បែកថ្នាំ ប្រែក្លាយដំបូលផ្ទះទៅជាក្លិបច្រៀងរាំ
- 2017-08-13 07:32:54
- ចំនួនមតិ 0 | ចំនួនចែករំលែក 0
បែកថ្នាំ ប្រែក្លាយដំបូលផ្ទះទៅជាក្លិបច្រៀងរាំ
ចន្លោះមិនឃើញ
បុរសម្នាក់ ដែលគេជឿថាស្ថិតក្រោមឥទ្ធិពលគ្រឿងញៀន បានចំណាយពេលជិត ១០ ម៉ោងច្រៀងរាំនៅលើដំបូលផ្ទះ។
អ្នកស្រុកនៅភាគខាងត្បូងទីក្រុងកាន់ថូ ប្រទេសវៀតណាម មានការភ្ញាក់ផ្អើលជាខ្លាំងពេលឃើញបុរសម្នាក់ឡើងលើដំបូលនៅសង្កាត់ផុងដៀន កាលពីព្រឹកថ្ងៃសុក្រ ទី១១ សីហា។
បុរស ដែលគេជឿថាមានអាយុប្រហែល ៣០ ឆ្នាំរូបនោះ បន្ទាប់មកបាននិយាយម្នាក់ឯងដូចមនុស្សឆ្កួត ច្រៀង ហើយរាំ នៅពេលដែលគាត់ដើរទៅវិញទៅមកនៅលើដំបូលផ្ទះ។
អាជ្ញាធរក្នុងមូលដ្ឋានបានដាក់ជណ្តើរឱ្យគាត់ ហើយព្យាយាមបញ្ចុះបញ្ចូលគាត់ឱ្យចុះមកវិញយ៉ាងយូរ។ ទោះយ៉ាងណា បុរសនោះបានឆ្លើយតបដោយរើសយកក្បឿងដំបូលគប់ដាក់ពួកគេនៅខាងក្រោម។
អាជ្ញាធរក៏បានបិទចរន្តអគ្គីសនីនៅក្នុងតំបន់នេះផងដែរហើយបានជម្លៀសប្រជាពលរដ្ឋនៃផ្ទះ ដែលគាត់កំពុងដើរលើដំបូលនោះ ដើម្បីធានាសុវត្ថិភាពរបស់គាត់។
ភ្លាមៗនោះបុរសនេះបានដួលដោយខ្លួនឯង ក្រោយចំណាយពេលជិត ១០ ម៉ោងនៅលើដំបូល ហើយប៉ូលិសបានឃាត់ខ្លួនគាត់ភ្លាមៗ។
មន្ត្រីប៉ូលីសបាននិយាយថា “យើងសង្ស័យថាគាត់ស្ថិតនៅក្រោមឥទ្ធិពលគ្រឿងញៀន” ។
កាលពីខែឧសភា អ្នកប្រើគ្រឿងញៀនអាយុ ២៨ ឆ្នាំម្នាក់បានឡើងបង្គោលភ្លើងនៅទីក្រុងហាណូយ ហើយបដិសេធ មិនព្រមចុះក្រោមវិញឡើយ។ កាលពីខែមេសា បុរសអាយុ២៣ឆ្នាំម្នាក់បានចំណាយពេលជាច្រើនម៉ោងដើរលើខ្សែភ្លើងនៅទីក្រុងហូជីមិញខណៈដែលស្ថិតនៅក្រោមឥទ្ធិពលគ្រឿងញៀន។ នៅទីបំផុតបុរសទាំងពីរត្រូវបានជួយសង្គ្រោះហើយចុះទៅដល់ដីដោយសុវត្ថិភាព៕
ចុចអាន៖
ប្រភព ៖ rasmeinews