ស្រុកមង្គលបូរី ខេត្តបន្ទាយមានជ័យ និយមប្រើដោកយក្ស

2017-08-21 07:41:43
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកទាំងអស់ធ្លាប់ស្គាល់ដោកដែរ ឫទេ? ដោក ជាឧបករណ៍ធ្វើពីឫស្សីមានរាងមូល ស្រដៀងនឹងលួឫកញ្ឆេរ តែវាមានវិមាត្រធំ និងគ្មានដៃសម្រាប់លើកទេ។ ទីតាំងផលិតដោកនេះ ស្ថិតនៅភូមិក្រឡាន ឃុំអូរប្រាសាទ ស្រុកមង្គលបូរី ក្នុងខេត្តបន្ទាយមានជ័យ។

បើតាមម្ចាស់សិប្បកម្ម អ្នកនាង ឆៃយ៉ា បានប្រាប់ Sabay ថា ក្រុមគ្រួសាររបស់នាងប្រកបរបរធ្វើដោកនេះជាង១០ឆ្នាំមកហើយ ដែលផ្ដើមពីឪពុកធ្លាក់មកបងៗ និងចុងក្រោយនេះ នាងជាអ្នកគ្រប់គ្រងសិប្បកម្មមួយនេះ។

ម្ចាស់សិប្បកម្មវ័យ ២៩ឆ្នាំ ខាងលើ បានបន្ថែមទៀតថា នៅស្រុកនេះគេប្រើដោក សម្រាប់ដាក់ស្រូវ ដោយដោកទាំងនេះ មានទំហំច្រើនប្រភេទ ដូចជាសម្រាប់ដាក់ស្រូវ ១តោន ១តោនកន្លះ ២តោន និង៣តោន។

ដោយឡែកដោកយក្ស ដែលកំពុងដឹកនៅលើឡាននោះ ត្រូវបានគេបញ្ជាទិញជាពិសេសចំនួន៤ ដើម្បីយកទៅតាំងលំអកន្លែងកម្សាន្តមួយនៅទីរួមស្រុកមង្គលបូរី។ អ្នកនាង ឆៃយ៉ា បានបន្ថែមទៀតថា ដើម្បីធ្វើដោកបាន គាត់ត្រូវដើរទិញ ឫស្សីពីអ្នកភូមិជិតៗនេះ ដោយដោកតូចល្មមៗចំណាយពេល១ថ្ងៃ តែបើដោកធំៗត្រូវប្រើពេល២ថ្ងៃទើបធ្វើរួច។

បើនិយាយពីតម្លៃវិញ គឺគិតតាមទំហំរបស់ដោក ដែលមានតម្លៃចន្លោះពី ៣០ ដុល្លារ ដល់ជាង ១០០ដុល្លារ។ របរធ្វើដោកនេះ ជាផ្នែកមួយសំខាន់ក្នុងការជួយទ្រទ្រង់ជីវភាពគ្រួសាររបស់ អ្នកនាង ឆៃយ៉ា។ កន្លងមកក៏មានភ្ញៀវមួយចំនួន ពេញចិត្តនឹងដោកនេះដែរ ចង់ទិញដោកនេះយកទៅខេត្តផ្សេងដែរ តែអ្នកនាងគ្មានសេវាដឹកជញ្ជូនទេ ដូច្នេះភ្ញៀវត្រូវរកដឹកជញ្ជូនដោយខ្លួនឯង៕