មុនទិញស្មាតហ្វូនកាមេរ៉ាភ្លោះ ត្រូវដឹងពីអត្ថប្រយោជន៍និងគុណវិបត្តិជាមុនសិន

2017-09-27 02:16:01
ចំនួនមតិ 0 | ចំនួនចែករំលែក 0

ចន្លោះមិនឃើញ

និយាយពីកាមេរ៉ាភ្លោះលើស្មាតហ្វូន សំដៅដល់ស្មាតហ្វូនដែលមានបំពាក់លែន ២ គ្រាប់ អាចផ្នែកខាងមុខឬខាងក្រោយ មើលទៅស្រដៀងនឹងកែវភ្នែកទាំងទ្វេរបស់មនុស្ស។ ពិតណាស់ក្រុមហ៊ុនចេញស្មាតហ្វូនមានកាមេរ៉ាភ្លោះខាងក្រោយពីរគ្រាប់ដំបូងបង្អស់គឺ HTC ប៉ុន្តែក្រោយមកក៏បានស្ងាត់បាត់ឈឹងអស់រយៈកាលជាង ១ ទសវត្សរ៍រហូតចូលដល់ចុងឆ្នាំ ២០១៦ Apple បានប្រកាសបង្ហាញ iPhone 7 Plus មានបំពាក់នូវបច្ចេកវិទ្យាកាមេរ៉ាភ្លោះខាងក្រោយ ធ្វើឲ្យមានភាពល្បីល្បាញកក្រើកសារជាថ្មី។

ក្រោយៗមកក្រុមហ៊ុនផលិតស្មាតហ្វូន Android ជាច្រើន បានបង្វែរយុទ្ធសាស្ត្រពីស្មាតហ្វូនកាមេរ៉ាមួយគ្រាប់ដំឡើងដល់ ២ គ្រាប់ទៅ ៤ គ្រាប់ ដោយខ្លះមានភ្លោះខាងមុខដូចជា F3 របស់ Oppo និងខ្លះទៀតភ្លោះទាំងសងខាងដូចជា Mate 10 Lite របស់ Huawei ដែលទើបបង្ហាញប៉ុន្មានថ្ងៃនេះ។

Sabay ចែករំលែកទាំងអស់គ្នាឲ្យបានយល់ច្បាស់ពីបច្ចេកវិទ្យាមួយនោះ បន្សំនូវអត្ថប្រយោជន៍និងគុណវិបត្តិដែលអ្នកគួរតែពិចារណាមុនពេលទិញ។

+បម្រែបម្រួលនៃកម្រិតពណ៌ (បច្ចេកវិទ្យាកាមេរ៉ាភ្លោះ)

កាមេរ៉ាមួយគ្រាប់បំពាក់នូវ Sensor RGB សម្រាប់ផ្ដិតយករូបភាពពណ៌ និងមួយគ្រាប់ទៀតបំពាក់ Sensor Monochromatic សម្រាប់ផ្ដិតយកសភាពស-ខ្មៅ។ នៅពេលដែល RGB ផ្ដោតទៅលើរូបភាពពណ៌ អាំងតង់ស៊ីតេកម្រិតពន្លឺនឹងត្រូវបានកាត់បន្ថយ ជាហេតុធ្វើឲ្យ Monochromatic ត្រូវជំនួយចាប់យកអាំងតង់ស៊ីតេនៃពន្លឺឲ្យបានល្អមកវិញ និងភាពមុតស្រួច (Sharpness) នៅចំណុចណាមួយ។

+បម្រែបម្រួលប្រវែងនៃចំណុចប្រសព្វពន្លឺ (បច្ចេកវិទ្យាកាមេរ៉ាភ្លោះ)

ក្រៅពី Sensor ចំនួន ២ ខុសពីស្មាតហ្វូនកាមេរ៉ាមួយ ទូរសព្ទកាមេរ៉ាភ្លោះក៏បានបំពាក់នូវលែនចំនួន ២ គ្រាប់ប្លែកខុសពីគេ។ មួយគ្រាប់ជាប្រភេទលែន Wide-Angle និងមួយគ្រាប់ទៀតជាប្រភេទលែន Telephoto។

