ក្លឹប Man Utd គ្រោងបើកការចរចាកុងត្រាថ្មីជាមួយលោក Mourinho
- 2017-09-08 11:31:46
- ចំនួនមតិ 0 | ចំនួនចែករំលែក 0
ក្លឹប Man Utd គ្រោងបើកការចរចាកុងត្រាថ្មីជាមួយលោក Mourinho
ចន្លោះមិនឃើញ
អ្នកចាត់ការទូទៅក្លឹបបិសាចក្រហម Manchester United លោក Jose Mourinho ត្រូវបានគេរំពឹងទុកថានឹងបើកការចរចាកុងត្រាថ្មីជាមួយក្លឹបមួយនេះក្នុងខែវិច្ឆិកាចុងឆ្នាំនេះ នេះបើតាមសារព័ត៌មានអង់គ្លេស Telegraph។
ការផ្ដល់ ឬមិនផ្ដល់កុងត្រាថ្មីទៅលើលោក Mourinho គឺវាអាស្រ័យការលើការលេងរបស់ក្លឹបបិសាចក្រហមក្នុងរដូវកាលថ្មីនេះ ប៉ុន្តែក្លឹបជើងឯកលីគកំពូល២០សម័យមួយនេះ គ្រោងបើកការចរចារឿងកុងត្រាថ្មីនេះឲ្យបានក្នុងខែវិច្ឆិកាឆ្នាំនេះ ដើម្បីធានាបានថាកុងត្រាថ្មីរបស់អ្នកចាត់ការទូទៅសញ្ជាតិព័រទុយហ្គាល់រូបនេះអាចសម្រេចបានយ៉ាងរលូន មុនពេលកុងត្រាចាស់របស់លោក Mourinho ចូលដល់ឆ្នាំចុងក្រោយរបស់ខ្លួន បើសិនជាលោកបន្តដឹកនាំបានជោគជ័យនារដូវកាលថ្មីនេះ។ លោក Jose Mourinho បានចូលរួមជាមួយក្លឹប Manchester United កាលពីរដូវកាលមុន ហើយបានចុះកុងត្រា ៣ឆ្នាំជាមួយក្លឹប ហើយនេះជាឆ្នាំទី២ នៃកុងត្រារបស់លោកហើយ។
ទោះជាយ៉ាងណា កាលពីពេលថ្មីៗនេះ បុរសព័រទុយហ្គាល់វ័យ ៥៤ឆ្នាំរូបនេះ បាននិយាយប្រាប់សារព័ត៌មានថា ខ្លួនមិនបានគិតពីការទាមទារក្នុងការចុះកុងត្រាថ្មីជាមួយក្លឹបបិសាចក្រហមនោះឡើយ។ លោក Mourinho បានបន្តទៀតថា៖ "ខ្ញុំមិនត្រូវការកុងត្រាថ្មីដើម្បីធ្វើការឲ្យអស់ពីសមត្ថភាពខ្ញុំទេ"។ លោកបានព្រលយទៀតថា៖ "ខ្ញុំអាចនិយាយបានថា ខ្ញុំចង់ដឹកនាំក្លឹបនេះជាច្រើនឆ្នាំទៀតតទៅមុខទៀត"។
គួរបញ្ជាក់ផងដែរថា លោក David Moyes និងលោក Louis van Gaal ដែលជាអ្នកចាត់ការទូទៅរបស់ក្លឹបយក្សអង់គ្លេសមួយនេះ មុនលោក Mourinho មិនបានដឹកនាំក្លឹបរហូតដល់ចប់កុងត្រាខ្លួនត្រឹមត្រូវនោះទេ ដោយលោក Moyes ត្រូវបានបណ្ដេញចេញក្លឹប ក្រោយពីដឹកនាំបាន ១១ខែ ខណៈលោក Van Gaal អស់តំណែងនេះ ក្រោយដឹកនាំបានពីររដូវកាល។ តាំងពីក្លាយជាអ្នកចាត់ការទូទៅរបស់ក្លឹបបិសាចក្រហម លោក Jose Mourinho បានជួយឲ្យក្លឹបលើកពាន ៣ក្នុងរដូវកាលដំបូងរបស់ខ្លួន គឺ Community Shield, League Cup និង Europa League៕