ផលិតករស្រីវ័យក្មេង ចំណាយថវិកាផ្ទាល់ខ្លួន ផលិតកុនខ្លីនិយាយពីភ្លើងស្នេហ៍ក្នុងសម័យវាលពិឃាត
- 2017-11-01 00:02:00
- ចំនួនមតិ 0 | ចំនួនចែករំលែក 0
ផលិតករស្រីវ័យក្មេង ចំណាយថវិកាផ្ទាល់ខ្លួន ផលិតកុនខ្លីនិយាយពីភ្លើងស្នេហ៍ក្នុងសម័យវាលពិឃាត
ចន្លោះមិនឃើញ
រឿងកម្រ និងពោរពេញដោយទស្សនៈ «វាលស្រែ វាលស្រូវ» មានរយៈខ្លីប្រមាណ ១៥នាទី ដឹកនាំសម្តែង និងផលិតដោយ ផលិតករ វ័យ ៣១ឆ្នាំ អ្នកស្រី គង់ សុវណ្ណស្រីឈូក។
រឿងនេះ និយាយរៀបរាប់ពីចំណងស្នេហ៍ត្រីកោណ ដែលបុរសពីរនាក់គឺជានាយកងកម្មាភិបាលខ្មែរក្រហម បានស្រលាញ់លើនារីម្នាក់ដែលជាប្រជាជនធម្មតា តែដោយកម្មាភិបាលម្នាក់ដែលជាមនុស្សគ ធ្លាប់ជួយយកអាសាជីវិតរបស់នាងរស់ដែលជាតួអង្គឯក នាងរស់ក៏បាក់ចិត្តស្រលាញ់កម្មាភិបាល គ នោះ ហើយទាំងពីរនាក់តែងតែបានសរសេរសារស្នេហាឲ្យគ្នាតាមរយៈស្លឹកឈូកដែលនាយ គ បោះឲ្យនាងខ្ចប់នឹងដំបាយ។
ក្នុងសាច់រឿងក៏បានរំលេចអារម្មណ៍ស្នេហាជ្រាលជ្រៅ តាមរយៈការណាត់ជួបគ្នាលួចលាក់ នៅទីស្ងាត់កំបាំង ឬក៏ណាត់គ្នាមើលដួងច័ន្ទជាដើម។
តាមការឲ្យពីផលិតករដែលមានរហ័សនាម ឈូក មាស រឿងនេះជាស្នាដៃនិពន្ធ និងដឹកនាំជាលើកដំបូងរបស់ខ្លួនក្នុងឆ្នាំ ក្នុង២០១៦ ហើយចំណាយអស់ថវិកាផ្ទាល់ខ្លួនជាង ៣ ០០០ ដុល្ហាអាមេរិក ក្រោមជំនួយស្ម័គ្រចិត្តពីតួអង្គសម្តែង និងក្រុមការងារបច្ចេកទេស។
រម្លឹកដល់ការផលិតរឿង «វាលស្រែ វាលស្រូវ» អ្នកស្រី ឈូក មាស ថា វាបានធ្វើឲ្យបំណងប្រាថ្នារបស់ខ្លួនបានជោគជ័យ ហើយនឹកស្មានមិនដល់ថា ទឹកប្រាក់ត្រឹម ៣ ០០០ ដុល្លា និងរយៈពេលដ៏ខ្លីមួយអាចផលិតរឿងដ៏មានអត្ថន័យ និងរសជាតិថ្មីប្លែក ទេសភាព ដ៏កម្ររកបានដូច្នេះ។
អ្នកស្រី គង់ សុវណ្ណឈូក បន្តថា៖ «បើនិយាយពីអ្វីដែលចងចាំបំផុតនោះគឺ ថាខ្ញុំជាមនុស្សដែលខ្លាចដង្កូវបំផុត ហើយពេលដែលកំពុងថត ក៏មានដង្កូវ ឡើងតោងលើខ្ញុំ ខ្ញុំភ័យណាស់ តែខ្ញុំធ្វើចិត្តបាន ចាស៎! ព្រោះអី ខ្ញុំជាអ្នកដឹកនាំក្រុម ខ្ញុំមិនអាចជាមនុស្សទន់ខ្សោយនោះទេ»។ ហើយជាលទ្ធផល ក្រុមការងារបានសម្រេចជោគជ័យ លើការថតនៅកណ្តាលវាលស្រែ ទាំងក្តៅ ទាំងភ្លៀង ទាំងមានដង្កូវ និងបញ្ហាជាច្រើនទៀតរយៈពេល៣យប់ ៣ថ្ងៃ និងប្រើពេលកាត់តអត់ងងុយជាង ១ខែ។
