មកដឹងមុខងារពិសេស ៦ យ៉ាងដែលប៊ូតុង Home លើ iPhone អាចធ្វើបាន

2017-11-01 02:31:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តជាច្រើនប្រហែលគិតថា ប៊ូតុង Home របស់ iPhone គឺគ្រាន់តែប្រើសម្រាប់មុខងារធម្មតាដូចជាចេញពីកម្មវិធីមកផ្ទាំងដើម ឬបើក Siri ប៉ុណ្ណោះ។ ដូច្នេះ Sabay សូមបង្ហាញនូវមុខងារពិសេស ៦ យ៉ាងដែលប៊ូតុង Home របស់ iPhone អាចធ្វើបាន។

១. បិទនូវ Reachability ក្នុងការពារការបើកដោយចៃដន្យ

Reachability ត្រូវបានណែនាំលើ iPhone 6 ក្នុងការធ្វើឲ្យអេក្រង់ធំងាយស្រួលប្រើនឹងដៃម្ខាង។ ពេលអ្នកចុចពីរដងស្រាលៗលើប៊ូតុង Home វានឹងដំណើរការ ដោយផ្ទាំងប្រើប្រាស់រុញចុះក្រោមពាក់កណ្ដាល។ ប្រសិនបើអ្នកចង់បិទនូវមុខងារនេះ អ្នកអាចបើកកម្មវិធី Settings > General > ចុចលើ Accessibility ហើយអូសចុះក្រោមបន្តិច ចុចលើប៊ូតុង Toggle ក្បែរនឹង Reachability។

២. បន្ថយល្បឿនក្នុងការចុច

សម្រាប់មុខងារដំណើរការពេលចុចពីរដង ឬបីដង មានល្បឿនកំណត់ជាក់លាក់ ដែលល្បឿនជា Default ចន្លោះពីការចុចប្រហែលជាលឿនពេកសម្រាប់មនុស្សមួយចំនួន។ ប្រសិនបើអ្នកចង់ផ្លាស់ប្ដូរ អាចចូលទៅកាន់ Accessibility ដដែល រួចអូសចុះក្រោមជ្រើសរើសជម្រើស Home Button រួចកំណត់ល្បឿន យឺត ឬយឺតខ្លាំង នៅត្រង់ CLICK SPEED។ ដូច្នេះអ្នកអាចចំណាយពេលបន្តិចនៅចន្លោះប៊ូតុងចុច និងដំណើរការមុខងារ។

៣. បិទនូវ Siri ក្នុងការដំណើរការដោយចៃដន្យ

ពេលខ្លះអ្នកដាក់ទូរសព្ទក្នុងហោប៉ៅ ដែលអាចសង្កត់នូវប៊ូតុង Home ដោយចៃដន្យ ក្នុងរយៈពេលមួយ នឹងដំណើរការ Siri។ ដូច្នេះបើអ្នកចង់បិទការដំណើរការនេះ អ្នកមានពីរជម្រើស៖

បិទ Siri តែពេលអេក្រង់ Lock

អ្នកអាចចូលទៅកាន់ Siri & Search ក្នុងកម្មវិធី Settings រួចចុចបិទប៊ូតុង Toggle Siri នៅក្បែរនឹង Allow Access When Locked។

បិទដំណើរការ Siri តែម្តង

ប្រសិនបើអ្នកមិនចាប់អារម្មណ៍នឹង Siri ទេអ្នកអាចបិទបាន ប៉ុន្តែការបិទ Siri មិនអាចជួយដល់ការសង្កត់ប៊ូតុង Home ក្នុងហោប៉ៅនោះទេ ព្រោះបើបិទ Siri នោះ Voice control នឹងដំណើរការវិញ ហើយគ្មានវិធីបិទនូវ Voice control នោះទេ។ បើអ្នកចង់បិទ អ្នកអាចចូលទៅកាន់ Siri & Search ក្នុងកម្មវិធី Settings រួចចុចប៊ូតុង Toggle នៅក្បែរនឹង Press Home for Siri ដើម្បីបិទ បន្ទាប់មកចុច Turn off Siri។

