ទិដ្ឋភាពដ៏រំភើបរបស់អ្នកគាំទ្រមកជុំគ្នាជូនដំណើរ Ji Chang Wook ចូលយោធា (វីដេអូ)

2017-08-14 09:06:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាថ្ងៃដ៏គួរឲ្យក្ដុកក្ដួល និងពោរពេញទៅដោយក្ដីអាឡោះអាល័យរបស់អ្នកគាំទ្រទាំងអស់របស់ តារាប្រុស Ji Chang Wook នៅពេលដែលតារាប្រុសរូបនេះត្រូវលាទៅបំពេញកាតព្វកិច្ចជាយោធា រយៈពេល ២ឆ្នាំ។

ថ្ងៃទី ១៤ ខែសីហានេះ ជាកាលកំណត់ ដែលតួឯកប្រុសក្នុងរឿង “Suspicious Partner” លោក Ji Chang Wook ត្រូវចូលខ្លួនក្នុងជួរយោធាកូរ៉េ។ ព័ត៌មានជាច្រើនបានចុះផ្សាយជាហូរហែ ពីដំណើររបស់ Chang Wook នៅព្រឹកនេះ។

តាមសេចក្ដីរាយការណ៍ព័ត៌មានមួយបានឲ្យដឹងថា ព្រឹកមិញ Ji Chang Wook បានចូលរួមក្នុងវគ្គបណ្ដុះបណ្ដាលមួយនៅ កងពលធំថ្មើរជើងទី ៣ ដែលមានទីតាំងនៅ តំបន់ Cheorwon ខេត្ត Gangwon។

អ្វីដែលគួរឲ្យរំភើប និងចងចាំមិនអាចបំភ្លេចបាន គឺនៅពេលនោះសង្កេតឃើញថាមានអ្នកគាំទ្ររបស់តារាប្រុសរូបនេះជាច្រើនមកពីច្រើនប្រទេស បានមកប្រមូលផ្ដុំគ្នា តាមដងផ្លូវ ដើម្បីជូនដំណើរលោក នៅមុខច្រកទ្វានៃទីតាំងហ្វឹកហាត់នោះ។ ចំណែកតារាប្រុសវ័យ ៣០ឆ្នាំរូបនេះ ក៏បានចេញមករាក់ទាក់អ្នកគាំទ្រជាទីស្រឡាញ់ ព្រមទាំងបណ្ដាសារព័ត៌មានទាំងឡាយដែលមានវត្តមាននាពេលនោះដែរ។

វីដេអូពី TV Daily

កាន់តែស្រណោះ គឺមុនពេលលោកចាកចេញពីទីក្រុងសេអ៊ូល ទៅកាន់តំបន់ Cheorwon លោកក៏បានបន្សល់ទុកសារមួយ ជូនដល់អ្នកគាំទ្ររបស់ខ្លួនដែរ។ សារនោះសរសេរថា៖ "គឺខ្ញុំ (សើច) អរុណសួស្ដីអ្នកទាំងអស់គ្នា! ខ្ញុំត្រូវចេញទៅខេត្ត Gangwon ហើយពេលនេះ។ អ្នកទាំងអស់គ្នាត្រូវតែរីករាយ និងមានសុខភាពល្អ កុំភ្លេចខ្ញុំ ហើយអ្នកត្រូវតែរង់ចាំខ្ញុំមកវិញ!!! ខ្ញុំនឹងត្រឡប់មកវិញ ប្រកបដោយសុខភាពល្អ!!! អីចឹង ខ្ញុំទៅហើយ... ខ្ញុំនឹងចេញសារមួយទៀត នៅពេលខ្ញុំចេញមកវិញអំឡោងពេលវិស្សមកាល ក្រោយរយៈ ១០០ថ្ងៃ!!! ដោយការគោរពបំផុត!!!”។