មន្ត្រីរបស់លោកស្រី យីងឡាក់ ច្រើនរូបសុទ្ធតែជាប់ពន្ធនាគាររាប់ទសវត្សរ៍

2017-08-26 03:31:49
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅថ្ងៃទី ២៥ សីហាម្សិលមិញ ជាពេលវេលាដែលតុលាការកំពូលថៃប្រកាសសាលដីការបស់អតីតនាយករដ្ឋមន្ត្រីលោកស្រី យីង ឡាក់ អមជាមួយមន្ត្រីរបស់លោកស្រីជាច្រើនរូបទៀត ប៉ុន្តែលោកស្រីមិនបានបង្ហាញខ្លួនមកស្ដាប់សាលដីកាឡើយ។

រូបភាពផ្ដល់សិទ្ធិពី Reuters

ទោះបីជាពុំឃើញវត្តមានលោកស្រី តែអ្នកគាំទ្រអាវក្រហមរាប់រយនាក់ បានមកប្រមូលផ្ដុំគ្នានៅក្បែរអគារតុលាការក្រុងបាងកក។ សារព័ត៌មានថៃបាងកកប៉ុស្ដិ៍ក៏បានចុះផ្សាយដែរថា លោកស្រីបានគេចខ្លួនមកកម្ពុជាដើម្បីធ្វើដំណើរឆ្លងទៅកាន់មជ្ឈិមបូព៌ា ឯប្រភពមួយទៀតពីសារព័ត៌មានខោសូដ ថា លោកស្រីបានគេចខ្លួនមកកម្ពុជា ដើម្បីធ្វើដំណើរទៅកាន់ប្រទេសសិង្ហបុរី រួចឆ្លងទៅទីក្រុងឌូបៃ ប្រទេសអារ៉ាប់រួម ជួបបងប្រុសលោក ថាក់ស៊ីន ដែលមានផ្ទះនៅទីនោះ។

ចំណែកមន្ត្រីរបស់លោកស្រី យីងឡាក់ បានមកបង្ហាញខ្លួនថ្ងៃប្រកាសសាលដីកាតាមការកំណត់របស់តុលាការដោយអតីតរដ្ឋមន្ត្រីក្រសួងពាណិជ្ជកម្មលោក Boonsong Teriyapirom ត្រូវជាប់ពន្ធនាគារចំនួន ៤២ឆ្នាំ ពីបទសមគំនិតជាមួយមន្ត្រី និងអ្នកជំនួញផ្សេងទៀតក្នុងការក្លែងបន្លំកិច្ចព្រមព្រៀងនាំអង្ករចេញជាមួយក្រុមហ៊ុនចិនមិនមានអាជ្ញាប័ណ្ណ ដើម្បីលក់អង្ករប្រមូលទិញពីកសិករដែលជាផ្នែកមួយនៃគោលនយោបាយជួយទិញស្រូវអង្កររបស់លោកស្រី យីង ឡាក់។

អនុប្រធានរបស់លោកអតីតរដ្ឋមន្ត្រីខាងលើ គឺលោក Poom Sarapol ត្រូវជាប់ពន្ធនាគារចំនួន ៣៦ឆ្នាំ។ លោក Manas Soiploy អតីតប្រធាននាយកដ្ឋានពាណិជ្ជកម្មបរទេសជាប់ពន្ធនាគារ ៤០ឆ្នាំ និងលោក Tikhumporn Natvaratat ជាអនុប្រធាន ជាប់ពន្ធនាគារ ៣២ឆ្នាំ។

លោក Akharapong Theepwatchara ជាអតីតប្រធានការិយាល័យរដ្ឋបាលពាណិជ្ជកម្មស្រូវអង្ករជាប់ពន្ធនាគារចំនួន ២៤ឆ្នាំ។ Apichart Chansakulporn ជានាយកប្រតិបត្តិក្រុមហ៊ុននាំអង្ករចេញ Siam Indica Col LTD ជាប់ទោស ៤៨ឆ្នាំ ហើយក្រុមហ៊ុនលោកត្រូវបង់ថ្លៃខូចខាតចំនួន ១៦,៩ពាន់លានបាត ដល់ក្រសួងហិរញ្ញវត្ថុ។

ជនជាប់ចោទផ្សេងទៀតត្រូវជាប់ពន្ធនាគាររយៈពេលផ្សេងៗគ្នា និងត្រូវបង់ថ្លៃខូចខាតសមាមាត្រទៅនឹងទោសឧក្រិដ្ឋកម្មរបស់ពួកគេ។ មនុស្ស ៨នាក់ក្នុងចំណោម ជនជាប់ចោទទាំងអស់ ២៨នាក់ ត្រូវបានដោះលែង។ ជនជាប់ចោទ ២នាក់បានរត់គេចខ្លួនបាត់ស្រមោលផងដែរ។ ចំណែក ករណីលោកស្រី យីង ឡាក់ វិញ ប្រសិនបើតុលាការប្រកាសថាមានទោស នឹងត្រូវជាប់ពន្ធនាគារចំនួន ១០ឆ្នាំ និងរឹបអូសទ្រព្យសម្បត្តិផង។

បន្ទាប់ពីអានសាលដីកាចប់សព្វគ្រប់ ជនជាប់ចោទទាំងអស់ត្រូវបានបញ្ជូនទៅកាន់ពន្ធនាគារបាងកក Remand ក្នុងសង្កាត់ចាក់តុចាក់ ដោយតុលាការបដិសេធសំណើសុំដោះលែងទាំងអស់៕