ថ្នាក់រៀនគ្មានជញ្ជាំងរបស់សិស្ស ក្នុងសហគមន៍មួយនៅ រតនគីរី

2017-10-10 06:59:09
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្នជាគ្រូបង្រៀនគណិតវិទ្យាម្នាក់ និងជាអ្នកធ្លាប់មានជីវិតឆ្លងកាត់ជីវភាពក្រខ្សត់ផងនោះ លោក គី ពិសិដ្ឋ បានផ្តួចផ្តើមបង្កើតថ្នាក់រៀនមួយសម្រាប់បង្រៀនភាសាអង់គ្លេសដល់កុមារដែលលោកថាមកពីគ្រួសារក្រីក្រក្នុងសហគមន៍របស់លោក។

លោក គី ពិសដ្ឋ ជាគ្រូបង្រៀននៅក្នុងក្រុងបានលុង ខេត្តរតនគីរី ហើយថ្នាក់រៀន ដែលលោកផ្តួចផ្តើមកសាងនេះមិនមានជាអគារមាំទាំអ្វីនោះទេ ពោលគឺលោកប្រើតែឈើដែលលោកមានបន្តិចបន្តួច និងស័ង្គសី ដែលអាណាព្យាបាលសិស្សផ្តល់ឲ្យ និងសង់លើដីឯកជនមួយប៉ុណ្ណោះ។ បន្ទប់រៀននេះ លោក ហៅថា «សាលាមេត្តា» ឈ្មោះនេះលោកថាសំដៅលើការសិក្សាដោយមិនបង់ប្រាក់ និងជាការរួមចំណែកជួយកូនៗរបស់ប្រជាពលរដ្ឋក្រីក្រក្នុងសហគមន៍របស់លោក។

(កូនៗរបស់ពលរដ្ឋក្នុងមូលដ្ឋានកំពុងអង្គុយរៀនភាសាអង់គ្លេស)

បន្ទប់រៀនឬសាលាមេត្តា នេះមានតែតំបូលប៉ុណ្ណោះ និងគ្មានជញ្ជាំងនោះទេ ហើយបានដាក់តុសម្រាប់កុមារតូចជាង១០នាក់អង្គុយរៀន។ លោក ពិសិដ្ឋ ថាសាលានេះមានសិស្សដែលចេះភាសាអង់គ្លេសមួយចំនួនដែលបានរៀននៅតាមសាលាឯកជនក្នុងក្រុងបានស្ម័គ្រចិត្តជួយបង្រៀនផងដែរក្រៅពីរូបលោកផ្ទាល់។

(យុវត្តីស្ម័គ្រចិត្តម្នាក់កំពុងបង្រៀនភាសាអង់គ្លេសដល់ក្មេងក្នុងសហគមន៍)

លោក គី ពិសិដ្ឋ ឲ្យដឹងដែរថាទោះបីជាសាលានេះមើលទៅហាក់មិនពេញលក្ខណៈក៏ដោយចុះ ក៏លោកពុំមានគោលដៅ ស្វែងរកមូលនិធិដើម្បីរកទីតាំងច្បាស់លាស់ ឬរឹងមាំជាងនេះឡើយ។ លោកបន្តថា សាលានេះបង្កើតឡើងដើម្បីចូលរួមចែករំលែក និងផ្ដល់ភាពងាយស្រួលដល់កុមារក្នុងគ្រួសារក្រីក្រ ដែលថាពុំមានលទ្ធភាពរៀនសាលាឯកជន ដើម្បីបានទទួលចំណេះដឹងភាសាអង់គ្លេសមូលដ្ឋានប៉ុណ្ណោះ។