ផ្លូវការ! ចៅស្រីអធិរាជជប៉ុន ប្រកាសបោះបង់សែរាជវង្ស រៀបអភិសេកជាមួយបុរសសាមញ្ញ

2017-09-04 03:24:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រះនាង Mako ដែលជាចៅស្រីច្បងរបស់អធិរាជ អាគីហ៊ីតូ និងអធិរាជិនី មីឈីកូ នឹងរៀបអភិសេកជាមួយអតីតមិត្តរួមថ្នាក់សាកលវិទ្យាល័យនៅឆ្នាំ ២០១៨។ នេះបើតាមភ្នាក់ងារ Imperial Household បានប្រកាសឲ្យដឹងនៅថ្ងៃអាទិត្យ ម្សិលមិញ។

ព្រះនាង និងគូដណ្ដឹងលោក Kei Komuro អ្នកទាំងពីរមានអាយុ ២៥ឆ្នាំដូចគ្នា បានរៀបរាប់ទំនាក់ទំនងរបស់ពួកគេថា រ៉ូមែនទិកខ្លាំងណាស់ប្រៀបដូចព្រះអាទិត្យ និងព្រះចន្ទ គឺមិនអាចខ្វះមួយណាបាន។

"ពេលរួមរស់ជាមួយលោក Komuro ខ្ញុំចង់ធ្វើឲ្យគ្រួសារខ្ញុំកក់ក្ដៅ ស្ងប់ស្ងាត់ និងពោរពេញទៅដោយស្នាមញញឹម"។ ព្រះនាង Mako បានថ្លែងក្នុងសន្និសីទសារព័ត៌មាននៅទីក្រុងតូក្យូ ក្រោយពីព្រះចៅអធិរាជ បានយល់ព្រមជាផ្លូវការនូវពិធីភ្ជាប់ពាក្យនៅព្រឹកថ្ងៃអាទិត្យម្សិលមិញ។ "ស្នាមញញឹមរបស់គាត់ដូចជាពន្លឺព្រះអាទិត្យ បានអន្ទងចិត្តខ្ញុំ"។ ព្រះនាងបន្ត។

ឯលោក Komuro និយាយថា "ខ្ញុំចង់មានគ្រួសារមួយដែលស្ងប់ស្ងាត់ និងសន្តិភាពដូចគ្នា"។ ចំណែកពិធីរៀបការគ្រោងនឹងប្រារព្ធធ្វើនៅឆ្នាំក្រោយហើយ។ នេះបើតាមប្រភពដដែល។

ការប្រកាសខាងលើ ដំបូងគ្រោងធ្វើនៅថ្ងៃទី ៨កក្កដា ប៉ុន្តែគូស្នេហ៍នេះសម្រេចពន្យារពេលដោយសារតែភ្លៀងធ្លាក់ខ្លាំងបណ្ដាលឲ្យកើតមានទឹកជំនន់តំបន់ Kyushu កាលពីខែកក្កដា។

គួររម្លឹកថា ព្រះនាង Mako បានជួបលោក Komuro ពេលរៀនឆ្នាំទីមួយនៅសាកលវិទ្យាល័យគ្រីស្ទានអន្តរជាតិ (International Christian Universiy) ក្នុងទីក្រុងតូក្យូ។ ពួកគេចាប់ផ្ដើមស្និតស្នាលក្នុងឆ្នាំ ២០១២ អំឡុងពេលចូលរួមបទបង្ហាញកម្មវិធីសិក្សានៅបរទេស។

ក្នុងកម្មវិធីផ្លាស់ប្ដូរនិស្សិត (Exchange Program) ពេលនោះ ព្រះនាង Mako កំពុងសិក្សានៅសាកលវិទ្យាល័យ University of Edinburgh នៅអង់គ្លេស ខណៈលោក Komuro សិក្សានៅសាកលវិទ្យាល័យ University of California រដ្ឋ Los Angeles សហរដ្ឋអាមរិក។ លោក Komuro និយាយថា ពួកគាត់បានណាត់ជួបគ្នាមុនពេលបេសកកម្មទៅបរទេស។

ទោះជាកន្លែងសិក្សាឆ្ងាយពីគ្នាក៏ពួកគេបន្តទាក់ទងគ្នា រហូតទំនាក់ទំនងកាន់តែស៊ីជម្រៅ។ ក្នុងខែធ្នូ ឆ្នាំ ២០១៣ លោក Komuro ធ្លាប់សុុំរៀបការដោយនិយាយថា "នៅពេលអនាគត យើងរៀបការនឹងគ្នាបានទេ?”

យោងទៅតាមច្បាប់របស់អធិរាជ Imperial House Law ព្រះនាង Mako ជាបុត្រីច្បងព្រះអង្គម្ចាស់ អាគីហ៊ីណូ និងម្ចាស់ក្សត្រី គីកូ នឹងត្រូវបោះបង់ខ្សែរាជវង្ស ដើម្បីរៀបអភិសេកនឹងរាស្ត្រសាមញ្ញ។ ព្រះនាងនឹងត្រូវចុះឈ្មោះជាពលរដ្ឋធម្មតា ផ្ដល់សិទ្ធិឲ្យដូចរាស្ត្រទូទៅ និងសិទ្ធិបោះឆ្នោតទៀតផង។

បន្ទាប់ពីបញ្ចប់ការសិក្សាពី ICU ក្នុងឆ្នាំ ២០១៤ ព្រះនាង Mako បានបញ្ចប់ថ្នាក់អនុបណ្ឌិតផ្នែកសារមន្ទីរសិល្បៈ និងវិចិត្រសាល នៅសាកលវិទ្យាល័យ Leicester ក្នុងប្រទេសអង់គ្លេស។ បច្ចុប្បន្ន ជាអ្នកស្រាវជ្រាវនៅសារមន្ទីរមួយក្នុងសាកលវិទ្យាល័យតូក្យូ។

ចំណែក លោក Komuro ធ្វើការក្នុងក្រុមហ៊ុនច្បាប់ ចាប់តាំងពីកំពុងសិក្សាផ្នែកច្បាប់ពាណិជ្ជកម្មនៅសាកលវិទ្យាល័យ Hitotsubashi។ គាត់រស់នៅជាមួយម្ដាយមេម៉ាយ និងជីតានៅតំបន់ Yokhama។ ក្នុងឆ្នាំ ២០១០ គាត់បម្រើការជាអ្នកផ្សព្វផ្សាយទេសចរណ៍ឲ្យទីក្រុង Fujisawa តំបន់ Kanagawa រហូតគាត់មានងារជា Prince of the Sea ផងដែរ៕