លែន Telephoto សំដៅទៅលែនដែលមាន Physical Length ទាបជាងប្រវែងនៃចំណុចប្រសព្វពន្លឺ។ ភាគច្រើនត្រូវបានគេប្រើសម្រាប់ផ្ដិតយកកម្មវត្ថុឃើញច្បាស់និងព្រាលនូវផ្ទៃ Background ខាងក្រោយ។
លែន Wide Angle សំដៅទៅលែនដែលមានប្រវែងនៃចំណុចប្រសព្វពន្លឺទាបជាងពពួកលែនធម្មតា។ ភាគច្រើនត្រូវបានគេប្រើសម្រាប់ថតរូបទេសភាព។

លែន Wide-Angle ជំនួយក្នុងការថតរូបបានទូលាយ ដោយមិនចាំបាច់ប្រើប្រាស់ការថតបែប Panorama។ចំណែកឯលែន Telephoto គាំទ្រមុខងារ Zoom ឲ្យធ្វើបានកាន់តែប្រសើរ។ នៅពេលដែលលែនទាំង ២ ធ្វើការរួមគ្នា យើងអាចទទួលបានរូបភាពដ៏ល្អមួយ ដែលមើលឃើញច្បាស់នូវកម្មវត្ថុនិងរក្សានូវផ្ទៃមុំខាងក្រោយនៅធំទូលាយដដែល។ ខណៈ iPhone 7 Plus បន្ថែមនូវបច្ចេកវិទ្យាទប់លំនឹង OIS អាចធ្វើឲ្យការផ្ដិតយករូបភាពទទួលបានលទ្ធផលកាន់តែប្រសើរជាងដៃគូប្រជែងខ្លួន។

+តើបច្ចេកវិទ្យាកាមេរ៉ាភ្លោះលើស្មាតហ្វូន Apple ដំណើរការទៅបែបណាខ្លះ?

កុំទាន់និយាយដល់ iPhone ឆ្នាំ ២០១៧ យើងលើកបង្ហាញត្រឹម iPhone 7 Plus សិន ដោយបច្ចេកវិទ្យាកាមេរ៉ាភ្លោះរបស់វា ដំណើរការនូវមុខងារពិសេស ២ គឺចាប់យកប្រវែងនៃចំណុចប្រសព្វពន្លឺ (Focal Length) និង Sensor បម្រែបម្រួលពណ៌ (Chromatic Sensor)។

លែន ២ ប្រភេទដោយ Wide-Angle មានទំហំ ២៣ម.ម និងមួយគ្រាប់ទៀត Telephoto មានទំហំ ៥៦ម.ម។ ដោយសារឥទ្ធិពលនៃលែនទាំង ២ នេះ បានធ្វើឲ្យអ្នកនិយមកាន់កាមេរ៉ា DSLR មួយចំនួន បានបោះបង់ហើយបង្វែរមកប្រកាន់ខ្ជាប់នូវកាមេរ៉ាលើ iPhone 7 Plus វិញ។ +តើបច្ចេកវិទ្យាកាមេរ៉ាភ្លោះលើស្មាតហ្វូនLG ដំណើរការទៅបែបណាខ្លះ?

មិនទាន់សំដៅដល់ V30 ដោយជំនួសត្រឹមម៉ូដែល G6 សិន។ ភាពខុសគ្នារវាងបច្ចេកវិទ្យាកាមេរ៉ាភ្លោះនៃ LG និង Apple គឺខុសគ្នាខ្លាំងបំផុត ត្រង់ប្រវែងនៃចំណុចប្រសព្វពន្លឺរបស់លែនដែលពួកគេប្រើប្រាស់។ LG បំពាក់នូវ Sensor បម្រែបម្រួលពណ៌ ២ ប្រភេទលើកាមេរ៉ាភ្លោះទាំង ២ ដែលធ្វើឲ្យរូបភាពផ្ដិតចេញមកផ្ដល់នូវទ្រង់ទ្រាយច្បាស់តាមគែមជុំវិញច្រើន មូលហេតុមកពីការប្រើលែន Wide-Angle ទាំងពីរគ្រាប់។

+តើបច្ចេកវិទ្យាកាមេរ៉ាភ្លោះលើស្មាតហ្វូនOppo ដំណើរការទៅបែបណាខ្លះ?

