Rezvani មិនចាញ់រថយន្តធ្វើសង្រ្គាម ខ្លាំងមានអាវក្រោះការពារគ្រាប់ តែតម្លៃកប់ពពក

2017-10-10 01:36:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនអាមេរិក Rezvani បានប្រកាសចេញនូវរថយន្តប្រភេទ Xtreme Utility Vehicle (XUV) ម៉ូដែល Rezvani Tank នាសប្ដាហ៍កន្លងទៅ។ ការរចនាស្រដៀងនឹងរថយន្តធ្វើសង្គ្រាមនៅក្នុងខ្សែភាពយន្ត Transformers ប៉ុន្តែធាតុពិតផលិតសម្រាប់ប្រើប្រាស់ទូទៅដូចរថយន្តធ្វើដំណើរធម្មតា។

លក្ខណៈពិសេសម្យ៉ាងរថយន្តរត់ដោយកង់ទាំង ៤ មួយនេះ មានបំពាក់នូវអាវក្រោះការពារគ្រាប់កាំភ្លើងទាំងលើតួខ្លួន និងកញ្ចក់រថយន្ត។

បំពាក់នូវម៉ាស៊ីន Hemi V8 ចំណុះ ៦.៤ លីត្រ មានកម្លាំង ៥០០ សេះ តួខ្លួនខាងក្នុងអមដោយសម្ភារៈយ៉ាងប្រណីត បន្សំនឹងកញ្ចក់ Touchscreen ទំហំ ៧.៩ អ៊ីញ អាចឲ្យអ្នកប្រើកម្មវិធី Google Maps, Pandora និង Stitcher ជាដើម។ ក្រៅពីនោះវាមានមុខងារ Night Vision ដែលអាចអនុញ្ញាតឲ្យអ្នកធ្វើដំណើរមើលឃើញផ្លូវច្បាស់នៅស្ថានភាពងងឹតនិងប្រព័ន្ធ Thermal Camera ដែលពពួកមុខងារទាំងនេះ យើងរមែងឃើញលើរថយន្តធ្វើសង្គ្រាមនៅក្នុងខ្សែភាពយន្តបែបវាយប្រហារ។

ចំពោះតម្លៃ Rezvani Tank នឹងមានលក់នៅទឹកដីសហរដ្ឋអាមេរិកមួយគត់នាដំណាក់កាលដំបូង ថ្លៃប្រមាណ ១៧៨ ៥០០ ដុល្លារ ដល់ ២២៧,៧៦៦ ដុល្លារ ចាប់ពីចុងឆ្នាំ ២០១៧ តទៅ។

ចុចអានព័ត៌មានបន្ទាប់

ប្រភព៖ Caradvice | Bgr ប្រែសម្រួល៖ កៅ រក្សា