ថៅកែហាង សុខចិត្តខាតរាប់ម៉ឺនដុល្លារ បិទទ្វារហាងកន្លះខែ ធ្វើរឿងភ្ញាក់ផ្អើលមួយដល់បុគ្គលិក

2017-09-27 09:26:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ភោជនីយដ្ឋានអាហារថៃមួយកន្លែង ស្ថិតនៅរដ្ឋ California សហរដ្ឋអាមេរិក បានធ្វើឲ្យអ្នកនិយមប្រើប្រាស់អ៊ីនធឺណិត មានការភ្ញាក់ផ្អើល និងរំជួលចិត្តយ៉ាងខ្លាំង ដោយសារតែទង្វើដ៏សប្បុរសរបស់ម្ចាស់ភោជនីយដ្ឋាននោះ។

កាលពីថ្ងៃអង្គារ ទី១៩ ខែកញ្ញា កន្លងទៅនេះ មេចុងភៅនៅភោជនីយដ្ឋានមួយកន្លែងឈ្មោះ Chef's Choice Noodle Bar ស្ថិតក្នុងទីក្រុង Bakersfield បានបិទទ្វារ និងដាក់ផ្លាកនៅខាងមុខហាង ដើម្បីផ្ដល់ដំណឹងថា ពួកគេនឹងបិទទ្វាររយៈពេល ២ សប្ដាហ៍។

មូលហេតុដែលហាងខាងលើ សុខចិត្តបិទទ្វាររយៈពេលយូរ បណ្ដាលឲ្យខាតចំណូលរាប់ម៉ឺនដុល្លារបែបនេះ គឺដើម្បីអនុញ្ញាតឲ្យមេចុងភៅរបស់ពួកគេ ធ្វើដំណើរវិលត្រលប់ទៅប្រទេសថៃវិញ ដើម្បីបានជួបជុំជាមួយគ្រួសារ ដែលជួបគ្នាបានតែម្ដងប៉ុណ្ណោះក្នុងមួយឆ្នាំ។

មេចុងភៅរូបនោះ មានឈ្មោះថា Preeda Piamfa អាយុ ៥៦ ឆ្នាំ បានផ្លាស់មករស់នៅសហរដ្ឋអាមេរិក នៅពាក់កណ្ដាលឆ្នាំ១៩៩០។ លោកបានចាកចេញពីគ្រួសារ ក្នុងនោះរួមមានទាំងប្រពន្ធ និងកូន ២ នាក់ទៀតផង ដើម្បីធ្វើការរកប្រាក់ផ្គត់ផ្គង់ពួកគេពីចម្ងាយ។

លោក Preeda Piamfa

បើគិតត្រឹមឆ្នាំ២០១១ លោក Preeda បានធ្វើការនៅរដ្ឋ California អស់រយៈពេល ១៥ ឆ្នាំមកហើយ ប៉ុន្តែមិនបានទៅផ្ទះ ដើម្បីជួបជុំប្រពន្ធកូនម្ដងឡើយ ដូច្នេះហើយទើបម្ចាស់ភោជនីយដ្ឋានចិត្តធម៌ខាងលើ សុខចិត្តធ្វើរឿងគួរឲ្យសរសើរបែបនេះ ដោយមិនគិតពីការខាតបង់ឡើយ៕