ក្រុមហ៊ុនផលិតស្មាតហ្វូនជាច្រើន បានសាកល្បងកាមេរ៉ាភ្លោះនៅផ្នែកខាងក្រោយ ខុសតែក្រុមហ៊ុន Oppo សម្រាប់ម៉ូដែល F3 បានផ្ដោតលើកាមេរ៉ាខាងមុខវិញ។ មិនអាចទទួលស្គាល់ថាធ្វើបានល្អគ្រប់គ្រាន់នៅឡើយ ខណៈបច្ចេកវិទ្យាកាមេរ៉ាភ្លោះខាងមុខ សំដៅដល់តែមុខងារសំខាន់ ២ គឺការ Selfie ធម្មតានិង Selfie ជាក្រុម។ លែនធម្មតាមួយគ្រាប់ផ្ដោតលើការថត Selfie ធម្មតា និង Wide-Angle ផ្ដោតលើការថតជាក្រុម។

+អត្ថប្រយោជន៍នៃកាមេរ៉ាភ្លោះលើស្មាតហ្វូន

១.ការ Focus:

អ្នកអាច Focus បានទាំងមុនពេលថតនិងក្រោយថត ដោយមួយហៅថា Auto-Focus ជំនួយអំឡុងពេលថត និង Re-Focus ជាជម្រើសកែប្រែនៅពេលថតហើយ។

២.ការថតព្រាលក្រោយបានល្អ:

អ្នកថតរូបអាជីពច្រើនផ្ដោតសំខាន់លើមុខងារថតព្រាល Background ក្រោយជាចាំបាច់ ប៉ុន្តែវាក៏ទាមទារនូវតម្រូវការ Hardware ជំនាន់ខ្ពស់ផងដែរ។

៣.Zoom:

សម្រាប់លែន Telephoto ប្រើសម្រាប់ Focus ទៅលើអ្វីមួយឲ្យច្បាស់។ អាចផ្ដល់ឲ្យអ្នកនូវ Optical Zoom ដល់ 2X និង Digital Zoom ដល់ 12X។

៤.គុណភាពរូប:

ដោយការបញ្ចូលគ្នានៃកាមេរ៉ាភ្លោះទាំង ២ ធ្វើឲ្យកម្រិតចក្ខុនៃភ្នែកមនុស្សសម្លឹងនៅចាញ់រូបភាពដែលថតចេញមក។ រាល់រូបភាពដែលថតចេញមកសុទ្ធសឹងតែទាក់ភ្នែកអ្នកទស្សនាគ្រប់ៗគ្នា។

+គុណវិបត្តិនៃបច្ចេកវិទ្យាកាមេរ៉ាភ្លោះលើស្មាតហ្វូន

តាមពិតទៅវាមិនមានគុណវិបត្តិអ្វីច្រើននោះទេ ដោយនេះគឺផ្អែកលើចំណង់ចំណូលចិត្តរបស់មនុស្ស។ ខ្លះគិតថាគ្រាប់លែនកាមេរ៉ាច្រើន មើលទៅវាមិនស្អាត មានភាពរញ៉េរញ៉ៃទើសទាល់ និងពួកគេមិនចង់បានការថតរូបព្រាលអ្វីនោះទេ។ ម្ល៉ោះហើយពួកគេច្រើនរើសត្រឹមស្មាតហ្វូនកាមេរ៉ាមួយគ្រាប់ ប៉ុន្តែមានគុណភាពខ្ពស់ ប្រហាក់ប្រហែលនឹងពីរគ្រាប់ដែរ។