ស្មាតហ្វូនចម្លែកបំផុត មានអេក្រង់ពីរអាចបត់បាន

2017-10-18 04:01:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន ZTE បានប្រកាសចេញស្មាតហ្វូនម៉ូដែលថ្មី Axon M ដែលមានបំពាក់អេក្រង់ទំហំ ៥,២ អ៊ីញ កម្រិត Full HD ដល់ទៅពីរឯណោះ។ អេក្រង់ពីរនេះអាចធ្វើឲ្យស្មាតហ្វូនប្រែកាយជា Tablet បាន។

អេក្រង់ទាំងពីររបស់ Axon M តភ្ជាប់គ្នាដោយត្រចៀក ដែលដូចជាត្រចៀកទ្វារអ៊ីចឹងដែរ។ បញ្ជាក់ថានេះមិនមែនជាស្មាតហ្វូនដំបូងដែលមានបំពាក់អេក្រង់ពីរនោះទេ ពីមុនគេធ្លាប់ឃើញមានលើ Sony Tablet P ដែរ គ្រាន់តែមានរចនាបថខុសគ្នា។

Axon M អាចប្រើប្រាស់ក្នុងបែបបទ ៣ ប្រភេទផ្សេងគ្នា ដោយគេអាចបត់វាចូលគ្នា រួចប្រើអេក្រង់តែមួយ។ ក្នុងការប្រើប្រាស់របៀបនេះ មានតែអេក្រង់មួយប៉ុណ្ណោះដែលដំណើរការ ដោយអេក្រង់មួយទៀតនឹងប្រែជាងងឹតស្លុបលែងដំណើរការ។

ពេលដែលលាអេក្រង់មួយទៀតចេញមក អ្នកនឹងទទួលបាន Tablet រាងបួនជ្រុងមួយ។ ក្នុងការប្រើប្រាស់ Tablet នេះ អេក្រង់ទាំងពីរនឹងចែកគ្នាបង្ហាញរូបភាពម្នាក់ពាក់កណ្ដាល អាចផ្ដល់ភាពងាយស្រួលដល់ការលេងហ្គេម។

ចុងក្រោយអ្នកអាចប្រើ Axon M ជាប្រភេទ "Tent Mode” ដោយក្នុងការប្រើប្រាស់ប្រភេទនេះ អ្នកអាចចែករំលែកវីដេអូ ឬ រូបភាព ឲ្យអ្នកនៅជុំវិញទស្សនាបានដោយងាយស្រួល មិនបាច់ប្រជ្រៀតគ្នាដូចមុនឡើយ។

ចំពោះលក្ខណៈសម្បត្តិរាងហួសសម័យបន្តិចហើយ ព្រោះថានៅប្រើបន្ទះឈីប Snapdragon 821 ដែលចេញកាលពីឆ្នាំទៅនៅឡើយ, មាន RAM ទំហំ ៤ GB និងមានថាមពលថ្ម ៣១៨០ mAh។

នៅសហរដ្ឋអាមេរិក Axon M នឹងមានលក់នៅក្នុងខែវិច្ឆិកា ដោយអាចបង់រំលស់មួយខែ ២៤,១៧ ដុល្លារ ក្នុងរយៈពេល ៣០ ខែ ដែលមានន័យថាតម្លៃលក់រាយរបស់ស្មាតហ្វូននេះស្មើប្រមាណ ៧២៥ ដុល្លារ៕

លក្ខណៈសម្បត្តិលម្អិតរបស់ Axon M ៖

អេក្រង់ ៖ ៥,២ អ៊ីញ កម្រិត Full HD
វិមាត្រ ៖ ១៥០,៨ x ៧១,៦ x ១២,១ ម.ម
ទម្ងន់ ៖ ២៣០ ក្រាម
កាមេរ៉ា ៖ ២០ MP, Aperture f/1.8, អាចថតវីដេអូដល់កម្រិត 4K 30 fps ជាមួយមុខងាររក្សាលំនឹង
ម៉ាស៊ីន ៖ Snapdragon 821, RAM ៤ GB
អង្គផ្ទុកទិន្នន័យ ៖ ៦៤ GB មានរន្ធដោតមេមូរីកាត
ប្រព័ន្ធប្រតិបត្តិការ ៖ Android 7.1 Nougat
ថ្ម ៖ ៣១៨០ mAh
ទ្រនាប់ស្កេនខ្ចៅដៃ ៖ មាន
សមត្ថភាពធន់នឹងទឹក ៖ គ្មាន