កក្រើកទៀតហើយ! Li Chen នាំសង្សារបណ្ដូលចិត្ត Fan Bingbing ចូលធ្វើទ័ពជើងអាកាស

2017-08-11 06:13:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ទីផ្សារភាពយន្តចិនសព្វថ្ងៃកំពុងរីកដុះដាលខ្លាំង តាមរយៈខ្សែភាពយន្តល្បីៗជាច្រើន ជាពិសេសភាពយន្តបែបប្រយុទ្ធបាញ់ប្រហាររបស់កងកម្លាំងទ័ពដូចជារឿង "Wolf Warrior 2” ជាដើម។ បន្ទាប់ពីរឿងនេះ ទស្សនិកជននឹងបានទស្សនារឿងថ្មីមួយទៀតដែលនឹងបង្ហាញខ្លួននៅខែកញ្ញាខាងមុខដែរ។

រឿងនេះមានចំណងជើងថា "Sky Hunter” ជាការដឹកនាំ និងដើរតួដោយតារាប្រុសចិន Li Chen ព្រមទាំងមានការចូលរួមសម្ដែងពីគូស្នេហ៍របស់លោក នាង Fan Bingbing ក៏ដូចជាតារាសម្ដែង Wang Qianyuan និងLi Jiahang ផងដែរ។

ជាក់ស្ដែង កាលពីថ្ងៃពុធ ខែ សីហា សប្ដាហ៍នេះ ក្រុមការងារផលិតរឿងថ្មី បានអញ្ជើញមកជុំគ្នា បើកសន្និសីទកាសែតលើកដំបូង ដើម្បីផ្សព្វផ្សាយពីខ្សែភាពយន្ត ព្រមទាំងមានការចូលរួមពីភ្ញៀវកិត្តិយស និងក្រុមការងារសហការផលិត ដែលមកពីកងទ័ពជើងអាកាសថែមទៀតផង។

ក្នុងការរៀបចំផលិតក្រុមភាពយន្តដែលចំណាយទឹកប្រាក់អស់ជាង ២០០លានយ័ន (ប្រមាណជិត ៣០លានដុល្លារ) នេះបានទទួលការជួយគាំទ្រទាំងស្រុងពីកងទ័ពជើងអាកាសចិន ដែលរួមមាន៖ បញ្ជូនកងកម្លាំងដែលមានជំនាញរាប់សិបនាក់ ឧបករណ៍មួយចំនួន ព្រមទាំងអ្នកបណ្ដុះបណ្ដាលជាច្រើនរូបទៀតមកជួយក្នុងរឿង។ ជាមួយគ្នានោះ ដើម្បីជាជំនួយក្នុងការផលិត និងទទួលបានរូបភាពល្អៗ ជាពិសេសធ្វើយ៉ាងណាឲ្យដូចទៅនឹងទិដ្ឋភាពពិតៗ ខាងអាជ្ញាធរកងទ័ព ក៏បានបើកឲ្យក្រុមការងារផលិតរឿងនេះ ថតឈុតឆាកផ្សេងៗទៀតជាច្រើនដែរ។

អ្វីដែលកាន់តែពិសេស អ្នកទស្សនានឹងបានឃើញយន្តហោះចម្បាំងចិនជាច្រើនគ្រឿងបង្ហាញខ្លួនក្នុងរឿង "Sky Hunter” ដូចជា៖ ប្រភេទ J-20, Y-20, J-10C និង J-11Bជាដើម។

ងាកមកមកតារាស្រី Fan Bingbing វិញក្នុងរឿងនេះនឹងដើរតួជាអ្នកបើកឧទ្ធម្ភាគចក្រយោធាម្នាក់ ហើយនាងពិតជារីករាយណាស់ ដែលបានសម្ដែងរឿងនេះ ក៏ដូចជាជួយបំពេញក្ដីស្រមៃសង្សាររបស់ខ្លួន៕