អ្នកជំនាញ៖ បើកូរ៉េខាងជើង បាញ់នុយក្លេអ៊ែរ អាចសម្លាប់និងបង្ករបួស ជិត១០លាននាក់

2017-10-06 07:19:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមអ្នកជំនាញបានធ្វើការព្រមានថា កូរ៉េខាងជើង អាចសម្លាប់មនុស្សចំនួន ២,១លាននាក់ ជាមួយនឹងការបាញ់នុយក្លេអ៊ែរទៅលើទីក្រុងសេអ៊ូល (កូរ៉េខាងត្បូង) និងទីក្រុងតូក្យូ (ជប៉ុន) ហើយអាចបណ្ដាលឲ្យមនុស្សរងរបួស ៧,៧លាននាក់ទៀតផង។

ការអះអាងនេះ ត្រូវបានវិភាគដោយក្រុមអ្នកប្រាជ្ញ ដែលបានធ្វើសេចក្ដីសន្និដ្ឋានរបស់ពួកគេ ខណៈកំពុងមានភាពតានតឹងកាន់តែខ្លាំងឡើង រវាងប្រទេសផ្ដាច់ការកូរ៉េខាងជើង និងសហរដ្ឋអាមេរិក។

ការវិភាគនេះត្រូវបានធ្វើឡើងដោយគេហទំព័រ 38 North បន្ទាប់ពីការសាកល្បងនុយក្លេអ៊ែរ និងមីស៊ីលរបស់កូរ៉េខាងជើង និងការគំរាមកំហែងសងសឹករបស់ប្រធានាធិបតីអាមេរិក ដូណាល់ ត្រាំ។

អ្នកនិពន្ធ Michael J Zagurek Jr បាននិយាយថា បើផ្អែកលើការគណនារបស់លោក ការវាយប្រហារដោយអាវុធនុយក្លេអ៊ែរ ទៅលើទីក្រុងសេអ៊ូល និងតូក្យូ អាចនឹងសម្លាប់មនុស្សរហូតដល់ ២,១លាននាក់ និងរងរបួស ៧,៧លាននាក់។ វាផ្អែកលើការសន្មតថា កូរ៉េខាងជើងនឹងបាញ់នុយក្លេអ៊ែរ ទាំង២៥របស់ខ្លួន។

គួរបញ្ជាក់ថា ទីក្រុងសេអ៊ូល មានប្រជាជនចំនួន ២៤,១លាននាក់ ខណៈទីក្រុងតូក្យូ មានប្រជាជនរហូតដល់ទៅ ៣៧,៩លាននាក់ឯណោះ៕