ទម្លាប់អាក្រក់ ៧ យ៉ាងដែលធ្វើឲ្យ iPhone អ្នកខូចដោយមិនដឹងខ្លួន

2017-09-02 02:35:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ខណៈដែល iPhone ជាទូរសព្ទដែលមានតម្លៃថ្លៃ អ្នកប្រើប្រាស់គួរតែប្រុងប្រយ័ត្នក្នុងការប្រើប្រាស់ឲ្យបានម៉ត់ចត់។ ថ្ងៃនេះ Sabay បង្ហាញពីទម្លាប់អាក្រក់ទាំង ៧ យ៉ាង ដែលកំពុងធ្វើឲ្យ iPhone របស់អ្នកខូចឬមានបញ្ហាដោយមិនដឹងខ្លួន។

១.ការ Jailbreak iPhone:

ពិតណាស់ការ Jailbreak អាចឲ្យអ្នកមានសិទ្ធដំឡើងកម្មវិធីច្រើន លើសពីអ្វីដែល Apple បានកំណត់។ ប៉ុន្តែអ្នកត្រូវដឹងថា រាល់ពេលដែលអ្នក Jailbreak ឧបករណ៍នោះនឹងលែងមានប្រព័ន្ធសុវត្ថិភាពការពារចេញពី Apple ទៀតហើយ។ កាន់តែជាបញ្ហា ពេលខ្លះទិន្នន័យក្នុងទូរសព្ទដូចជារូបភាព, បញ្ជីឈ្មោះទូរសព្ទនិងឯកសារសំខាន់ផ្សេងៗ Hacker ក៏អាចលួចចំលងយកទៅបានដោយងាយ។

២.ធ្វើឲ្យ iPhone ធ្លាក់:

អ្នកអាចគិតថាជារឿងធម្មតា ពេលដែល iPhone ធ្លាក់ហើយមិនបែកអេក្រង់ ក៏មិនខ្វាយខ្វល់ពីវា។ ប៉ុន្តែអ្នកមិនបានដឹងពីភាពចុះអន់ថយនៃផ្នែកគ្រឿងខាងក្នុងម៉ាស៊ីនឡើយ។ ចូរមានការប្រុងប្រយ័ត្នខ្ពស់ ជៀសវាងកុំឲ្យ iPhone របស់អ្នកធ្លាក់ជាញឹកញយពេក។

៣.ការប្រើនៅកន្លែងមានចំហាយទឹក:

ដូចជាអំឡុងពេលងូតទឹក, លានរថយន្តឬម៉ូតូ បើអ្នកទម្លាប់ចុចប្រើទូរសព្ទក្បែរទីតាំងទាំងនោះ វាក៏រឿងអាក្រក់មួយដែរ។ ទោះបីទឹកមិនហូរចូលទាំងដុលទៅក្នុង iPhone ផ្ទុយទៅវិញរំភាយនៃចំហាយទឹកបានសាយភាយចូលទៅក្នុងគ្រឿងក្នុងនៃទូរសព្ទម្ដងបន្តិចៗ ដែលយើងមិនអាចដឹងច្បាស់ថាថ្ងៃណាមួយនឹងជួបបញ្ហាពិតប្រាកដ។

៤.មិនដែលបិទគ្រឿងទូរសព្ទ:

អ្នកខ្លះប្រើ iPhone យូរឆ្នាំ តែមិនធ្លាប់បិទគ្រឿង ឬ restart ម៉ាស៊ីនសូម្បីតែម្ដង។ បញ្ហានៃទម្លាប់មិនល្អមួយនេះ អាចបណ្ដាលឲ្យទូរសព្ទយើងដើរយឺត, មិនបានសំអាត RAM និងអាចធ្វើឲ្យថ្មមិនសូវកាន់។ យល់ល្អក្នុងមួយសប្ដាហ៍ម្ដង អ្នកគួរបិទទូរសព្ទ iPhone ចោលឲ្យបានរយៈពេល ៣០ នាទី។

៥.ការប្រើឧបករណ៍សំអាតមិនត្រឹមត្រូវ:

ត្រឹមកូនក្រណាត់ទន់តូចមួយសម្រាប់ជូតតួខ្លួននិងអេក្រង់ វាជារឿងល្អបំផុតហើយ។ ប៉ុន្តែបើអ្នកទម្លាប់ប្រើទឹកបាញ់កញ្ចក់យកមកផ្ដិតជូតលើអេក្រង់ ពេលខ្លះឆាប់ធ្វើឲ្យគុណភាព Screen Protector បិទជាប់អេក្រង់ ឆាប់ចុះអន់ថយគុណភាពទៅវិញទេ ព្រោះវាមានផ្ទុកនូវសារធាតុគីមីបង្កប់ខាងក្នុងទឹក។

៦.ការប្រើ iPhone នៅទីតាំងក្ដៅជ្រុល:

ការទម្លាប់ទុកទូរសព្ទចោល ក្រោមពន្លឺព្រះអាទិត្យឬទុកក្នុងរថយន្តដែលចតចោលអំឡុងថ្ងៃក្ដៅ ក៏ជារឿងដែលអ្នកមិនគួរធ្វើ។ អ្នកគួរទុកឬប្រើ iPhone នៅទីតាំងដែលមានអាកាសធាតុសមល្មមមិនក្ដៅពេក មិនត្រជាក់ពេក ជៀសវាងមានបញ្ហាត្រង់ប្រការណាមួយកើតឡើង។

៧.ប្រើឆ្នាំងសាកក្លែងក្លាយ:

ឧបករណ៍ឆ្នាំងនិងខ្សែសាកក្លែងក្លាយ ខុសពីឧបករណ៍ Original របស់ក្រុមហ៊ុន Apple ក្នុងករណីខ្លះក៏អាចបង្កជាបញ្ហាធ្ងន់ធ្ងរសម្រាប់ iPhone ដូចគ្នា។ ផ្អែកតាមជាងជួសជុលឧបករណ៍អេឡិចត្រូនិកមួយចំនួននៅក្រៅស្រុក បានប្រាប់ឲ្យដឹងថាការប្រើឧបករណ៍សាកក្លែងក្លាយ អាចធ្វើឲ្យបន្ទះម៉ាស៊ីននិងផ្នែកផ្សេងទៀត ឆាប់ឆ្លងនិងខូចបានយ៉ាងងាយ។

សរុបមក ចំណុចទាំងនេះ ជាទម្លាប់អាក្រក់ដែលអ្នកគួរតែបោះបង់ចោល កុំវ៉ក់នឹងការចុចវាគ្រប់ពេលវេលា ព្រោះវាអាចឲ្យ iPhone ឆាប់ខូច ហើយអ្នកទៅជាមនុស្សដែលអត់ទូរសព្ទមិនបានផងដែរ៕

ចុចអានអត្ថបទបន្ត៖

ប្រភព៖ idropnews ប្រែសម្រួល៖ កៅ រក្សា