តំណាងរាស្ត្រ អ៊ូហ្គាន់ដា វាយតប់គ្នាព្រាត ពេលប្រជុំសភា

2017-09-28 04:17:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមអ្នកតំណាងរាស្ត្រប្រទេសអ៊ូហ្គាន់ដា ប្រមាណជាង ១០នាក់ បានឈ្លោះវាយប្រតាយប្រតប់ក្នុងរដ្ឋសភាដោយសារគណបក្សប្រឆាំងព្យាយាមរារាំងការអនុម័តច្បាប់អូសបន្លាយអាយុកាន់អំណាចរបស់បេក្ខភាពប្រធានាធិបតី។

រូបភាពផ្ដល់សិទ្ធិដោយ Reuters

ការប្រតាយប្រតប់បានកើតឡើង បន្ទាប់ពីមន្ត្រីបក្សប្រឆាំងជាច្រើនរូបចោទប្រកាន់សមាជិកបក្សអំណាចមានកាំភ្លើងជាប់ខ្លួន ធ្វើឲ្យមានជម្លោះតឹងសរសៃក រហូតរុញច្រាន និងវាយដំតែម្ដង។ តំណាងរាស្ត្រ ឬហៅសមាជិកសភាខ្លះបានប្រើកណ្ដាប់ដៃដាល់គ្នា និងគ្រវែងកៅអីដាក់គ្នាក្នុងសំលៀកបំពាក់ឈុតធំនៅទីក្រុង Kampala។

បន្ទាប់ពីមន្ត្រីបក្សប្រឆាំងត្រូវបានមន្ត្រីបក្សកាន់អំណាចយាយីដោយកម្លាំង លោកស្រីប្រធានបក្សប្រឆាំង បាននាំមន្ត្រីទាំងអស់ដើរចេញពីរដ្ឋសភា និងចោទប្រកាន់គណបក្សសំឡេងភាគច្រើនក្នុងរដ្ឋសភា ធ្វើការបំភិតបំភ័យ។

ច្បាប់ប្រទេសអ៊ូហ្គាន់ដា បច្ចុប្បន្នបានហាមឃាត់អ្នកដែលមានអាយុលើសពី ៧៥ឆ្នាំ មិនឲ្យកាន់តំណែងជាប្រធានាធិបតីទេ មានន័យថាប្រធានាធិបតី Yoweri Museveni អាយុ ៧៣ឆ្នាំ នឹងមិនមានសិទ្ធិឈរឈ្មោះបោះឆ្នោតនៅអាណត្តិក្រោយបានឡើយ។

ប៉ុន្តែគណបក្សចលនាតស៊ូជាតិរបស់លោក បានព្យាយាមបង្កើតច្បាប់ថ្មីមួយដើម្បីបំបាត់ច្បាប់ហាមឃាត់ចាស់ខាងលើដូច្នេះច្បាប់ថ្មីនឹងអនុញ្ញាតឲ្យមេដឹកនាំកាន់អំណាចមិនកំណត់រយៈពេល។

លោកស្រីមេបក្សប្រឆាំង បានចោទប្រកាន់បក្សអំណាច ប៉ុនប៉ងបង្កើតច្បាប់ដើម្បីកាន់អំណាចអស់មួយជីវិត។អ៊ូហ្គាន់ដា ត្រូវគេមើលឃើញថា មិនដែលមានការផ្លាស់ប្ដូរដោយសន្តិភាពម្ដងណាទេ ចាប់តាំងពីទទួលឯករាជពីអង់គ្លេសក្នុងឆ្នាំ ១៩៦២។

គួរបញ្ជាក់ថា លោក Yoweri Museveni ជាប្រធានាធិបតីអ៊ូហ្គាន់ដាទី៩ បានកាន់អំណាចនៅថ្ងៃទី ២៩ មករា ឆ្នាំ ១៩៨៦ គិតមកទល់ពេលនេះមានរយៈពេល ៣១ឆ្នាំហើយ៕