មានអ្វីកើតឡើង បើកូរ៉េខាងជើង តេស្ដគ្រាប់បែកអីុដ្រូហ្សែនក្នុងមហាសមុទ្រប៉ាស៊ីហ្វិក?

2017-09-23 08:57:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពតានតឹងរវាងកូរ៉េខាងជើង និងអាមេរិក បានឡើងកម្ដៅម្ដងទៀតដោយភាគីទាំងពីរគំរាមកម្ទេចប្រទេសគ្នាទៅវិញទៅមក។

មេដឹកនាំកូរ៉េខាងជើង លោក គីម ជុងអ៊ុន បានឆ្លើយតបទៅកាន់ការគំរាមកំហែងសកម្មភាពយោធារបស់ ដូណាល់ ត្រាំ ដោយព្រមានថា កូរ៉េខាងជើង អាចនឹងតេស្ដគ្រាប់បែកអ៊ីដ្រូហ្សែនដ៏ខ្លាំងបំផុតរបស់ខ្លួននៅក្នុងមហាសមុទ្រប៉ាស៊ីហ្វិក។ នេះបើតាមការបញ្ជាក់របស់រដ្ឋមន្ត្រីការបរទេសកូរ៉េខាងជើងលោក Ri Yong Ho ថ្លែងប្រាប់អ្នកយកព័ត៌មាននៅទីក្រុងញូវយ៉ក សហរដ្ឋអាមេរិក។

ការគំរាមនេះធ្វើឡើងបន្ទាប់ពីប្រធានាធិបតីអាមេរិក ដូណាល់ ត្រាំ បានថ្លែងសារគំរាមកម្ទេចកូរ៉េខាងជើងទាំងស្រុងនៅក្នុងកិច្ចប្រជុំមហាសន្និបាតអង្គការសហប្រជាជាតិកាលពីថ្ងៃអង្គារ ទី ១៩ កញ្ញាកន្លងទៅ។ ប្រសិនបើកូរ៉េខាងជើង តេស្ដមែន វានឹងក្លាយជាអាវុធនុយក្លេអ៊ែរដំបូងគេ ដែលបំផ្ទុះក្នុងមហាសមុទ្រប៉ាស៊ីហ្វិកនាប៉ុន្មានទសវត្សរ៍ចុងក្រោយនេះ។

គ្រាប់បែកអ៊ីដ្រូហ្សែនជាអ្វី និងធ្លាប់តេស្ដពីមុនមកទេ?

កូរ៉េខាងជើង ធ្លាប់តេស្ដគ្រាប់បែកអ៊ីដ្រូហ្សែនដ៏ខ្លាំងមួយនៅបរិវេណតេស្ដមីស៊ីលនៅភាគឦសានប្រទេសកាលប៉ុន្មានសប្ដាហ៍មុន។ កម្លាំងបំផ្ទុះវាខ្លាំង និងបណ្ដាលឲ្យរញ្ជួយដីកម្រិត ៦,៣រិចទ័រ។

បើប្រៀបធៀបជាមួយគ្រាប់បែកអាតូមិចរបស់អាមេរិកទម្លាក់លើទីក្រុងហ៊ីរ៉ូស៊ីម៉ា នៅជប៉ុន កាលសង្គ្រាមលោកលើកទីពីរឆ្នាំ ១៩៤៥ វិញ គឺខ្លាំងជាង ១៦ដង។ គ្រាប់បែកអាមេរិកកាលនោះ បានសម្លាប់ជនជាតិជប៉ុនជាង ១៥ម៉ឺននាក់។ ប៉ុន្តែបច្ចេកវិទ្យារបស់គ្រាប់បែកអ៊ីដ្រូហ្សែនមានភាពស្មុគស្មាញជាងគ្រាប់បែកអាតូមិច តែអាចបំផ្លាញអ្វីៗមួយទីក្រុងរាបដល់ដី។

តើកូរ៉េខាងជើងយកទៅបំផ្ទុះតាមរបៀបណា?

