ក្រុមហ៊ុនមួយនៅជប៉ុន បង្កើតច្បាប់គួរឲ្យភ្ញាក់ផ្អើល ចំពោះបុគ្គលិកដែលអត់ជក់បារី

2017-11-06 02:23:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនមួយនៅក្នុងប្រទេសជប៉ុន បានប្រើប្រាស់យុទ្ធសាស្ត្រប្រកបដោយភាពច្នៃប្រឌិតថ្មីមួយ ដើម្បីលើកទឹកចិត្តដល់បុគ្គលិករបស់ខ្លួនឲ្យឈប់ជក់បារី។

ក្រុមហ៊ុនខាងលើមានឈ្មោះថា Piala Inc. ស្ថិតនៅក្នុងទីក្រុងតូក្យូ បានផ្ដល់ឲ្យបុគ្គលិកដែលមិនជក់បារី នូវថ្ងៃឈប់សម្រាកចំនួន ៦ថ្ងៃបន្ថែមទៀតក្នុងមួយឆ្នាំ។ ច្បាប់ថ្មីរបស់ក្រុមហ៊ុននេះ ត្រូវបានដាក់បង្ហាញកាលពីខែកញ្ញា។

លោក Hirotaka Matsushima អ្នកនាំពាក្យរបស់ក្រុមហ៊ុន បានប្រាប់សារព័ត៌មាន The Telegraph ថា «បុគ្គលិកម្នាក់ក្នុងចំណោមបុគ្គលិកមិនជក់បារីរបស់យើង បានដាក់សារនៅក្នុងប្រអប់ផ្ដល់យោបល់របស់ក្រុមហ៊ុន កាលពីដើមឆ្នាំនេះ ដោយនិយាយថា ការឈប់សម្រាកជក់បារីបានបង្កឲ្យមានបញ្ហា»។

លោក Hirotaka បានបន្ថែមឲ្យដឹងទៀតថា «នាយកប្រតិបត្តិរបស់យើងបានឃើញការបញ្ចេញមតិ ហើយក៏បានយល់ព្រម ដូច្នេះយើងកំពុងផ្តល់ឲ្យអ្នកដែលមិនជក់បារី នូវថ្ងៃឈប់សម្រាកបន្ថែម ដើម្បីទូទាត់សងពួកគេវិញ»។

គួរឲ្យដឹងថា ការិយាល័យកណ្ដាលរបស់ក្រុមហ៊ុននេះ ស្ថិតនៅជាន់ទី២៩ ដូច្នេះបុគ្គលិកដែលចង់ជក់បារី ត្រូវទៅបន្ទប់ក្រោមដី ដោយចំណាយពេលប្រហែល ១៥នាទី សម្រាប់ការធ្វើដំណើរ និងសម្រាកជក់បារីម្ដងៗ។

បើយោងតាមក្រុមហ៊ុនខាងលើ បានឲ្យដឹងថា គម្រោងនេះបានជំរុញឲ្យបុគ្គលិកយ៉ាងហោចណាស់ ចំនួន៤នាក់ បោះបង់ចោលទម្លាប់ជក់បារី។ មិនតែប៉ុណ្ណោះ យ៉ាងហោចណាស់មានបុគ្គលិកចំនួន ៣០នាក់ ក្នុងចំណោមបុគ្គលិកក្រុមហ៊ុនចំនួន ១២០នាក់ បានទទួលថ្ងៃឈប់សម្រាកបន្ថែមពីច្បាប់ថ្មីនេះ។

គួរបញ្ជាក់ថា អង្គការសុខភាពពិភពលោក បានរាយការណ៍ថា ជនជាតិជប៉ុនវ័យជំទង់ ចំនួន ១៨,២ភាគរយ កំពុងតែមានទម្លាប់ជក់បារី៕