អ្នកប្រើស្មាតហ្វូនទាំងឡាយ គួរស្វែងយល់ផ្នែកគ្រឿងផ្គុំសំខាន់ៗទាំងនេះ

2017-08-26 02:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ទម្រាំផលិតបានចេញជាស្មាតហ្វូនមួយគ្រឿងដាក់លក់នៅលើទីផ្សារ នៅផ្នែកខាងក្នុងម៉ាស៊ីនបានប្រមូលផ្ដុំទៅដោយគ្រឿងផ្គុំសំខាន់ៗជាច្រើន។ ក្រៅពីថ្ម, អេក្រង់ តើអ្នកបានធ្លាប់ស្គាល់អ្វីខ្លះទៀត? Sabay បង្ហាញឲ្យស្វែងយល់ពីបង្គំនៃផ្នែកដែលមិនអាចខ្វះបាន ក្នុងការផលិតចេញជាស្មាតហ្វូនមួយគ្រឿង។

១.អេក្រង់

ផ្នែកនេះអាចចាត់ទុកថាជាចំណុចសំខាន់បំផុត ដោយលើស្មាតហ្វូននាពេលបច្ចុប្បន្នបានបំពាក់នូវបច្ចេកវិទ្យាអេក្រង់ ២ ប្រភេទរួមមាន: .LCDs ដែលតំណាងឲ្យបច្ចេកវិទ្យាអេក្រង់ IPS .LEDs ដែលតំណាងឲ្យបច្ចេកវិទ្យាអេក្រង់ AMOLED និង Super AMOLED

បើនិយាយពីភាពខុសគ្នានៃអេក្រង់ទាំង ២ ជាទូទៅពពួក AMOLED/SAMOLED មានតម្លៃថ្លៃជាងអេក្រង់ IPS ទៀតសោតមានពន្លឺច្បាស់ជាង, កម្រិតបង្ហាញប្រសើរជាង និងជួយសន្សំសំចៃថាមពលថ្មបានល្អជាង។

២.ថ្ម

ពិតណាស់ថ្មដែលគេនិយមបំពាក់លើស្មាតហ្វូនបច្ចុប្បន្ន ច្រើនជាប្រភេទ Lithium-ion ដែលមានប្រភេទដោះបាន (Removable) និង ដោះមិនបាន (Non-Removable)។ ដោយទោះបីជាថ្មទាំងនេះ បានបំពាក់នូវបច្ចេកវិទ្យាជួយពង្រឹងសុវត្ថិភាពដល់អ្នកប្រើប្រាស់ក្ដី ប៉ុន្តែក៏ផ្អែកលើការប្រើប្រាស់របស់អ្នកដែរ ជៀសវាងការបង្កបញ្ហាផ្សេងៗ ពីការប្រើភ្ជាប់ជាមួយឧបករណ៍សាកដែលគ្មានប្រភពជាក់លាក់និងការប្រើខុសស្តង់ដារជាដើម។

៣.បន្ទះឈីប SoC

អ្នកខ្លះគិតថាបន្ទះឈីបឬយើងហៅថា SoC គ្រាន់តែជាអង្គគណនាម៉ាស៊ីនធម្មតា ផ្ទុយទៅវិញមិនត្រឹមតែទ្រទ្រង់លើល្បឿនដំណើរការ CPU មួយឡើយ ទៀតសោតវាគ្រប់គ្រងទាំង GPU, Modem អ៊ីនធឺណិត LTE, ដំណើរការអេក្រង់, ដំណើរការវីដេអូ និងជំរុញផ្នែកផ្គុំផ្សេងៗទៀត ដើម្បីបង្កើតឲ្យក្លាយជាប្រព័ន្ធ (System) ជាក់លាក់មួយក្នុងការធ្វើឲ្យស្មាតហ្វូនប្រើប្រាស់ទៅបាន។ ដោយទោះបីមានការប្រកួតប្រជែងទីផ្សារបន្ទះឈីបដូចជា Qualcomm, MediaTek, SAMSUNG, Kirin របស់ Huawei និង Ax របស់ Apple ក្ដី ប៉ុន្តែពួកគេផលិតដោយប្រើអាជ្ញាប័ណ្ណតែមួយចេញពី ARM។

៤.Memory និងអង្គផ្ទុក (Storage)

ស្មាតហ្វូនមិនអាចដំណើរការទៅបាន ប្រសិនជាគ្មាន RAM និងអង្គផ្ទុក (System Storage)។ RAM បំពាក់លើស្មាតហ្វូន ខុសគ្នាទៅតាមទំហំតែមានប្រភេទដូចជា LPDDR3 ឬ LPDDR4 ដោយស៊េរីទំនើបខ្លះបំពាក់ដល់ LPDDR4X។ LP តំណាងឲ្យពាក្យ Low-Power ដែលជួយកាត់បន្ថយកម្លាំងវ៉ុលសរុបនៃឈីបនីមួយៗ បង្កើនឲ្យមានការសន្សំថាមពលខ្ពស់និងពង្រឹងទំហំថ្មប្រើបានយូរ។