នេះជាលើកទី១ របស់ផលិតករ ឈូក មាស លើការផលិតខ្សែភាពយន្ត តែដោយការស្រលាញ់ និងចង់បង្កើតទស្សន័យភាពសិល្បៈភ្ជាប់ជាមួយប្រវត្តិសាស្ត្រ ពិសេសដោយស្រលាញ់ យ៉ាងខ្លាំងលើអត្ថន័យបទចំរៀងដើម «វាលស្រែ វាលស្រូវ» ផង ទើបខ្សែភាពយន្ត ត្រឹម ១៥នាទីនេះត្រូវបានផលិតឡើង ដោយមិនខ្វល់ពីរឿងចំណេញ ឬខាត។ ផលិតកររូបនេះបន្តថា៖ «ខ្ញុំចង់ផលិត កុន Serious (កុនបែបស៊ីជម្រៅ) ដើម្បីជាចំណេះដឹងផង និងការកម្សាន្តប្រកបដោយអត្ថន័យ ដែលខ្ញុំគិតថានៅខ្មែរយើងមិនសូវមានច្រើនទេ»។
លើសពីនេះទៅទៀត ផលិតករភាពយន្តខ្លី «វាលស្រែវាលស្រូវ»បន្តថា៖ «រឿងល្អមួយសូម្បីតែប្រាប់គេពីគម្រោងស្រាវជ្រាវ ឬរៀបវាជាសៀវភៅក៏ល្បីមុនទៅហើយ...»។ ដូចរឿង «មុនដំបូងខ្មែរក្រហមសម្លាប់ប៉ារបស់ខ្ញុំ» ល្បីជាស្នាដៃសៀវភៅ មុនពេលផលិតជាខ្សែភាពយន្តខ្លះបាត់ទៅហើយ ហើយក៏មានរឿងល្បីៗរបស់ហូលីវូដ ជាដើមបង្កើតឡើងបន្ទាប់ពីសៀវភៅ។
តួយ៉ាងសាច់រឿង «វាលស្រែ វាលស្រូវ» លើកពី concept សាច់រឿងដែលបានពីការស្រមើលស្រមៃ អារម្មណ៍ និងព្រឹត្តិការណ៍សាច់រឿង ត្រូវបានអ្នកស្រី សុវណ្ណឈូក ស្តាប់ និងសួរអ្នកជំនាន់មុនដែលឆ្លងកាត់ និងជួបព្រឹត្តិការណ៍ពិតដូចក្នុងសាច់រឿងខ្លីនេះ។ «ខ្ញុំទៅសួរយាយខ្ញុំថា ពេលសម័យពលពត់បើគេស្រលាញ់គ្នាគេធ្វើម៉េច គេរ៉ូមែនទិកយ៉ាងម៉េច? លោកយាយថា គេលបលួចជួបគ្នា មើលព្រះច័ន្ទពេលយប់ តាមវាលស្រែ តាមពំនូកចំបើង អីចឹងទៅណា»។ ហើយអ្នកស្រី ក៏បានជួបអតីតកម្មាភិបាលខ្មែរក្រហមផ្ទាល់ ដើម្បីសួរអំពីពិធីរៀបការសម័យនោះ ក៏ដូចជាការលួចស្រលាញ់គ្នា តើគេរកវិធីយ៉ាងណាដើម្បីកំចាត់ដៃគូរបក្សដិបក្សអីជាដើម មុននឹងខ្សែភាពយន្តនេះឡើង។
ខ្សែភាពយន្តខ្លី «វាលស្រែ វាលស្រូវ» ធ្លាប់បានចាក់បញ្ចាំងក្នុងមហោស្រពជាតិលើកទីមួយកាលពីឆ្នាំ ២០១៦ និងជាប់ជាជម្រើសប្រកួតប្រជែងក្នុងកម្មវិធីមហោស្រពភាពយន្តខ្លីចតុមុខ ឆ្នាំ ២០១៧នេះ ដោយទទួលបានការគាំទ្រពីផលិតករខ្សែភាពយន្តជាច្រើន។ រឿងនេះក៏ផ្ញើទៅចូលរួមប្រកួតក្នុងមហោស្រពភាពយន្តអន្តរជាតិ ហើយក៏ត្រៀមខ្លួនចាក់បញ្ចាំងក្នុងមហោស្រពអន្តរជាតិផងដែរ។
ចុចអាន៖យី កក្កដា សិល្បករពហុជំនាញ ចេះគូរគំនូរ២ផ្ទាំងក្នុងពេលតែមួយ មានប្រវត្តិកំសត់នឹកស្មានមិនដល់
អ្នកសិល្បៈ១០រូបជួបរឿងសោកសង្រេង និងតក់ស្លុតបំផុតនៅឆ្នាំ២០១៧
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
