កម្ពុជានឹង​រងឥទ្ធិពល​ព្យុះ អាច​បង្ក​ជា​ទឹកជំនន់​ច្រើនកន្លែង​

  • 2017-10-13 07:48:55
  • ចំនួនមតិ

ចន្លោះមិនឃើញ

ក្រសួង​ធនធានទឹក​នៅ​ថ្ងៃ​នេះ​ ឲ្យ​ដឹងថា ​កម្ពុជា​នឹងរង​ឥទ្ធិល​សម្ពាធទាប​ពី​ព្យុះទី​២០ មាន​ឈ្មោះថា​ខាណុន ដែល​ថា​អាចបង្កឲ្យ​មាន​ ​ភ្លៀងធ្លាក់​រាយប៉ាយ​ក្នុងក្របខ័ណ្ឌ​ទូទាំង​ប្រទេស និង​អាចបង្ក​ឲ្យមាន​ជំនន់​ទឹកភ្លៀង​ច្រើនកន្លែង ​ជាមួយគ្នានោះ​នៅលើផ្ទៃសមុទ្រ​ មានភ្លៀង​ និងខ្យល់បក់​បោកខ្លាំង​ រលក​សមុទ្រខ្ពស់ៗ ​។

បើ​តាម​សេចក្តីជូន​ដំណឹង​របស់​ក្រ​សួង​ធនធាន​ទឹក ចាប់ពី​ថ្ងៃទី​១៧ ដល់​១៩​ ខែ​តុលា ឆ្នាំ​២០១៧ នៅ​កម្ពុជា​នឹងមាន​ភ្លៀង​ធ្លាក់​រ៉ាយ​ប៉ាយ​ពី​បង្គួរ​ទៅ​ច្រើន​នៅ​តំបន់​ទំនាប​កណ្តាល និង​ខ្ពង់រាប រួមមាន​រាជធានីភ្នំពេញ តាកែវ កណ្តាល កំពង់ស្ពឺ ស្វាយរៀង កំពង់ចាប ត្បូង​ឃ្មុំ និង​ក្រ​ចេះ។​ សម្រាប់​បរិមាណទឹក​ភ្លៀង​នេះ​ក្រ​សួងថាអាច​នឹង​មានទឹកជំនន់​ច្រើន​កន្លែង។ ចំណែក​ខេត្ត​ក្រៅពីនេះ​ក្រ​សួង​ថា​អាច​មាន​ភ្លៀង​ពី​កម្រិត​មធ្យមទៅ​បង្គួរ។

សម្រាប់​តំបន់​មាត់​សមុទ្រ​ ក្រ​សួងថា​ ចាប់ពី​ថ្ងៃទី​១៥ ដល់​១៨ តុលា អាច​មានភ្លៀង​ធ្លាក់ពី​មធ្យម​ទៅ​ច្រើន។ ក្រ​សួង​ឲ្យដឹងទៀតថា​នៅ​លើ​ផ្ទៃ​សមុទ្រ​មេឃ​មាន​សភាពអ៊ួអាប់ អាចមាន​ភ្លៀង​ធ្លាក់​ច្រើន និង​មាន​រលកខ្ពស់ៗ។​

(រូបភាព៖ ក្រ​សួង​ធនធានទឹក)
(រូបភាព៖ ក្រ​សួង​ធនធានទឹក)

អាស្រ័យ​ហេតុនេះ​ ក្រ​សួង​ស្នើឲ្យ​ពល​រដ្ឋ​បង្កើន​ការយកចិត្ត​ទុកដាក់​ និង​ប្រុងប្រយ័ត្ន​ខ្ពស់ ដើម្បីជៀសវាង​នូវគ្រោះថ្នាក់​ផ្សេងៗ​ ដែលអាច​កើតមាន​ឡើង​ជាយថាហេតុ​ ៕


អត្ថបទ៖ ស៊ិន សាវ៉េត