ប្លែកណាស់កម្មវិធីមួយនេះតម្រូវឲ្យអ្នកដើរម៉ូដតុបតែងខ្លួនដូចប្រេត
- 2017-09-14 02:45:34
- ចំនួនមតិ 0 | ចំនួនចែករំលែក 0
ប្លែកណាស់កម្មវិធីមួយនេះតម្រូវឲ្យអ្នកដើរម៉ូដតុបតែងខ្លួនដូចប្រេត
ចន្លោះមិនឃើញ
ក្នុងសន្និសីទសារព័ត៌មានស្ដីអំពី "ភ្ជុំមហាគ្រួសារខ្មែរ" ម្សិលមិញនេះនៅផ្សារ Jet's Container ធ្វើឡើងក្នុងគោលបំណងដើម្បីអបអរសាទរបុណ្យភ្ជុំបិណ្ឌដែលជាបុណ្យប្រពៃណីជាតិខ្មែរ តាំងពីដូនតាមក។ ប៉ុន្តែអ្វីដែលប្លែកអ្នកចូលរួមក្នុងកម្មវិធី និងអ្នកដើរបង្ហាញម៉ូដត្រូវតុបតែងខ្លួនដូចប្រេត។
លោក ប៉ានី វិរៈរិទ្ធ ជាប្រធានផ្នែកផលិតកម្មវិធីប្រចាំក្រុមហ៊ុន Clip Media បានលើកឡើងថា ដោយសារតែអំឡុងពេលនេះជារដូវកាលភ្ជុំបិណ្ឌ ទើបរូបលោកនិងក្រុមហ៊ុន២ ផ្សេងទៀតចាប់ដៃគ្នាបង្កើតកម្មវិធី "ភ្ជុំមហាគ្រួសារខ្មែរ" នេះឡើងក្នុងគោលបំណងដើម្បីឲ្យបងប្អូនប្រជាពលរដ្ឋខ្មែរបានលេងកម្សាន្តមុនពេលត្រឡប់ទៅជួបជុំគ្រួសារនៅស្រុកកំណើត។
ប្រធានផ្នែកផលិតកម្មវិធីខាងលើបន្តថា ក្នុងកម្មវិធី "ភ្ជុំមហាគ្រួសារខ្មែរ" នេះដែរមានលក្ខណៈស្រដៀងទៅ នឹងបុណ្យ Halloween ព្រោះភ្ញៀវ តារាចម្រៀង Original Song និងអ្នកដើរម៉ូដតម្រូវឲ្យតុបតែងមុខមាត់ដូចប្រេត។
លោកថា៖"តែទោះបីជាភ្ញៀវដែលមិនបានតុបតែងមុខមាត់ដូចប្រេត បើសិនជាពួកគាត់ចង់ចូលរួម ពួកគាត់អាចចូលរួមបានដូចគ្នា ព្រោះកម្មវិធីនេះយើងអត់លក់សំបុត្រនោះទេ ផ្ដល់ជូនឲ្យបងប្អូនទស្សនាបានដោយសេរី"។
ដោយឡែកលោក ឧកញ៉ា ស្រី ចាន់ថន អគ្គនាយកក្រុមហ៊ុន Jet's Container បានមានប្រសាសន៍ថា ព្រឹត្តិការណ៍ដែលរៀបចំឡើងនៅថ្ងៃទី១៦ខាងមុខនេះអត់មានខ្ទង់ចំណាយ ឬ ចំណេញនោះទេ ។ ហើយតារាចម្រៀង Original song ព្រមទាំងតារាសម្ដែងដែលចូលរួមប្រមាណចន្លោះពី ៥០ ទៅ ១០០ នាក់ស្ម័គ្រចិត្តជួយដោយមិនយកកម្រៃឡើយ។
លោកឧកញ៉ា រូបនេះថ្លែងថា៖ "ខ្ញុំសង្ឃឹមថាកម្មវិធីនេះ នឹងមានភ្ញៀវចូលចូលរួមចន្លោះពី ៥០០០នាក់ ទៅ ១០០០០ នាក់ ហើយកម្មវិធីនេះ នឹងទាក់ទាញភ្ញៀវបរទេសឲ្យកាន់តែស្គាល់ ជំនឿនៃបុណ្យភ្ជុំបិណ្ឌ ដែលបន្សល់ទុកតាំងពីជំនាន់ដូនតាមកម្ល៉េះ" ។
គួរបញ្ជាក់ថា កម្មវិធី "ភ្ជុំមហាគ្រួសារខ្មែរ" នឹងប្រព្រឹត្តិទៅនៅថ្ងៃទី ១៦ ខែកញ្ញា ឆ្នាំ ២០១៧ ខាងមុខនេះត្រូវ នឹងបិណ្ឌទី១១ នៅផ្សារ Jet's Container ចាប់ពីវេលាម៉ោង ៧ យប់ដល់ម៉ោង ២ រំលងអាធ្រាត្រឈាន៕