ថ្ងៃនេះ ១៦ឆ្នាំមុន យន្តហោះបុកអគារពាណិជ្ជកម្មពិភពលោក ផ្ដាច់ជីវិតជិត ៣ពាន់នាក់

2017-09-11 01:57:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ហេតុការណ៍ដ៏រន្ធត់ ថ្ងៃ១១ កញ្ញា ២០០១
ភេរវជនអាល់កៃដា បញ្ជាយន្តហោះទៅបុកអគារពាណិជ្ជកម្មធំពីរ
ប្រល័យជីវិតមនុស្សអស់ ២៩៧៧នាក់

ថ្ងៃទី ១១ ខែកញ្ញានេះ គឺជាខួបទឹកភ្នែកលើកទី១៦ នៃសាច់ញាតិជនរងគ្រោះទាំងឡាយ ដែលបានបាត់បង់ជីវិតនៅក្នុងសោកនាដកម្មវាយប្រហារអគារពាណិជ្ជកម្មពិភពលោក (World Trade Center)។ នៅថ្ងៃទី ១១ កញ្ញា ឆ្នាំ២០០១ ក្រុមភេរវជនអាល់កៃដា បានបញ្ជាយន្តហោះដឹកអ្នកដំណើរពីរគ្រឿងទៅបុកអគារពាណិជ្ជកម្មធំពីររបស់សហរដ្ឋអាមេរិក បណ្ដាលឲ្យមនុស្សជិត ៣ពាន់នាក់បាត់បង់ជីវិត។

ហេតុការណ៍នោះគឺជាទុក្ខសោកធំបំផុតរបស់ពិភពលោក ចាប់តាំងពីចប់សង្គ្រាមលោកលើកទី២ និងប្រល័យជីវិតមនុស្សអស់ ២៩៧៧នាក់។ ផ្សែងខ្មួលខ្មាញ់បានបាចសាចចេញពីអគារក្រោយពេលយន្តហោះបើកបុកគួរឲ្យរន្ធត់។ មិនយូរប៉ុន្មាន អគារទាំង២នោះបានដួលរលំគ្របយកជីវិតមនុស្សជាច្រើន រួមទាំងប៉ូលិស និងមន្ត្រីពន្លត់អគ្គីភ័យដែលព្យាយាមចូលទៅជួយសង្គ្រោះ។ ទន្ទឹមនឹងនេះ ក្រុមភេរវជនក៏បានបញ្ជាយន្តហោះទៅបុកអគារទីបញ្ជាការបង់តាហ្គោនជាមូលដ្ឋានទ័ពដ៏សំខាន់របស់សហរដ្ឋអាមេរិក។ ចំណែកឯយន្តហោះមួយគ្រឿងទៀតបានធ្វើដំណើរឆ្ពោះទៅបុកកម្ទេចអគារសំខាន់ៗរបស់រដ្ឋាភិបាលនៅទីក្រុងទីក្រុងវ៉ាស៊ីនតោន ប៉ុន្តែបានធ្លាក់កណ្ដាលផ្លូវ ដោយសារមានការតដៃពីក្រុមអ្នកដំណើរនៅលើយន្តហោះ។ សោកនាដកម្មនោះបានធ្វើឲ្យខូចខាតសេដ្ឋកិច្ចអាមេរិករាប់ពាន់លានដុល្លារ រីឯការសម្អាតសំណល់អគារបានប្រព្រឹត្តទៅអស់ពេលជិតមួយឆ្នាំ ដោយចំណាយទឹកប្រាក់អស់ ៧៥០ លានដុល្លារ៕