អាមេរិក និងរុស្ស៊ីធ្លាប់តែប្រើយន្តហោះដឹកគ្រាប់បែកធំៗទៅបំផ្ទុះ ប៉ុន្តែកូរ៉េខាងជើងវិញ ត្រូវអ្នកវិភាគអះអាងថា នឹងប្រើមីស៊ីលរបស់ខ្លួនសណ្ដោងយកទៅ ជាមួយបច្ចេកវិទ្យាដ៏ស្មុគស្មាញ។

នឹងមានអ្វីកើតឡើង បើកូរ៉េខាងជើងតេស្ដបំផ្ទុះពិតមែន?

ពិតណាស់ ការតេស្ដម្ដងៗមិនបានផ្ដល់ល្អចំពោះមជ្ឈដ្ឋានជុំវិញឡើយ។ អ្វីដែលរងផលប៉ះពាល់មុនគេ គឺបរិស្ថាននឹងត្រូវបំផ្លាញ ពុលត្រី បាក់ដី ជីវិតសត្វក្នុងសមុទ្រជាច្រើនត្រូវងាប់ រញ្ជួយបង្កើតជារលកធំៗបោកបក់ បរិយាកាសរងការបំពុល។ ប្រសិនបើផ្សែងភាយទៅដល់មនុស្ស វានឹងធ្វើឲ្យកើតជំងឺមហារីក ទារកក្នុងផ្ទៃប្រែជាពិការមិនគ្រប់លក្ខណៈ និងបង្កជាបញ្ហាដល់ក្រពេញទីរ៉ូអ៊ីតទៀតផង។

តាមប្រភពពីវេបសាយ CTBTO ចាប់តាំងពីការកកើតសព្វាវុធនុយក្លេអ៊ែរមក ក្នុងមហាសមុទ្រប៉ាស៊ីហ្វិកមានការតេស្ដចំនួនជាង ២ ០០០ដងហើយ ដោយ ១០០ដង តេស្ដនៅតំបន់ដាច់ស្រយាលនៃប៉ាស៊ីហ្វិក។

យ៉ាងណាបើយើងសិក្សាស្រាវជ្រាវ គ្រាប់បែកកូរ៉េខាងជើងនេះ មិនមែនជាគ្រាប់បែកខ្លាំងបំផុតក្នុងលោកទេ គឺមានគ្រាប់បែករុស្ស៊ីមួយឈ្មោះ Tsar Bomba ធ្លាប់តេស្ដរួចហើយ។

គ្រាប់បែក Tsar Bomba មានកម្លាំងផ្ទុះស្មើនឹងម្សៅបំផ្ទុះ TNT ៥០មេហ្កាតោន (១មេហ្កាតោនស្មើ ១លានតោន) ឬខ្លាំងជាងគ្រាប់ទម្លាក់នៅទីក្រុងហ៊ីរ៉ូស៊ីម៉ាជាង ៣ ៥០០ដង ឯណោះ។ ដុំផ្សែងមូលបាញ់ទៅលើមានកម្ពស់ ៩,៦គីឡូម៉ែត្រ និងផ្សែងសាយភាយបានចម្ងាយ ៥៦គីឡូម៉ែត្រ។

Tsar Bomba បានទម្លាក់សាកល្បងនៅម៉ោង ១១៖៣២នាទី ថ្ងៃទី ៣០តុលា ឆ្នាំ ១៩៦១ នៅលើវាលទឹកកកអាកទិច សណ្ដោងដោយយន្តហោះ Tu-95V ។ ពេលទម្លាក់ចុះក្រោមគេបានប្រើឆត្រយោងទម្ងន់ ៨០០គីឡូក្រាមដើម្បីសណ្ដោងគ្រាប់បែកបន្តចម្ងាយ ៤៥គីឡូម៉ែត្រទៅកាន់កន្លែងបំផ្ទុះ៕