មកដឹងប្រវត្តិរថយន្ត Mitsubishi តាំងពីឈប់ផលិត រហូតឈរនៅលំដាប់ទី ៦ នៅជប៉ុន

2017-10-22 04:12:36
ចំនួនមតិ 0 | ចំនួនចែករំលែក 0

ចន្លោះមិនឃើញ

Mitsubishi Motors Corporation ជាក្រុមហ៊ុនផលិតរថយន្តមានការិយាល័យកណ្ដាលនៅទីក្រុងតូក្យូ ប្រទេសជប៉ុន។ នាឆ្នាំ ២០១១ ក្រុមហ៊ុនមួយនេះ ឈរនៅលំដាប់ទី ៦ ក្នុងស្រុក និងលំដាប់ទី ១៦ នៅទីផ្សារសកល។ គិតចាប់ពីខែតុលាឆ្នាំ ២០១៦ Mitshubishi ផ្ដល់ភាគហ៊ុន ៣៤ ភាគរយគ្រប់គ្រងដោយក្រុមហ៊ុន Nissan ក៏ដូចជាផ្នែកមួយនៃសម្ព័ន្ធ Renault-Nissan-Mitsubishi។

ក្រៅពីនោះក៏ស្ថិតក្រោមការគ្រប់គ្រងនៃ Mitsubishi Keiretsu ដែលមានភាគហ៊ុន ២០ ភាគរយក្នុងក្រុមហ៊ុន Mitsubishi Motors និងអតីតកាល Mitsubishi Fuso Truck and Bus Corporation ក៏ធ្លាប់ជាចំណែកនៃក្រុមហ៊ុនខាងលើដែរ ប៉ុន្តែក្រោយមកត្រូវបានក្រុមហ៊ុន Daimler AG ទិញយក។

+ដើមកំណើត:

Mitsubishi កើតឡើងដំបូងបង្អស់នាឆ្នាំ ១៩១៧ អំឡុងពេលដែល Mitsubishi Shipbuilding Co., Ltd ប្រកាសបង្ហាញរថយន្ត Mitsubishi Model A។ ជាប្រភេទរថយន្តមានកៅអី ៧ ផ្សំនឹងតម្លៃថ្លៃធៀបទៅគូប្រជែងនៅប៉ែកអាមេរិកនិងអឺរ៉ុប ប៉ុន្តែផលិតបានតែ ២២ គ្រឿងប៉ុណ្ណោះ រហូតដល់ឆ្នាំ ១៩២១ ត្រូវបានបញ្ឈប់ការផលិតវិញ។

ចូលដល់សម័យសង្គ្រាមលោកលើកទី ២ ក្រុមហ៊ុននេះបានផ្អាកខ្លួនមួយរយៈ ហើយក្រោយពេលបញ្ចប់សង្គ្រាមក៏សម្រុកផលិតបន្តនូវរថយន្តក្រុង Fuso និងរថយន្តដឹកទំនិញខ្នាតតូចប្រភេទកង់បី ឲ្យឈ្មោះ Mizushima និងប្រភេទ Scooter ឈ្មោះ Silver Pigeon។

ចូលដល់ឆ្នាំ ១៩៧៣ ក្រុមហ៊ុនជប៉ុន Mitsubishi បានចាប់ដៃជាមួយក្រុមហ៊ុនយក្សអាមេរិក Chrysler ដោយមានចំណែកភាគហ៊ុន ១៥ ភាគរយ ឆ្ពោះដល់ការផលិតរថយន្តចន្លោះពី ៥០០,០០០ គ្រឿង ក្នុងឆ្នាំ ១៩៧៣ កើនដល់ ៩៦៥,០០០ គ្រឿង នៅឆ្នាំ ១៩៧៨ ដោយសន្ទុះលក់ខ្លាំងបានមកពីរថយន្ត Galant ហើយជាគូប្រជែងក្ដៅគគុកជាមួយក្រុមហ៊ុនអាមេរិករថយន្ត Dodge Challenger និង Plymouth Sapporo។

ក្នុងឆ្នាំ ១៩៨២ ជាពេលដំបូងដែល Mitsubishi បង្ហាញខ្លួនលើឆាកអន្តរជាតិនៅទឹកដីអាមេរិក និងការនាំចូលរថយន្តដឹកទំនិញខ្នាតធំទៅទីផ្សារប្រទេសចិននាចន្លោះឆ្នាំ ១៩៨៤ ដល់ ១៩៨៥។ ឈ្មោះ Mitsubishi Motors បានប្រកាសជាផ្លូវការនៅឆ្នាំ ១៩៨៨ បន្ទាប់ពី Mitsubishi Heavy Industries បានដកហ៊ុន ២៥ ភាគរយចេញ គាប់ជួន Chrysler ទិញហ៊ុន ២០ បន្ថែមមកវិញ។ សម្របនឹងទីផ្សារកំពុងគាំទ្រខ្លាំងនៅប៉ែកអាមេរិក ក្រុមហ៊ុនមានមូលដ្ឋាននៅប្រទេសជប៉ុនបានជ្រៀតខ្លួនចូលទីផ្សារអាស៊ីបន្ថែមរួមមាន ហ្វីលីពីន, ថៃ និងម៉ាឡេស៊ី។

