ត្រួសៗពីអាជីវកម្មបច្ចេកវិទ្យាតាមប្រទេសមួយចំនួនក្បែរកម្ពុជា

2017-09-11 09:40:51
ចំនួនមតិ 0 | ចំនួនចែករំលែក 0

ចន្លោះមិនឃើញ

អាស៊ានបានក្លាយជាតំបន់ដែលមានការវិវត្តយ៉ាងរហ័សផ្នែកអាជីវកម្មគ្រប់ប្រភេទ ហើយសូម្បីតែក្នុងវិស័យបច្ចេកវិទ្យាក៏មានការរីកចម្រើនមិនចាញ់ប្លុកប្រទេសមហាអំណាចនៅលោកខាងលិចផងដែរ។

ឥណ្ឌូណេស៊ី នឹងក្លាយជាប្រទេសទីមួយក្នុងតំបន់អាស៊ានដែលមានក្រុមហ៊ុនបច្ចេកវិទ្យាក្នុងស្រុកកើតចេញពីគម្រោងអាជីវកម្មបង្កើតថ្មី (Startup) មានលទ្ធភាពបោះផ្សាយមូលបត្រ (ប័ណ្ណភាគហ៊ុន) ដែលតម្លៃប្រមាណ ៣,៤ លានដុល្លារ។ ក្រុមហ៊ុននោះគឺ Kioson ដែលជាផ្សារទំនិញអេឡិចត្រូនិកទិញលក់តាមប្រព័ន្ធអ៊ីនធឺណិតក្នុងប្រទេសឥណ្ឌូណេស៊ី។ កាន់តែពិសេសសម្រាប់ឥណ្ឌូណេស៊ី គឺ Nokia នឹងដំណើរការរោងចក្រដំឡើងស្មាតហ្វូនរបស់ខ្លួននៅលើកោះ Batam របស់ឥណ្ឌូណេស៊ីនេះតែម្ដង។

សិង្ហបុរី ដែលរដ្ឋាភិបាលប្រទេសនេះ ទើបសហការជាមួយ Razer ជាក្រុមហ៊ុនបច្ចេកវិទ្យាឈានមុខមួយក្នុងវិស័យកីឡាអេឡិចត្រូនិក (Esport) ជុំវិញពិភពលោកដើម្បីផលិតបច្ចេកវិទ្យាទូទាត់សាច់ប្រាក់ទំនើបតាមប្រព័ន្ធអ៊ីនធឺណិតឲ្យកាន់តែមានជឿនលឿនសម្រាប់ប្រជាជនសិង្ហបុរី។

ម៉ាឡេស៊ី មានក្រុមហ៊ុនថ្មីមួយដែលកើតចេញពីគម្រោងអាជីវកម្មបង្កើតថ្មី (Startup) ជាមួយកញ្ចប់ទឹកប្រាក់ ២៣៥ លានដុល្លារឈ្មោះថា MDV ដែលផ្ដោតលើការផលិតបច្ចេកវិទ្យា AR, VR, AI និងការបោះពុម្ព 4D ជាដើម។ លើសពីនេះ សេវាកម្មជួលកង់បែបទំនើបរបស់ចិន Mobike និងសេវារថយន្តតាក់ស៊ី Uber របស់អាមេរិកក៏កំពុងប្រជែងយកទីផ្សារក្នុងប្រទេសសម្បូរប្រេងប្រចាំអាស៊ាន និងមានប្រជាជនជាង ៣០ លាននាក់នេះផងដែរ។

ថៃ មានក្រុមហ៊ុនបច្ចេកវិទ្យាថ្មីមួយដែលទើបបង្កើតដោយគម្រោងអាជីវកម្មបង្កើតថ្មី (Startup) ឈ្មោះ Event Pop ដែលរកបានប្រមាណ ២ លានដុល្លារក្រោយបង្កើតបាន ២ ឆ្នាំ ហើយ Event Pop ផ្ដល់សេវាទិញ និងកក់សំបុត្រចូលកម្មវិធីនានាតាមប្រព័ន្ធអ៊ីនធឺណិតក្នុងប្រទេសថៃ។

មីយ៉ាន់ម៉ា បានក្លាយជាគោលដៅវិនិយោគយ៉ាងមានសក្ដានុពលសម្រាប់សហគ្រិនវិស័យបច្ចេកវិទ្យា។ ថ្មីៗក្រុមហ៊ុនមួយទើបបង្កើតក្នុងប្រទេសនេះដោយគម្រោងអាជីវកម្មបង្កើតថ្មី (Startup) ជាមួយកញ្ចប់ថវិកាប្រមាណ ៥០ ម៉ឺនដុល្លារឈ្មោះ Bindez ដែលផ្ដល់សេវាវិភាគ គ្រប់គ្រងមាតិកាបណ្ដាញសង្គម និងសេវាស្វែងរកកម្មវិធីព័ត៌មានសម្រាប់សារព័ត៌មានក្នុងស្រុក៕