រកឃើញមូលហេតុបង្កឲ្យតារាកូរ៉េ Kim Joo Hyuk ជួបគ្រោះថ្នាក់ចរាចរណ៍

2017-10-31 08:05:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្សិលមិញនេះ តារាសម្ដែង Kim Joo Hyuk បានទទួលមរណភាព ដោយសារគ្រោះថ្នាក់ចរាចរណ៍ដ៏សាហាវ ប៉ុន្តែពេលនេះមានព័ត៌មានថ្មីពីមូលហេតុនៃការស្លាប់របស់លោកហើយ។

តាមរបាយការណ៍បានឲ្យដឹងថាលោក Kim មានការឈឺចាប់ក្នុងទ្រូងមុនពេលលោកជួបហេតុការណ៍ដ៏អាក្រក់ រហូតឆក់យកជីវិតលោកទៅនោះ។

លោកត្រូវបានបញ្ជូនមកមន្ទីរពេទ្យ Konkuk ភា្លមៗ ដើម្បីពិនិត្យមើលពីស្ថានភាពបេះដូងរបស់លោក។ បើតាមមន្ទីរពេទ្យបានឲ្យដឹងថា៖ “លោកKim Joo Hyuk អាចមានអការៈគាំងបេះដូងមុនពេលលោកជួបគ្រោះថ្នាក់ចរាចរណ៍”។

យោងតាមការពិនិត្យនេះ ប៉ូលិសក៏បានបង្វែរការស៊ើបអង្កេត ដោយបញ្ជាក់ថាការស្លាប់របស់លោក Kim អាចបណ្តាលមកពីជំងឺគាំងបេះដូងច្រើនជាង។ បើតាមប្រអប់ខ្មៅនៅក្នុងឡានមួយទៀតដែលបើកជិតឡានលោក បានបង្ហាញថា ភ្លាមៗឡានរបស់តារាប្រុសរូបនេះស្រាប់តែបន្ថយល្បឿន ហើយក្រោយមកឡាននោះ ក៏បើកយ៉ាងលឿនធ្លាក់ផ្លូវតែម្ដង។

អ្នកស៊ើបអង្កេតបានដាក់ការសង្ស័យថា ជើងរបស់លោក Kim អាចជាន់ហ្គែរដោយចៃដន្យ ក្រោយពីលោកក៏គាំងបេះដូង។

បើតាមសាក្សីម្ចាស់ឡានម្នាក់ ដែលលោក Kim Joo Hyuk បើកប៉ះនោះបានបញ្ជាក់ដែរថា ខ្លួនបានឃើញលោក Kim យកដៃក្តោបទ្រូង មុនពេលគ្រោះថ្នាក់បានកើតឡើង។ ក្រោយកើតហេតុ ខាងផ្នែកពន្លត់អគ្គីភ័យ និងក្រុមគ្រូពេទ្យសង្គ្រោះបន្ទាន់បានព្យាយាមទាញលោកចេញពីក្នុងឡានឲ្យបានលឿនបំផុត តែជាអកុសល ក្រោយ ២ម៉ោងលោកក៏បានស្លាប់។

ខណៈនេះការស៊ើបអង្កេតមិនទាន់បានបញ្ចប់នៅឡើយទេ ប៉ុន្តែងាកទៅមិត្តភក្ដិ តារាល្បីៗ និងអ្នកគាំទ្រនៅជុំវិញពិភពលោកបានចូលរួមរំលែកទុក្ខដល់ក្រុមគ្រួសារតារាប្រុសរូបនេះ ដោយអារម្មណ៍សោកស្ដាយជាទីបំផុត៕