ថ្ងៃនេះ វីរនារី កែ ឡេង ត្រូវការពារមេដាយមាសពិភពលោករបស់ខ្លួនជាលើកទី២

2017-11-07 23:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាការិនី កែ ឡេង ជាម្ចាស់មេដាយមាសពិភពលោកពីរសម័យកាលចាប់ផ្តើមប្រកួតការពារមេដាយមាសរបស់ខ្លួនជាលើកទីពីរថ្ងៃនេះហើយក្នុងការប្រកួតជើងឯកប៉េតង់ពិភពលោកប្រចាំឆ្នាំ២០១៧នៅទីក្រុង Kaihua ប្រទេសចិន។

កែ ឡេង ឈ្នះមេដាយមាសកាលពីឆ្នាំ២០១៥

ការប្រកួតជើងឯកប៉េតង់ពិភពលោកផ្នែកនារីប្រចាំឆ្នាំ២០១៧នៅប្រទេសចិននេះមានប្រទេសចំនួន៤៣ចូលរួមប្រកួត ដូច្នេះវីរនារីកម្ពុជា កែ ឡេង ត្រូវឆ្លងកាត់ឧបសគ្គច្រើន ប្រសិនបើការពារមេដាយមាសរបស់ខ្លួនបានសម្រេច។ វិញ្ញាសានារីវាយទោល Shooting នេះអ្នកស្រី កែ ឡេង ធ្លាប់ឈ្នះមេដាយមាស២ដងគឺលើកទី១ឈ្នះនៅប្រទេសបារាំងកាលពីឆ្នាំ២០១៣ និងលើកទី២ឈ្នះនៅប្រទេសថៃឆ្នាំ២០១៥ដែលជាឆ្នាំការពារមេដាយមាសរបស់ខ្លួនទី១បានសម្រេច។ សម្រាប់ឆ្នាំ២០១៧នេះ អ្នកស្រីត្រូវការពារជាលើកទី២។

វិញ្ញាសា Shooting នេះ កីឡាការិនីបារាំង Angelique Papon មានកំណត់ត្រាឈ្នះច្រើនជាងគេក្នុងប្រវត្តិសាស្ត្រគឺឈ្នះបាន៣ដងដែលលើកទី១ ឆ្នាំ២០០៥ លើកទី២ ឆ្នាំ២០០៧ និងលើកទី៣ឈ្នះឆ្នាំ២០០៩។

កម្ពុជាបានបញ្ជូនគណៈប្រតិភូចំនួន៦នាក់សម្រាប់ផ្នែកនារីនេះគឺលោក អ៊ីន គឹមស៊្រុនជាប្រធានដឹកនាំ លោក សុខ ម៉ុងជាគ្រូបង្វឹក និងកីឡាការិនី កែ ឡេង អ៊ុក ស្រីម៉ុំ ស្រេង សារ៉ាឃីម និងអ៊ុន ស្រីយ៉ា។