អត្ថន័យឈុត "នាងឧសភី" របស់បវរកញ្ញាកម្ពុជាដែលកំពុងប្រកួតនៅហ្វីលីពីន

2017-10-27 02:57:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ឈុតសម្លៀកបំពាក់ដែល កញ្ញា អែម គន់ថង អតីតជយលាភីលេខ២កញ្ញាឯកកម្ពុជា ឆ្នាំ២០១៦ ដែលបានស្លៀកចូលប្រកួតក្នុងកម្មវិធី Miss Earth 2017 នៅប្រទេសហ្វីលីពីន មានឈ្មោះថា "នាងឧសភី" ជាឈុតតំណាងជាតិ (National Costume)។

តាមការពន្យល់របស់លោក ម៉ែន និមលរ័ត្ន នាយកប្រតិបត្តិ Arise Agency ដែលជាអ្នករៀបចំបញ្ជូន កញ្ញា អែម គន់ថង ទៅប្រកួតនេះ ថា ឈុត "នាងឧសភី" ច្នៃដោយក្រុម La Chhouk Recycled & Creative Fashion ដោយមួយផ្នែកធំនៃរ៉ូបនេះ បានច្នៃចេញពីសំរាមស្ងួត ឬសម្ភារៈដែលគេប្រើប្រាស់រួច (Recycled Materials) មានដូចជាឌីស គំរបដប បាវ ជាដើម។

លោក ម៉ែន និមលរ័ត្ន នាយកប្រតិបត្តិ Arise Agency

លោកបានបន្តឲ្យដឹងថា ជាការពិតណាស់ ឈុតនេះបានផ្សារភ្ជាប់ពីអត្តសញ្ញាណខ្មែរ ដោយយកលំនាំតាមសត្វគោព្រៃ ដែលជាសត្វមួយតំណាងជាតិ ហើយយើងក៏បានបន្ថែមផ្នែកខ្លះនៃសម្លៀកបំពាក់របាំខ្មែរ ដូចជាសរុងក ខ្សែឈៀង ។ ចំណែកឈ្មោះ "នាងឧសភី" មានន័យជាស្ដេចគោញី ដោយយោងតាមពាក្យថា ឧសភ ឬ ឧសភរាជ ប្រែន័យសេចក្ដីថា ស្ដេចគោ ។

មិនត្រឹមតែប៉ុណ្ណោះ ឈុតនេះផងដែរនៅពេលបង្ហាញ វានឹងឮសំឡេងកណ្ដឹង យោលទៅយោលមក ប្រៀបបាននឹងសំឡេងសត្វគោពេលធ្វើដំណើរផង ហើយក៏ជាចំណុចដែលបង្កើននូវភាពទាក់ទាញមួយកម្រិតទៀតដល់អ្នកទស្សនា។

លោកថា ហេតុបានជាយកសត្វព្រៃ និង វត្ថុដែលប្រើប្រាស់រួច (Recycled Material ) ជា Concept គឺចង់បង្ហាញអត្ថន័យពីការចូលរួមការការពារសត្វព្រៃ និងបរិស្ថាន ឲ្យសមស្របទៅតាមកម្មវិធី Miss Earth 2017 ដែលគោលដៅធំរបស់កម្មវិធី គឺ ការអប់រំ ការការពារបរិស្ថាន។

នាយប្រតិបត្តិ ខាងលើ សង្ឃឹមថា ឈុតមួយនេះនឹងបានចូលរួមចំណែកលើកមុខប្រទេសជាតិ តាមរយៈការបង្ហាញរបស់ Miss Earth Cambodia ទៅដល់បណ្ដាជននៃប្រទេសដទៃ។

កញ្ញា អែម គន់ថង បានចេញពីប្រកួតកម្មវិធីខាងលើកាលពីថ្ងៃ ០៨ ខែ តុលា ឆ្នាំ ២០១៧ ដោយកម្មវិធី គ្រោងបញ្ចប់នៅថ្ងៃទី០៤ ខែ វិច្ចិកា ឆ្នាំ ២០១៧ ខាងមុខនេះ។ ស្រីស្អាត អែម គន់ថង មានវ័យ១៨ឆ្នាំ កម្ពស់ ១៧២សង់ទីម៉ែត្រ មានស្រុកកំណើត នៅខេត្តព្រះសីហនុ។ ក្រៅពីឈុត "នាងឧសភី" កញ្ញា អែម គន់ថង បាននាំឲ្យសម្លៀកបំពាក់ជាច្រើនម៉ូដថែមទៀត។