបគេទៅនៅក្នុងលូ ក៏ពិបាកប្រាប់ ព្រោះគ្មានផ្លូវចូលស្រួលៗឡើយ។

ពេលនេះ ប៉ូលិសកំពុងស៊ើបរឿងក្ដីដ៏ចម្លែកខាងលើ៕

ចុចអានអត្ថបទ៖

ប្រភព៖ Coconut ប្រែសម្រួល៖ គង់ វិសាល