៤. កំណត់សកម្មភាព ពេលចុចបីដង

លើប៊ូតុង Home អ្នកក៏អាចកំណត់នូវសកម្មភាពអ្វីមួយ ពេលចុចបីដងលើប៊ូតុង Home បាន។

របៀបបន្ថែមនូវ Accessibility Shortcuts

អ្នកអាចចូលទៅកាន់ General ក្នុងកម្មវិធី Settings > ចុចលើ Accessibility > ចុចលើ Accessibility Shortcut វានឹងបង្ហាញនូវជម្រើសមួយចំនួន ដែលអាចដំណើរការបានពេលចុចប៊ូតុងបីដង។

របៀបបើកដំណើរការនូវ Guided Access Shortcut

Guided Access អាចឲ្យអ្នកកំណត់នូវការប្រើប្រាស់លើកម្មវិធីណាមួយ ដោយអាចកំណត់នូវតំបន់ផ្សេងៗការពារមិនឲ្យចុច ឬប្ដូរទៅប្រើកម្មវិធីផ្សេងក្រៅពីកម្មវិធីដែលបានបង្ហាញ ដែលវានឹងដំណើរការពេលចុចបីដងលើប៊ូតុង Home។ អ្នកអាចចូលទៅកាន់ General ក្នុងកម្មវិធី Settings > ចុចលើ Accessibility > រួចអូសចុះក្រោម អ្នកនឹងឃើញ Guided Access ចុចលើវា ហើយចុចប៊ូតុង Toggle ក្នុងការបើក។ ចំពោះការប្រើប្រាស់វិញ អ្នកអាចបើកកម្មវិធីណាមួយ រួចចុចប៊ូតុង Home បីដង Guided Access នឹងដំណើរការ រួចអ្នកអាចគូសរង្វង់លើចំណុចណាមួយដែលអ្នកមិនចង់ឲ្យចុច រួចចុចលើ Start។ ក្រោយមកទៀត អ្នកត្រូវបញ្ចូល Passcode ថ្មីដើម្បីការពារ ពេលនរណាម្នាក់ចង់បិទដំណើរការ Guide Access ដោយចុចបីដង។ បើអ្នកចង់បិទដំណើរការ Guide Access ចុចបីដងលើប៊ូតុង Home រួចបញ្ចូល Passcode។

៥. ប្រើ Controls លើអេក្រង់តែម្ដង ជាមួយនឹង AssistiveTouch

ប្រសិនបើអ្នកមិនចង់ចុចច្រើនពេកលើប៊ូតុង Home ឬប៊ូតុង Home ខូច អ្នកអាចប្រើ AssistiveTouch បានជំនួសការប្រើប៊ូតុង Home ពេលដំណើរការប្រព័ន្ធ។ អ្នកអាចបើកដំណើរការដោយចូលទៅកាន់ General ក្នុងកម្មវិធី Settings > ចុចលើ Accessibility > ចុចលើ AssistiveTouch រួចចុចប៊ូតុង Toggle ដើម្បីបើកនៅក្បែរនឹង AssistiveTouch។

៦. ប្រើប៊ូតុង Home ដើម្បីបង្កើនល្បឿន ឬ Restart

អ្នកអាចសម្អាត RAM លើ iPhone ដោយចុចលើប៊ូតុង Sleep/wake នៅគែម រហូតដល់ឃើញមាន Slide to power off បន្ទាប់មកចុចលើប៊ូតុង Home ឲ្យជាប់។ មួយវិញទៀត ប្រសិនបើ iPhone អ្នកគាំងមិនដំណើរការ អ្នកអាចចុចលើប៊ូតុង Sleep/wake ជាមួយនឹង ប៊ូតុង Home ឲ្យជាប់រហូតដល់ឃើញសញ្ញាផ្លែប៉ោម ដើម្បីបង្ខំឲ្យបិទបើកម៉ាស៊ីនឡើងវិញ៕