ព្រះអង្គម្ចាស់លាក់ប្រវត្តិចូលក្លឹបរាត្រី ស្រលាញ់នារីម្នាក់រហូតរៀបអភិសេកជាមួយ
- 2017-10-18 03:53:52
- ចំនួនមតិ 0 | ចំនួនចែករំលែក 0
ព្រះអង្គម្ចាស់លាក់ប្រវត្តិចូលក្លឹបរាត្រី ស្រលាញ់នារីម្នាក់រហូតរៀបអភិសេកជាមួយ
ចន្លោះមិនឃើញ
ដំណើរដើមទងរហូតឈានដល់ពិធីអភិសេក ហាក់ដូចជារឿងនិទានដែលកើតឡើងដំបូងនៅក្លឹបរាត្រីមួយក្នុងក្រុងវ៉ាស៊ីងតោន សហរដ្ឋអាមេរិក ១២ឆ្នាំមុន។ ព្រះអង្គម្ចាស់អេត្យូពី បានទាក់ទងនារីម្នាក់នៅក្នុងក្លឹបរាត្រីនោះ ដោយមិនបានបង្ហាញសាវតារថាព្រះអង្គជាប់សែស្រឡាយរាជវង្សនោះទេ លុះពេលស្រលាញ់ខ្លាំង ទើបបង្ហាញប្រវត្តិពិត និងរៀបអភិសេកនៅខែមុននេះ។
កាលពី ១២ឆ្នាំមុន នារីជនជាតិអាមេរិក Ariana Austin ដែលបច្ចុប្បន្នមានអាយុ ៣៣ឆ្នាំ បានចូលលេងក្លឹបរាត្រីជាមួយមិត្តភក្តិផ្សេងទៀត។ ពេលនោះ ស្រាប់តែលេចមុខព្រះអង្គម្ចាស់ Joel Makonnen ចូលមកនិយាយជាមួយ ដោយនាងមិនដឹងថាជាសែស្រឡាយរាជវង្សនោះទេ។ ដោយកាយវិការសាសងចំៗរបស់ព្រះអង្គម្ចាស់ ធ្វើឲ្យ Ariana បាក់ចិត្ត រួចចាប់ផ្ដើមទាក់ទងគ្នាតែម្ដង។
នៅពេលនោះ ព្រះអង្គម្ចាស់ព្រះជន្ម ៣៥វស្សា Joel Makonnen មិនបានប្រាប់ទៅនារីដែលព្រះអង្គសព្វព្រះទ័យភ្លាមៗ ពីសាវតារពិតនោះទេ។ ក្រោយពេលទាក់ទងគ្នាយូរ ស្រលាញ់គ្នាកាន់តែខ្លាំង ទើបព្រះអង្គម្ចាស់បានប្រាប់ពីប្រវត្តិពិត ថាព្រះអង្គគឺជារាជទាយាទរបស់ព្រះចៅ Haile Selassie I ដែលជាអធិរាជចុងក្រោយរបស់ប្រទេសអេត្យូពី។
ព្រះចៅ Haile Selassie គឺជាមហាក្សត្រទី២២៥ និងជាមហាក្សត្រចុងក្រោយបង្អស់ដែលដឹកនាំប្រទេសអេត្យូពីអស់រយៈពេល ៤០ឆ្នាំ។ ក្រោយមកយោធា បានធ្វើរដ្ឋប្រហារកាន់កាប់ប្រទេសនៅឆ្នាំ១៩៧៤ ហើយគ្រួសាររាជវង្សដែលមានប្រវត្តិដ៏អស្ចារ្យនេះ ក៏បានបែកខ្ញែកគ្នារស់នៅតាមប្រទេសនានា។ ចំណែកព្រះអង្គម្ចាស់ Joel Makonnen បានប្រសូតនៅប្រទេសអ៊ីតាលី និងកំពុងបំពេញការងារជាមេធាវីនៅសហរដ្ឋអាមេរិក។
ព្រះអង្គម្ចាស់ Joel Makonnen បានសម្រេចព្រះទ័យរៀបអភិសេកជាមួយមហេសី Ariana Austin ដែលជាជនជាតិអាមេរិក នៅរដ្ឋ Maryland កាលពីខែមុន ដោយមានអាចារ្យ ១៣នាក់ ព្រមទាំងអ្នកចូលរួមជាច្រើនទៀត ហើយ Ariana Austin នឹងមានងារជាម្ចាស់ក្សត្រី៕
ចុចអានអត្ថបទ៖
ចៅស្រីច្បងរបស់អធិរាជជប៉ុនប្រកាសព្រះរាជពិធីភ្ជាប់ពាក្យប៉ុន្តែ...
ស្នេហាមិនគិតពីវណ្ណៈ! ព្រះនាងជប៉ុន បោះបង់តំណែង ទៅរៀបអភិសេកជាមួយកម្មករសាមញ្ញម្នាក់
រឿងរ៉ាវ៥យ៉ាងគួរដឹង ពីព្រះនាងជប៉ុន ដែលបោះបង់តំណែង ទៅរៀបអភិសេកជាមួយជនសាមញ្ញ