ម៉ន់ ចាន់តារា អាចនឹងបោះបង់អាជីពប្រដាល់ព្រោះជួបរឿងអយុត្តិធម៌ច្រើនពេក
- 2017-10-26 08:53:08
- ចំនួនមតិ 0 | ចំនួនចែករំលែក 0
ម៉ន់ ចាន់តារា អាចនឹងបោះបង់អាជីពប្រដាល់ព្រោះជួបរឿងអយុត្តិធម៌ច្រើនពេក
ចន្លោះមិនឃើញ
អ្នកប្រដាល់វ័យក្មេង ម៉ន ចាន់តារា អាចនឹងដើរចេញពីសង្វៀនប្រដាល់ ព្រោះជួបរឿងអយុត្តិធម៌ច្រើនពេក វ៉ៃត្រូវគេច្រើនសមនឹងឈ្នះ តែលទ្ធផលផ្ទុយរហូត ជាហេតុអស់ទឹកចិត្តចំពោះអាជីពមួយនេះ។
កីឡាករ ម៉ន ចាន់តារា បានឲ្យដឹងថា ភាពអយុត្តិធម៌ទៅលើការឲ្យពិន្ទុ កាត់សេចក្ដីលំអៀង តាមបក្សតាមពួក នេះបានធ្លាក់មកលើរូបគេច្រើនដងណាស់មកហើយ ជាហេតុធ្វើឲ្យខ្លួនអស់ចិត្តលែងចង់ឡើងប្រកួតតទៅទៀត។ «ពេលខ្លះគេចោទថាលក់ការប្រកួតក៏មានដែរ ខ្ញុំខំប្រឹងប្រកួតចង់ងាប់ តាំងពីចូលវ៉ៃមកជិត៥ឆ្នាំនេះមិនដែលលក់ការប្រកួតម្ដងណាទេ» សម្ដី ម៉ន ចាន់តារា។ សិស្សប្អូន ម៉ន សាម៉េត ម្នាក់នេះបន្ថែមថា បើឲ្យពិន្ទុត្រឹមត្រូវ ចាញ់គឺចាញ់ នោះគេមិនខឹងអ្វីទាំងអស់ប៉ុន្តែឈ្នះហើយឲ្យចាញ់វិញទើបខ្លួនអស់ចិត្តតែម្ដង។
អ្នកប្រដាល់វ័យ២២ឆ្នាំខាងលើ ធ្លាប់ចង់ដើរចេញពីអាជីពមួយនេះច្រើនដងណាស់មកហើយ តែដោយសារចិត្តស្រឡាញ់ក៏ធ្វើឲ្យគេនៅបន្ត ហើយវិលមករកសង្វៀនវិញ ប៉ុន្តែម្ដងនេះបែបឈប់មែនទែនហើយ បើទោះជាមិនទាន់មានការងារធ្វើក៏ដោយ ព្រោះធុញនឹងជួបរឿងបែបនេះដដែលទៀត។ ពេលក្រោយៗបើមានការរៀបចំការប្រកួតបានល្អត្រឹមត្រូវ ប្រហែលជាវិលមកសង្វៀនវិញ។
ម៉ន ចាន់តារា ជាកីឡាករមកពីក្លឹបការិយាល័យទី៥កងទ័ពជើងគោក ជាកូនសិស្សលោកគ្រូ ម៉ាង ម៉ន ហើយគិតមកដល់ឆ្នាំ២០១៧ នេះ គេប្រឡូកក្នុងវិស័យប្រដាល់ប្រហែល៥ឆ្នាំមកហើយ៕