៥ យ៉ាង​ដែល​គ្រប់​គ្នា​កំពុង​លង់​ស្នេហ៍​លើ iPhone X

  • 2017-09-14 04:39:31
  • ចំនួនមតិ

ចន្លោះមិនឃើញ

iPhone X ត្រូវ​បាន​ប្រកាស​បង្ហាញ​ជា​សាធារណៈ​កាល​ពី​យប់​រំលង​អាធ្រាត្រ​ថ្ងៃ​ទី ១២ ហើយ​តម្លៃ​វិញ​ក៏​មិន​ថោក​ដែរ។ ថ្ងៃ​នេះ Sabay បង្ហាញ ៥ ចំណុច​ ដែល​មនុស្ស​ជា​ច្រើន​កំពុង​លង់​ស្នេហ៍​លើ​ទូរសព្ទ​ម៉ូដែល​នោះ។

១.លែង​មាន​ប៊ូតុង Home

កាល iPhone 7 ក្រុមហ៊ុន Apple បាន​ដក​ចោល​រន្ធ​ដោត​កាស ៣,៥ម.ម លុះ​មក​ដល់ iPhone X ក៏​បន្ត​ដក​ប៊ូតុង Home ចេញ ដើម្បី​បំពេញ​ផ្ទៃ​អេក្រង់​ពេញ​របស់​ខ្លួន។ មើល​ទៅ​ស្អាត ហើយ​ការ​ប្រើប្រាស់​ដើម្បី​ចូល​មក​ផ្ទៃ Homescreen ដោយ​គ្រាន់​តែ​អូស​ផ្នែក​អេក្រង់​កណ្ដាល​ពី​ក្រោម​មក​លើ​ជា​ការ​ស្រេច (Swipe Up)។ នេះ​ជា​ស្មាតហ្វូន​នា​ពេល​អនាគត ប៉ុន្តែ​នៅ​រក្សា​ប៊ូតុង​បិទ​បើក​សំឡេង និង​ប៊ូតុង​ Power ដដែល។

២.FaceID ប្រើ​បាន​រហ័ស​និង​ងាយ​ស្រួល

​Apple ដក​ប្រព័ន្ធ​ស្កេន​ខ្ចៅដៃ​ចេញ​ពី iPhone X ជំនួស​ដោយ​បច្ចេកវិទ្យា​ស្កេន​ផ្ទៃ​មុខ FaceID។ តាម​ការ​លេច​លឺ​ឲ្យ​ដឹង​ថា ដោយ​ទោះ​បី​ជា​អ្នក​ពាក់​មួក​នៅ​លើ​ក្បាល​ក្ដី ឲ្យ​តែ​ឃើញ​ផ្ទៃ​មុខ​បន្តិច​គឺ​វា​អាច​ស្កេន​បាន​យ៉ាង​រហ័ស។ មតិ​ភាគ​ច្រើន​ជឿជាក់​ថា​បច្ចេកវិទ្យា​ថ្មី​របស់ Apple អាច​ធ្វើ​បាន​ល្អ​ជាង​ស្មាតហ្វូន​ដទៃ។​

៣.បច្ចេកវិទ្យា​ True Depth Camera

អ្នក​ចូល​ចិត្ត Selfie ទិញ iPhone X មិន​ចោល​លុយ​ឡើយ ខណៈ​វា​បាន​បំពាក់​នូវ​ប្រព័ន្ធ​បច្ចេកវិទ្យា True Depth Camera ដែល​អាច​ស្កេន​ផ្ទៃ​មុខ​បាន​រហ័ស, អាច​ថត​រូប​ព្រាល Portrait សម្រាប់​កាមេរ៉ា​មុខ និង​អាច​បង្កើត​ជា​ទម្រង់ Animoji ឲ្យ​ក្លាយ​ជា​ Emoji រស់​រវើក​តាម​រយៈ​មុខមាត់​និង​សំឡេង​របស់​អ្នក​ប្រើ។​

៤.ថាមពល​ថ្ម​កាន់

Apple បាន​ប្រាប់​ឲ្យ​ដឹង​ថា ថាមពល​ថ្ម​លើ iPhone X នឹង​កាន់​បាន​យូរ​ជាង iPhone 7 ដល់​ទៅ ២ ម៉ោង​ឯ​ណោះ។

៥.មុខងារ​សាក​ថ្ម​ឥត​ខ្សែ

ជា​ការ​ពិត មុខងារ​នេះ​មាន​លើ​ស្មាតហ្វូន Android យូរ​ហើយ ប៉ុន្តែ​វា​ភ្ជាប់​នូវ​បច្ចេកវិទ្យា​ពិសេស AirPower ដែល​អាច​បង្ហាញ​ពី​ថាមពល​សាក​នៃ​ឧបករណ៍​ច្រើន​ក្នុង​ពេល​តែ​មួយ​រួម​មាន Apple Watch និង AirPods ជាដើម។​ នេះ​មាន​ន័យ​ថា​អ្នក​មិន​ពិបាក​ក្នុង​ការ​កាន់​ខ្សែ​ទៅ​វិញ​ទៅ​មក​ដើម្បី​សាក​ទៀត​ឡើយ។​


ប្រភព៖ DigitalTrends ប្រែសម្រួល៖ កៅ រក្សា