+ដៃគូសហការធំៗ:

- Volvo: បន្ទាប់ពីលក់ក្រុមហ៊ុន Volvo Cars ចែកទៅឲ្យ Ford នាខែមករា ឆ្នាំ ១៩៩៩ ភ្លាមនោះ Volvo Group បានទិញភាគហ៊ុន ៥ ភាគរយពី Mitsubishi Motor នាខែវិច្ឆិកាក្នុងឆ្នាំតែមួយ ប៉ុន្តែលក់ទៅឲ្យក្រុមហ៊ុន DaimlerChrysler បន្តវិញនាឆ្នាំ ២០០១។

- Volkswagen: ក្នុងទីផ្សារអឺរ៉ុប Mitsubishi Motors លក់រថយន្តប្រើសាំង ដែលទទួលផ្គត់ផ្គង់ដោយក្រុមហ៊ុនអាល្លឺម៉ង់ Volkswagen សម្រាប់ពពួករថយន្តធន់កណ្ដាលមួយផ្នែកធំ មានដូចជាម៉ូដែល Lancer, Grandis និង Outlander។

- Hyundai: ក្រុមហ៊ុនកូរ៉េខាងត្បូង Hyundai បានផលិតរថយន្តកូរ៉េដំបូងម៉ូដែល Hyundai Pony នៅឆ្នាំ ១៩៧៥ ជួនពេលនោះ Mitsubishi បានទិញយកភាគហ៊ុន ១០ ភាគរយ រហូតដល់ការបែងចែកភាគហ៊ុនចុងក្រោយរបស់ខ្លួននៅខែមិនា ឆ្នាំ ២០០៣។

- Nissan: នៅខែឧសភា ឆ្នាំ ២០១៦ ក្រុមហ៊ុន Nissan បានប្រកាសទិញភាគហ៊ុន ៣៤ ភាគរយនៃ Mitsubishi Motors ដែលនេះជួយឲ្យក្រុមហ៊ុន Nissan ក្លាយជាបិតាគ្រប់គ្រងលើក្រុមហ៊ុនជប៉ុនបាន ក៏ដូចជាបង្វែរឲ្យ Mitsubishi Motors ចូលជាសម្ព័ន្ធមិត្តជាមួយ Renault-Nissan Alliance។ Nissan មានគម្រោងនឹងចូលរួមចង្វាក់ផលិតកម្មរថយន្តនាពេលអនាគតជាមួយ Mitsubishi Motors។

+រថយន្តអគ្គិសនី:

Mitsubishi Motors ចាប់ផ្ដើមលក់រថយន្តអគ្គិសនី ប្រើអាគុយ lithium-ion ម៉ូដែល I MiEV នៅឆ្នាំ ២០០៩ ចូលដល់ឆ្នាំ ២០១០ ខ្លួនក៏បានប្រកាសបង្ហាញព្រមគ្នានៅរថយន្តអគ្គិសនីចំនួន ៥ ម៉ូដែលផ្សេងទៀត។

+ការសហការជាមួយតារាសម្ដែង Jackie Chan:

Mitsubishi បានសហការជាមួយលោក Jackie Chan (ឈិន ឡុង) អស់ជាង ៣០ ឆ្នាំមកហើយ។ គាត់តែងតែប្រើប្រាស់រថយន្ត Mitsubishi ទាំងក្នុងការរស់នៅប្រចាំថ្ងៃនិងការបំពេញការងាររបស់លោក។

ព្រឹត្តិការណ៍ដ៏ធំមួយមានឈ្មោះ Jackie Chan Cup បានបើកនៅឆ្នាំ ១៩៨៤ បណ្ដុំដោយកំពូលអ្នកប្រណាំងរថយន្តអន្តរជាតិល្បីៗជាច្រើនរូប ធ្វើការប្រណាំងជុំវិញតំបន់អាស៊ី។ នៅឆ្នាំ ២០០៥ ក្រុមហ៊ុនជប៉ុន បានផលិតរថយន្តពិសេស Jackie Chan Special Edition ម៉ូដែល Lancer Evo IX ចំនួន ៥០ គ្រឿងលក់នៅលើទីផ្សារ៕