កសិករចិន រកឃើញពីងពាងបុរាណ មានជើង១០ យ៉ាងកម្របំផុត

2017-10-31 07:13:30
ចំនួនមតិ 0 | ចំនួនចែករំលែក 0

ចន្លោះមិនឃើញ

កសិករជនជាតិចិនម្នាក់ មិនដែលចេះខ្លាចសត្វពីងពាងឡើយ ប៉ុន្តែសត្វពីងពាងដែលកសិកររូបនេះ បានរកឃើញមួយក្បាលនេះ ពិតជាធ្វើឲ្យគេមានការភ្ញាក់ផ្អើលយ៉ាងខ្លាំង។

ខណៈសត្វពីងពាងធម្មតា មានជើងត្រឹមតែ ៨ សត្វពីងពាងបុរាណដ៏កម្រនេះ មានជើងធាត់ៗ រហូតដល់ទៅ ១០ ហើយមានរោមច្រើនទៀតផង។ មិនតែប៉ុណ្ណោះ វាហាក់បីដូចជាមានសំបករឹង គ្របការពារលើរាងកាយខាងលើរបស់វាទៀតផង។ អ្វីដែលចម្លែកបំផុត គឺ ផ្នែកខាងក្រោយរបស់វា ហាក់បីដូចជា ការរចនាចម្លាក់ពីបុរាណអីចឹង។

កសិករចិនខាងលើ មានឈ្មោះថា Li Wenhua បានរកឃើញសត្វពីងពាងដ៏ចម្លែកនេះ នៅក្នុងកសិដ្ឋានរបស់ខ្លួន នៅភាគខាងត្បូងប្រទេសចិន ហើយក៏បានយកវាមកផ្ទះតែម្ដង។ ដោយសារតែមានការជួយ ពីអ្នកនិយមប្រើប្រាស់អ៊ីនធឺណិត លោក Li បានដឹងថា សត្វពីងពាងនោះ គឺជាសត្វពីងពាងដ៏កម្រ ហើយធ្លាប់ត្រូវគេរកឃើញត្រឹមតែ ៦ក្បាលប៉ុណ្ណោះ ចាប់តាំងពីឆ្នាំ២០០០ មក។

គួរបញ្ជាក់ថា វាជាប្រភេទសត្វពីងពាង Chinese Hourglass Spider ដែលមានអាយុកាលតាំងពីសតវត្សទី៥ ហើយជាពូជកម្រមានបំផុត និងមានតែនៅក្នុងប្រទេសចិនប៉ុណ្ណោះ។ ភស្តុតាងដំបូងបង្អស់នៃសត្វពីងពាងនេះ គឺនៅក្នុងវចនានុក្រមបុរាណ ហៅថា Er Ya។

យ៉ាងណាមិញ លោក Zhao Li ជាអ្នកជំនាញម្នាក់ បាននិយាយថា «សត្វពីងពាងនេះមានតម្លៃខ្លាំងណាស់សម្រាប់ការស្រាវជ្រាវផ្នែកវិទ្យាសាស្ត្រ។ វាជាប្រភេទសត្វកម្រនៅខេត្ត Sichuan។ ខ្ញុំបានខិតខំប្រឹងប្រែងយ៉ាងខ្លាំង ក្នុងការស្វែងរកវា ប៉ុន្តែរកមិនឃើញសោះ»៕