បុរសរុស្ស៊ី អះអាងធ្លាប់រស់នៅ ភពព្រះអង្គារ មុនពេលកើតនៅលើផែនដី

2017-11-07 00:57:04
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសជនជាតិរុស្ស៊ីម្នាក់ ដែលបានធ្វើឲ្យអ្នកវិទ្យាសាស្ត្រទ័លប្រាជ្ញា តាំងពីកើតមក បានអះអាងថា ខ្លួនធ្លាប់បានរស់នៅលើភពព្រះអង្គារ មុនពេលកើតម្ដងទៀត នៅលើផែនដីនេះ។

Boriska Kipriyanovich

បុរសវ័យ ២០ឆ្នាំ ខាងលើមានឈ្មោះថា Boriska Kipriyanovich បានធ្វើឲ្យអ្នកជំនាញភ្ញាក់ផ្អើល ចំពោះចំណេះដឹងរបស់គេ អំពីអវកាសខាងក្រៅអស់រយៈពេល ជិត២០ឆ្នាំមកហើយ។

ឪពុកម្ដាយរបស់ Boriska បានអះអាងថា គេអាចនិយាយបាន ប៉ុន្មានខែប៉ុណ្ណោះក្រោយពេលកើត ហើយជារឿយៗតែងពិភាក្សាអំពីប្រធានបទ ដែលពួកគេមិនដែលបង្រៀនដល់គេ ដូចជា អរិយធម៌របស់មនុស្សក្រៅភព (Alien) ជាដើម។ កាលពីក្មេង Boriska បានធ្វើឲ្យគ្រូពេទ្យភ្ញាក់ផ្អើល ដោយអាចអាន , សរសេរអក្សរ និង គូររូបបានទៀតផង នៅអាយុត្រឹមតែ២ឆ្នាំប៉ុណ្ណោះ។

យ៉ាងណាមិញ Boriska ដែលមកពីទីក្រុង Volgograd ប្រទេសរុស្ស៊ី បានអះអាងថា ខ្លួនធ្លាប់រស់នៅលើភពព្រះអង្គារ ដែលទទួលរងការបំផ្លិចបំផ្លាញ ដោយសារសង្គ្រាម និងមហន្តរាយនុយក្លេអ៊ែរ កាលពីអតីតកាល។ ជាមួយគ្នានេះដែរ គេនិយាយថា ប្រជាជនដើមកំណើតនៃភពព្រះអង្គារ (Martian) មានកម្ពស់ប្រហែល ៣,៧ម៉ែត្រ និងកំពុងរស់នៅក្រោមដី នៃភពព្រះអង្គារនោះ ហើយដកដង្ហើមដោយស្រូបយកកាបូនឌីអុកស៊ីត។

បើយោងតាម Boriska បានឲ្យដឹងថា ពួក Martian មានជីវិតអមត ហើយបញ្ឈប់ភាពចាស់ជរា នៅអាយុ៣៥ឆ្នាំ។ ពួកគេមានចំណេះដឹងផ្នែកបច្ចេកវិទ្យាខ្ពស់ និងមានសមត្ថភាពធ្វើដំណើរឆ្លងដែនរវាងផ្កាយ ឬប្រព័ន្ធភពទៀតផង។

តែមិនប៉ុណ្ណោះ Boriska បានពន្យល់ថា Martian មានទំនាក់ទំនងយ៉ាងជិតស្និទ្ធជាមួយជនជាតិអេហ្ស៊ីបបុរាណ នៅលើផែនដីនេះ។ Boriska បានបន្ថែមថា ជីវិតនៅលើផែនដីនឹងផ្លាស់ប្ដូរយ៉ាងខ្លាំង នៅពេលដែលរូបចម្លាក់ Great Sphinx នៅក្នុងទីក្រុង Giza ប្រទេសអេហ្ស៊ីប ត្រូវបានដោះសោ និងបើកគ្រឿងយន្ត ដែលលាក់នៅក្រោយត្រចៀកនៃរូបចម្លាក់នោះ៕