សល់ប៉ុន្មានថ្ងៃទៀតភ្ជាប់ពាក្យ បែរជាមិត្តស្រីស្លាប់ តែកូនកំលោះធ្វើរឿងភ្ញាក់ផ្អើលមួយ

2017-09-11 08:10:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ការផ្ដាច់ទំនាក់ទំនងចេញពីមនុស្សខ្លួនកំពុងស្រលាញ់ គឺជារឿងឈឺចុកចាប់ និងពិបាកឆ្លងកាត់បំផុតមួយក្នុងជីវិតមនុស្សទូទៅ។

ឯការបាត់បង់ជីវិតគូស្នេហ៍ដែលកំពុងតែពេញស្រលាញ់ រឹតតែជារឿងទុក្ខសោកធ្ងន់មួយកម្រិតទៀត ជាពិសេសនៅពេលពួកគេទាំងពីរនាក់បន្សល់ទុកនូវពាក្យសន្យាមិនទាន់បានធ្វើ។ គូស្នេហ៍ជនជាតិតៃវ៉ាន់មួយគូ បានធ្វើឲ្យមនុស្សជាច្រើនរំជួលចិត្ត និងអាណិតអាសូរយ៉ាងខ្លាំង បន្ទាប់ពីគេដឹងថា បានព្រាត់គ្នា ខណៈសល់តែប៉ុន្មានថ្ងៃទៀតចូលដល់ថ្ងៃរៀបការហើយនោះ។

កូនកំលោះមានឈ្មោះ Tsai អាយុ ៣០ឆ្នាំ សន្យានឹងរៀបការជាមួយមិត្តស្រីអាយុ ២៣ឆ្នាំឈ្មោះ Chen កំពុងមានផ្ទៃពោះ ក្រោយបង្កើតទំនាក់ទំនងផ្អែមល្ហែមជាង ៥ឆ្នាំ។ ពួកគេតែងតែសុបិនចង់បង្កើតគ្រួសារដ៏មានសុភមង្គលមួយរួមគ្នានាពេលអនាគត។

អ្នកទាំងពីរបានកំណត់ថ្ងៃធ្វើពិធីភ្ជាប់ពាក្យរួចហើយ បន្ទាប់ពីបុណ្យ Hungry Ghost Festival (ដូចបុណ្យភ្ជុំបិណ្ឌខ្មែរដែរ)។ ប៉ុន្តែនៅថ្ងៃទី ២៦សីហា នាងជាមិត្តស្រីមិនបានត្រលប់មកផ្ទះដូចសព្វដងទេ ក្រោយចេញពីធ្វើការ។ លោក Tsai បានចេញតាមស្វែងតាមផ្លូវដែលនាងធ្លាប់ធ្វើដំណើរ ក៏ប្រទះឃើញម៉ូតូរបស់នាងដេកដួលនៅជាយផ្លូវ។

បន្តិចក្រោយមក មានគេទូរសព្ទប្រាប់ថា មិត្តស្រីរបស់គាត់បានបាត់បង់ជីវិតហើយទាំងកូនក្នុងផ្ទៃ ដោយសារជួបគ្រោះថ្នាក់ចរាចរណ៍ រងរបួសក្បាលធ្ងន់ធ្ងរ។ ដោយសារតែ Tsai សន្យាភ្ជាប់ពាក្យ និងរៀបការជាមួយនាង នៅពិធីបុណ្យសពរបស់ Chen បានក្លាយទៅជាពិធីភ្ជាប់ពាក្យទាំងទឹកភ្នែក។

ក្នុងពិធីគេឃើញបដាពណ៌ផ្កាឈូកដ៏ធំមួយបានសរសេរថា «យើងភ្ជាប់ពាក្យ»។ ទាំងគ្រួសារ សាច់ញាតិបងប្អូន និងមិត្តភ័ក្ដិបានចូលរួមទាំងក្ដុកក្ដួល។ លោក Tsai បានដាក់កម្រងផ្កាមឈូសរបស់នាង និងទម្លាក់ចិញ្ចៀនមាសទៅលើមឈូសរបស់នាងទៀតផង។

បន្ទាប់ពីចប់ពិធី លោក Tsai បានបង្ហោះសារនៅលើបណ្ដាញសង្គមហ្វេសប៊ុកអមជាមួយរូបថតថា "ប្រពន្ធសម្លាញ់ បងរង់ចាំអូនបង្ហាញខ្លួនក្នុងសុបិនរបស់បងយប់នេះ"៕