អ្នកកាសែត NHK ជប៉ុន ស្លាប់ក្រោយធ្វើការថែមម៉ោង គ្មានពេលសម្រាក

2017-10-06 07:20:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ត្រីជនជាតិជប៉ុនម្នាក់បានស្លាប់បាត់បង់ជីវិត បន្ទាប់ពីធ្វើការលើសរហូតដល់ ១៥៩ម៉ោងក្នុងរយៈពេលមួយខែ។ នេះបើតាមការបញ្ជាក់របស់ក្រុមអធិការកិច្ចពលកម្ម។

អ្នកស្រី Miwa Sado ជាអ្នកកាសែតយកព័ត៌មានផ្នែកនយោបាយនៅសារព័ត៌មានល្បីឈ្មោះមួយរបស់ជប៉ុន បានទទួលរងជំងឺខ្សោយបេះដូងតាំងពីខែកក្កដា ឆ្នាំ ២០១៣ តែនិយោជកទើបបង្ហើបឲ្យដឹងនៅសប្ដាហ៍នេះ។

មន្ត្រីនៅទីក្រុងតូក្យូបានអះអាងថា ក្នុងរយៈពេល ៣០ថ្ងៃចុងក្រោយនៃការស្លាប់ អ្នកស្រីបានឈប់សម្រាកចំនួនតែ ២ថ្ងៃប៉ុណ្ណោះ។ អ្នកស្រីជាអ្នកកាសែតរបស់ទូរទស្សន៍ NHK សម្រាប់យកព័ត៌មាននៅទីក្រុងតូក្យូ ហើយបានស្លាប់ ក្រោយយកព័ត៌មានស្ដីពីការបោះឆ្នោតសភាជប៉ុននៅវិមានក្រុមប្រឹក្សា (House of Councillors )។

មន្ត្រីជាន់ខ្ពស់ស្ថាប័នផ្សព្វផ្សាយខាងលើនិយាយថា "មរណភាពរបស់អ្នកស្រី Sado មិនមែនដោយសារបញ្ហាផ្ទាល់ខ្លួនឡើយ គឺជាបញ្ហារបស់អង្គភាពរបស់យើងទាំងមូល រួមមានប្រព័ន្ធការងារ និងម៉ោងយកព័ត៌មានស្ដីពីការបោះឆ្នោតផង"។

ចំណែកខាងទូរទស្សន៍ NHK ក៏បានចូលរួមសម្ដែងការសោកស្ដាយចំពោះគ្រួសារសពផងដែរ។ អ្នកស្រីបានធ្វើជាអ្នកកាសែតឲ្យទូរទស្សន៍ NHK តាំងពីឆ្នាំ ២០០៥ និងបានស្លាប់នៅថ្ងៃទី ២៤កក្កដា។

គួររម្លឹកថា កាលឆ្នាំ ២០១៥ បុគ្គលិកផ្នែកផ្សព្វផ្សាយជប៉ុនអាយុ ២៤ឆ្នាំម្នាក់ ដែលធ្វើការលើសម៉ោងដល់ទៅ ១០០ម៉ោងក្នុងមួយខែ បានធ្វើអត្តឃាតផងដែរ៕