រឿងសំខាន់៣ ធ្វើឱ្យផលិតករសិល្បករ សប្បាយចិត្ត ចាប់ពីឆ្នាំ២០១៨ តទៅ

2017-11-07 03:51:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ចាប់ពីដើមឆ្នាំ ២០១៨ តទៅ រឿងធំៗសំខាន់៣យ៉ាង មិនធ្លាប់មានពីមុនមក នឹងធ្វើឱ្យក្រុមផលិតករ សិល្បករ សប្បាយរីករាយ ព្រោះកត្តាទាំងនេះ នឹងពួកគេមានទីផ្សារកាន់តែខ្ពស់។

តាមប្រសាសន៍ ឯកឧត្ដម ខៀវ កាញារីទ្ធ រដ្ឋមន្ត្រីក្រសួងព័ត៌មានកាលពីពេលថ្មីៗ បញ្ជាក់ថា ក្រសួងព័ត៌មាននៅតែតម្រូវឱ្យបណ្ដាស្ថានីយទូរទស្សន៍ ចាក់ផ្សាយកម្មវិធីផលិតក្នុងស្រុកដដែល ក្នុងចន្លោះម៉ោងមាស ពីម៉ោង ៧ ដល់ម៉ោង ៩យប់។ ប្រការនេះនៅតែធ្វើឱ្យក្រុមផលិតករសប្បាយរីករាយ ធ្វើឱ្យពួកគេមានលទ្ធភាពផលិតស្នាដៃថ្មីៗបន្ថែមទៀត។

ដោយឡែករឿងសំខាន់ទី២ គឺចាប់ពីឆ្នាំ ២០១៨ តទៅ ស្ប៉តផ្សព្វផ្សាយពាណិជ្ជកម្មលើបណ្ដាកញ្ចក់ទូរទស្សន៍ ដែលមានតារាបរទេសឈរជាតំណាង នឹងលែងមានតទៅទៀត ដោយតម្រូវឱ្យគ្រប់បណ្ដាស្ប៉តទាំងអស់ ត្រូវតែយកតារាខ្មែរ និងក្រុមផលិតរបស់ខ្មែរ ជំនួសវិញ។ ចំណុចនេះនឹងរឹតតែធ្វើឱ្យតារានានា និងបណ្ដាផលិតករ អាចពង្រីកទីផ្សាររបស់ពួកគេថែមមួយកម្រិតទៀត ហើយបញ្ហានេះទៀតសោត ក៏ធ្លាប់មានតំណាងផលិតករ និងសិល្បករ ធ្លាប់ទាមទារយូរមក។

ចំណែករឿងសំខាន់ទី៣ ដែលក្រុមផលិតករនានាទាមទារឱ្យក្រសួងពាក់ព័ន្ធនានា ផ្អាកការយកពន្ធពីផលិតកម្មរយៈពេល ១០ឆ្នាំ ដើម្បីឱ្យផលិតកររឹងដៃរឹងជើង ស្របពេលវិស័យភាពយន្ត កំពុងមានភាពផុសផុលឡើងវិញ អាចនឹងមានដំណឹងល្អ ខណៈក្រសួងវប្បធម៌ និងក្រសួងព័ត៌មាន កំពុងដាក់ស្នើបញ្ហានេះទៅកាន់រដ្ឋាភិបាល។ នេះបើតាមការបញ្ជាក់ឱ្យដឹងពីលោក ប៉ុក បូរក្ស ប្រធានស្ដីទីនាយកដ្ឋានសិល្បៈភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ។

ទន្ទឹមនឹងដំណឹងការព្យួរពន្ធរយៈពេល ១០ឆ្នាំ សម្រាប់ក្រុមផលិតករខ្មែរ អាចនឹងមានផ្លែផ្កានាពេលឆាប់ៗខាងមុខ លោក ប៉ុក បូរក្ស ក៏អះអាងចំណុចសំខាន់ជាច្រើនមួយចំនួន ដែលក្រសួងវប្បធម៌ បានអនុម័តរួចកាលពីពេលថ្មីៗ អាចធ្វើឱ្យផលិតករកាន់តែមានសប្បាយរីករាយ។ ចំណុចសំខាន់ៗទាំងនោះ មានដូចជា តំឡើងតម្លៃសំបុត្រកុន តាមរោងភាពយន្ត អាចជួយឱ្យចំណូលរបស់ផលិតករក្រោយចែកជាមួយរោងកុនរួច មានការកើនឡើង។ ការអនុគ្រោះការទិញសម្ភារៈថតកុនពីក្រៅប្រទេស ការសម្រួលទីតាំងថតនៅទូទាំងប្រទេស និងការត្រួតពិនិត្យភាពយន្ត បរទេសដែលនាំចូលស្រុកខ្មែរជាដើម ដើម្បីឱ្យផលិតករក្នុងស្រុក មានកម្លាំងចិត្តផលិតកុនថែមទៀត ដោយមិនឱ្យហូរចូលច្រើនដូចមុនទៀតទេ៕