អ្នកកាន់ស្មាតហ្វូនចែកឲ្យដាច់រវាង Micro USB, microSD និង microSDHC

2017-08-31 04:08:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាក្យបច្ចេកទេស ៣ ផ្ដើមដោយ Micro ធ្វើឲ្យអ្នកប្រើប្រាស់ស្មាតហ្វូនមួយចំនួនធំមានការភ័ន្តច្រឡំនិងខ្លះទៀតនៅមិនទាន់ដឹងច្បាស់អំពីអត្ថន័យរបស់វានៅឡើយ។ ថ្ងៃនេះ Sabay ធ្វើការពន្យល់អំពីនិយមន័យនិងអត្ថប្រយោជន៍ប្រើប្រាស់រវាងពាក្យ Micro USB, microSD និង microSDHC។

១.Micro USB

USB មានពាក្យពេញ Universal Serial Bus ជាប្រព័ន្ធនៃរន្ធដោតតភ្ជាប់ទៅកាន់ឧបករណ៍អេឡិចត្រូនិកជាច្រើនដូចជា ស្មាតហ្វូន, ម៉ាស៊ីនចាក់ MP3, ឧបករណ៍ GPS, ឧបករណ៍ Print រូបភាពនិងឌីជីថលកាមេរ៉ា។ ផ្ដោតទៅលើស្មាតហ្វូន យើងនិយមលឺតែ ២ ប៉ុណ្ណោះ គឺ Micro USB និង USB Type C ដែលប្រភេទ C ទើបតែលេចចេញកាលពីប៉ុន្មានឆ្នាំចុងក្រោយ វាខុសគ្នានឹង Micro USB ត្រង់ល្បឿននៃការផ្ទេរទិន្នន័យនិងល្បឿនសាកបញ្ចូលថ្ម។

ទូរសព្ទដែលគាំទ្រ USB Tpye C មិនអាចប្រើខ្សែ Micro USB ទៅដោតបានឡើយ។ ពពួកស្មាតហ្វូនទំនើបបច្ចុប្បន្នមានគាំទ្រ USB C រួមមានម៉ូដែល Galaxy Note 8, Galaxy S8 និង Mate 9 Pro។

២.microSD

បង្កើតឡើងដោយក្រុមហ៊ុន SanDisk ប្រកាសជាសាធារណៈនៅថ្ងៃទី ១៣ កក្កដា ឆ្នាំ ២០០៥។ ដំបូងឡើយមានឈ្មោះ T-Flash បន្ទាប់មក TransFlash ទើបចុងក្រោយបង្អស់ប្រែជា microSD។ ជាប្រភេទអង្គចងចាំខាងក្រៅដែលអាចដោះដូរបាន និងផ្ទុកទៅដោយទិន្នន័យតាមទំហំ។

ជាធម្មតាវាមានវិមាត្រតួខ្លួន ១៥មមx១១មមx១មម ទំហំប្រហែលប៉ុនម្រាមកូនដៃ។ ប្រភេទទំហំ 16MB និង 32MB រាប់បញ្ចូលជា TransFlash ប៉ុន្តែពី 64MB ឡើងដល់ 32GB យើងហៅថា microSD។

៣.microSDHC

microSDHC និង microSDXC ជាប្រភេទ microSD Card ជំនាន់ថ្មីចុងក្រោយបង្អស់ ដែលក្រុមហ៊ុន SanDisk ប្រកាសដាក់បង្ហាញនៅខែ**កុម្ភៈ ឆ្នាំ ២០១៤**។ ចន្លោះពី 4GB ទៅ 64GB យើងហៅថា microSDHC រីឯ microSDXC រាប់ពីទំហំ 8GB ទៅ 256GB។ អ្នករមែងឃើញអក្សរតំណាងទាំងនេះ លើបន្ទះនៃកាត microSD ទាំងនោះ បើអ្នកទិញរបស់ដែលមានស្លាកយីហោច្បាស់លាស់។

ល្បឿនផ្ទេរនៃពពួក SDHC លឿនជាង SD ធម្មតា ប៉ុន្តែចំពោះឧបករណ៍ណាដែលកំណត់ការប្រើថាគាំទ្រ mciroSDHC វាអាចចាប់ស្គាល់ទាំង microSDHC និងកាតជំនាន់ចាស់ microSD ផ្ទុយទៅវិញករណីបើឧបករណ៍នោះដាក់ថាគាំទ្រតែ microSD នោះវាមិនអាចចាប់ស្គាល់ microSDHC បានឡើយ លើកលែងតែគេបញ្ជាក់ពីទំហំផ្ទុកបន្ថែម ឧទាហរណ៍ដល់ 256GB អ្វីជាដើម។

ប្រភព៖ Wikipedia ប្រែសម្រួល៖ កៅ រក្សា