អតីតតារាចម្រៀង មួន ម៉ារ៉ា បង្កើតពានរង្វាន់ស្នូរឃ័រ មានប្រាក់រង្វាន់ដល់ទៅ ៤០លានរៀល
- 2017-11-13 01:50:39
- ចំនួនមតិ 0 | ចំនួនចែករំលែក 0
អតីតតារាចម្រៀង មួន ម៉ារ៉ា បង្កើតពានរង្វាន់ស្នូរឃ័រ មានប្រាក់រង្វាន់ដល់ទៅ ៤០លានរៀល
ចន្លោះមិនឃើញ
អតីតតារាចម្រៀងល្បីឈ្មោះនៅកម្ពុជា លោក មួន ម៉ារ៉ា បង្កើតការប្រកួតដណ្ដើមពានរង្វាន់ Champion Snooker League លើកទី១នៅប្រទេសកម្ពុជាដែលមានប្រាក់រង្វាន់សម្រាប់ម្ចាស់ជយលាភីដល់ទៅ ៤០លានរៀល។
លោក មួន ម៉ារ៉ា ដែលជាម្ចាស់ក្លឹប Champion Snooker បានឲ្យដឹងថា ការប្រកួតដណ្ដើមពានរង្វាន់ Champion Snooker League ចាប់ផ្ដើមឡើងពីថ្ងៃទី១០ ខែវិច្ឆិកា ឆ្នាំ ២០១៧ តទៅ ដែលមានកីឡាករចូលរួមប្រកួត២៤រូប ធ្វើការប្រកួតរយៈពេល៥ខែដើម្បីរកជើងឯក។ កីឡាករទាំង ២៤រូបនេះ នឹងត្រូវប្រកួតលក្ខណៈវិលជុំសន្សំពិន្ទុ ហើយអ្នកដែលមានពិន្ទុខ្ពស់ជាងគេនឹងក្លាយជាជើងឯកតែម្ដង។
ម្ចាស់បទអូនទៅភ្នំពេញរូបនេះបន្តថា គោលបំណងធំដែលលោករៀបចំឲ្យមានការប្រកួតនេះឡើងគឺ ដើម្បីឲ្យមានជាសកម្មភាពប្រកួតនានាមុនពេលឈានទៅបង្កើតជាសហព័ន្ធស្នូឃ័រនៅប្រទេសកម្ពុជា ហើយជាការជំរុញឲ្យវិស័យកីឡាមួយនេះចាប់ផ្ដើមដំណើរពីពេលនេះតទៅ។ ការប្រកួតនេះដែរក៏ជាការជ្រើសរើសយកកីឡាករដែលមានទេពកោសល្យ និងសមត្ថភាព ដើម្បីយកទៅបង្វឹកបន្ថែមឲ្យក្លាយជាកីឡាករជម្រើសជាតិនៅពេលខាងមុន ហើយត្រៀមចេញទៅប្រកួតក្នុងព្រឹត្តិការនានាលើឆាកអន្តរជាតិតំណាងឲ្យប្រទេសកម្ពុជា។
អតីតតារាងចម្រៀងខាងលើ ក៏សំណូមពរដល់អ្នកដែលចូលចិត្តលេងកីឡាស្នូឃ័រនេះ អាចមកចូលរួមប្រកួតប្រជែងលើកក្រោយៗទៀតបាន ដើម្បីបញ្ចេញសមត្ថភាព ហើយបើពួកគេខ្លាំងនោះនឹងក្លាយជាកីឡាករជម្រើសជាតិតំណាងឲ្យកម្ពុជាទៀតផង។ លោកក៏ចង់ឲ្យប្រជាជនកម្ពុជាជួយគាំទ្រកម្មវិធីប្រកួតពានរង្វាន់នេះ ដើម្បីឲ្យមានដំណើរការជាបន្តបន្ទាប់ទៀត ប្រសិនបើអ្នកណាចង់ទស្សនាផ្ទាល់ក៏អាចអញ្ជើញទៅក្លឹបChampion Snooker ឬតាមហ្វេសបុកផេក Champion Snooker។
ការប្រកួតពានរង្វាន់ Champion Snooker League ប្រកួតរៀងរាល់ចុងសប្ដាហ៍ថ្ងៃសៅរ៍ និង អាទិត្យ នៅឯក្លឹប Champion Snooker ផ្ទះលេខ ២២ សង្កាត់បឹងកក់២ ខណ្ឌទួលគោក រាជធានីភ្នំពេញ។ ជយលាភីលេខ១ ទឹកប្រាក់១៦លានរៀល លេខ២ ទឹកប្រាក់ ៨លានរៀន លេខ៣ ទឹកប្រាក់ ២លានរៀល និងលេខ៤ ទឹកប្រាក់១លានរៀល និងមានរង្វាន់លើកទឹកចិត្តជាច្រើនទៀតផង៕