Internal Storage ឬ System Storage យើងអាចហៅថា អង្គផ្ទុកនៃម៉ាស៊ីន ដែលជាទូទៅមានចន្លោះពី 16GB – 256GB ប៉ុន្តែទំហំទាំងនោះយើងមិនអាចឃើញពេញគ្រប់គ្រាន់តែម្ដងឡើយ ដោយឧបមាថាទំហំម៉ាស៊ីន 64B យើងសង្កេតឃើញតែ 53-55GB ប៉ុណ្ណោះ។ មូលហេតុដោយសារប្រព័ន្ធដំណើរការ Operating System និងកម្មវិធីដំឡើងស្រាប់ក្នុងម៉ាស៊ីន បានក្ដោបក្ដាប់នៃអង្គផ្ទុកមួយនោះ អំឡុងពេលដែលយើងធ្វើការ Install ចូលទៅក្នុងស្មាតហ្វូន។

៥.Modems

រាល់ការទំនាក់ទំនងគ្នា, បើកប្រព័ន្ធអ៊ីនធឺណិត និងផ្ញើសារចេញចូល ស្មាតហ្វូនបំពេញមុខងារទាំងនោះទៅបានដោយឆ្លងកាត់ផ្នែកគ្រឿង Modems។ មានក្រុមហ៊ុនដែលផលិតបន្ទះឈីបជាច្រើនដូច Qualcomm, SAMSUNG និង Huawei បានផលិតនូវ Modems ដោយខ្លួនឯង។

បន្ទះ LTE Modems ក្រោយគេបង្អស់នាពេលបច្ចុប្បន្នគឺ Cat. 9 ដែលវាជួយជំរុញឲ្យល្បឿនដំណើរការអ៊ីនធឺណិតលឿនរហ័សជាទីបំផុត ធៀបនឹងពពួកស្មាតហ្វូនដទៃៗដោយទោះបីគាំទ្រការប្រើប្រព័ន្ធ LTE បានដូចគ្នាក្ដី។

៦.Camera

កាមេរ៉ាក្នុងស្មាតហ្វូនបែងចែកជា ២ គឺកាមេរ៉ាមុខនិងក្រោយ ប៉ុន្តែក្នុងកាមេរ៉ាមួយគឺផ្គុំឡើងដោយ ៣ ផ្នែក:

Sensor ត្រួតពិនិត្យពន្លឺ
Lens ជាផ្នែកដែលពន្លឺឆ្លងកាត់
The Image Processor ការចាប់យករូបភាពឬវីដេអូ

អ្នកខ្លះថាទំហំ Megapixels ជាផ្នែកសំខាន់នៃកាមេរ៉ា បើវាធំកាមេរ៉ានោះនឹងថតបានច្បាស់ ប៉ុន្តែការគិតបែបនេះគឺខុសទាំងស្រុង។ ផ្នែកសំខាន់បំផុតគឺផ្អែកទៅលើ Sensor ឯណោះទេ ដោយគ្រប់ស្មាតហ្វូនទាំងអស់ រមែងមាន Sensor ខុសៗពីគ្នា។ ដែលពួកវាអាចគ្រប់គ្រងកម្រិតពន្លឺខ្ពស់ទាបជាងគ្នា និងជំរុញឲ្យ Lens ធ្វើការបានល្អទៅតាមនោះ។ ខណៈ Sensor នៃកាមេរ៉ាស្មាតហ្វូនមានទំហំតូចជាកត្តាធ្វើឲ្យការថតរូបនិងវីដេអូតាមទូរសព្ទ មិនអាចធ្វើបានល្អនៅទីងងឹតឡើយ ខុសពីពពួកកាមេរ៉ាធំដែលមាន Sensor ទំហំធំ អាចធ្វើបានប្រសើរជាងឆ្ងាយ ជាកត្តាធ្វើឲ្យក្រុមហ៊ុនស្មាតហ្វូនសព្វថ្ងៃកំពុងផ្ដោតលើការជំនួយមុខងារនោះ។

៧.Sensors

រាល់ស្មាតហ្វូនទាំងអស់ មាន Sensors ចំនួន ៥ ដែលមិនអាចខ្វះបាន។

Accelerometer: ចាប់សញ្ញានៅពេលយើងធ្វើការលើស្មាតហ្វូនក្រឡុក, ផ្ដេកបញ្ឈរអេក្រង់និងការផ្លាស់ទី
Gyrocsope: ដំណើរការព្រមគ្នាជាមួយ Sensor ខាងលើ ក្នុងការប្រាប់ជាដំណឹងឲ្យស្មាតហ្វូនដាក់ទៅជាផ្តេក ឧទាហរណ៍នៅពេលលេងហ្គេមប្រណាំងរថយន្តឬទស្សនាខ្សែភាពយន្តជាដើម
Digital Compass: ជាមុខងារត្រីវិស័យនៅលើស្មាតហ្វូន
Ambient Light Sensor: វាស់ស្ទង់កម្រិតពន្លឺ ពេលណាត្រូវទម្លាក់ពន្លឺនិងបង្កើតពន្លឺ ដែលយើងនិយមប្រើមុខងារ Auto Brightness គឺឆ្លងកាត់ Sensor នេះឯង
Proximity Sensor: អំឡុងពេល Call បើអ្នកលើកទូរសព្ទដាក់ក្បែរត្រចៀក វានឹងងងឹតអេក្រង់ស្វ័យប្រវត្តិ ខណៈបើវាមិនងងឹតនោះស្មាតហ្វូនអ្នកខូចផ្នែកគ្រឿងនេះហើយ។

ចុចអានអត្ថបទ៖

ប្រភព៖ fossbytes ប្រែសម្រួល៖ កៅ រក្សា