រកឃើញគម្រោងវាយប្រហាររបស់ខ្មាន់កាំភ្លើង Las Vegas មុនបាញ់រះមិនរើសមុខ
- 2017-10-08 08:12:14
- ចំនួនមតិ 0 | ចំនួនចែករំលែក 0
រកឃើញគម្រោងវាយប្រហាររបស់ខ្មាន់កាំភ្លើង Las Vegas មុនបាញ់រះមិនរើសមុខ
ចន្លោះមិនឃើញ
ខ្មាន់កាំភ្លើងនៅសណ្ឋាគារ និងកាស៊ីណូ Mandalay Bay ដែលបានបាញ់រះសម្លាប់មនុស្ស ៥៨នាក់ និងរបួសជាង ៥០០នាក់ កាលពីថ្ងៃអាទិត្យសប្ដាហ៍មុន ត្រូវបានប៉ូលិសរកឃើញកំណត់ហេតុលម្អិតមួយអំពីវិធីសាស្ត្រសម្លាប់មនុស្សឲ្យបានច្រើនតាមដែលអាចធ្វើបាន។
អាជ្ញាធរអះអាងថា ខ្មាន់កាំភ្លើង Stephen Paddock អាយុ ៦៤ឆ្នាំ បានបើករថយន្តនៅកាន់វាលខ្សាច់ Nevada ដើម្បីហាត់សមបាញ់កាំភ្លើងរយៈពេល ២ថ្ងៃ មុនបាញ់រះមិនរើសមុខលើអ្នកឈរមើលការប្រគំតន្ត្រីជាង ២២ ០០០នាក់។
ក្នុងបទសម្ភាសន៍ជាមួយកម្មវិធី 60 Minutes របស់ទូរទស្សន៍អាមេរិក CBS ប៉ូលិស ៤នាក់ ដែលបានចូលទៅរារាំងដល់បន្ទប់សណ្ឋាគាររបស់ខ្មាន់កាំភ្លើងមុនគេ បានបង្ហើបឲ្យដឹងថា ពួកគេបានរកឃើញកំណត់ហេតុលម្អិតស្ដីពីការបាញ់ដ៏សាហាវក្នុងប្រវត្តិសាស្ត្រនេះ។
ក្នុងកំណត់ហេតុនោះបានរៀបរាប់ថា ខ្មាន់កាំភ្លើងបានគណនាចម្ងាយ និងកម្លាំងកាំភ្លើងដើម្បីឲ្យគ្រាប់បាញ់ចេញទៅ ចំគោលដៅល្អពីសណ្ឋាគារ។ បន្ទប់របស់ជនល្មើសបានចាក់សោជាប់ពេលធ្វើសកម្មភាព។
អ្នកស៊ើបអង្កេតផ្សេងទៀត ក៏បានអះអាងស្រដៀងគ្នាថា ពួកគេទទួលបានវីដេអូកាមេរ៉ាសុវត្ថិភាពបង្ហាញពី ខ្មាន់កាំភ្លើងបានបើករថយន្តឆ្ពោះទៅកាន់តំបន់ដាច់ស្រយាលនៅជាយក្រុង Mesquite រដ្ឋ Nevada ហើយមានអ្នកស្រុកឃើញគាត់ហាត់បាញ់ពិតមែន។
លោក Paddock ជាអ្នករស់នៅទីក្រុង Mesquite រដ្ឋ Nevada បានបើករថយន្តរយៈពេល ៩០នាទីទៅបន្ទប់សណ្ឋាគារទីក្រុង Las Vegas។ តាមការស្រាវជ្រាវរបស់អ្នកជំនាញ Paddock ចាប់ផ្ដើមប្រមូលកាំភ្លើងទុកនៅឆ្នាំ ២០១៦ ទិញកាំភ្លើង ៣៣ដើម នៅខែតុលាឆ្នាំ ២០១៦ រាប់បញ្ចូលទាំងកាំភ្លើងវែង AR-15 ផង។
យ៉ាងណាមកទល់ពេលនេះ ប៉ូលិសអាមេរិកកំពុងសាកសួរមិត្តស្រីរបស់ខ្មាន់កាំភ្លើង ដើម្បីស្វែងរកតម្រុងខ្លះៗពីមូលហេតុនៅពីក្រោយការវាយប្រហារខាងលើ៕