Taylor Swift ធ្វើឲ្យពិធីករ និងអ្នកមើលយំពេញកម្មវិធី (វីដេអូ)

2017-11-15 08:29:59
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីយប់ថ្ងៃទី ១៣ ខែវិច្ឆិកា តារាចម្រៀង Taylor Swift មានវត្តមានក្នុងកម្មវិធី " The Tonight Show With Jimmy Fallon” ដើម្បីសម្ដែងបទចម្រៀងនៅក្នុងអាល់ប៊ុមថ្មី “Reputation” របស់នាង។

កម្មវិធីនេះទើបតែចូលខ្លួនមកបម្រើទស្សនិកជនវិញក្រោយពីម្ដាយរបស់ Jimmy អ្នកស្រី Gloria បានស្លាប់កាលពីសប្ដាហ៍មុននេះ។ ពេលចាប់ផ្ដើមកម្មវិធី លោកបាននិយាយពាក្យខ្លះទាក់ទងនឹងម្ដាយរបស់លោកដែរ។

គាប់ជួន រឿងរ៉ាវរបស់លោក Jimmy ក៏ស្រដៀងទៅនឹងបទចម្រៀង "New Year's Day" របស់តារាចម្រៀង Taylor Swift ដែរ។ ក្នុងបទចម្រៀងនោះមានឃ្លាចម្រៀងដែលនិយាយពីមនុស្សជាទីស្រលាញ់ ហើយក៏បានច្របាច់ដៃគ្នា៣ដង ពេញដោយអារម្មណ៍កក់ក្ដៅមិនចង់ឲ្យឃ្លាត ដូចទៅនឹងJimmy ដែលច្របាច់ដៃម្ដាយ ៣ដងមុនម្ដាយទទួលមរណភាព។

ក្រោយចប់កម្មវិធី លោក Mike DiCenzo អ្នកនិពន្ធនិងជាអ្នកផលិតកម្មវិធី The Tonight Show បានសរសេរនៅលើបណ្ដាញសង្គម Twitter ពាក់ព័ន្ធនឹងភាពចៃដន្យគ្នានេះដែរ។ លោកប្រាប់ថាតាមពិតទៅម្ចាស់បទ “Look what you made me do” រូបនេះមិនមានកាលវិភាគសម្ដែងនៅក្នុងកម្មវិធីនេះទេ ប៉ុន្តែដោយសារតែពួកគេចង់ធ្វើអ្វីឲ្យពិសេសសម្រាប់ការវិលត្រលប់របស់កម្មវិធី លោកក៏បានស្នើសុំនាងឲ្យមកសម្ដែង ហើយនាងក៏បានយល់ព្រមដោយគ្មានការស្ទាក់ស្ទើរអ្វីបន្តិចសោះ។

រឿងដែលគួរឲ្យភ្ញាក់ផ្អើលនោះគឺ លោក Jimmy មិនដែលប្រាប់នរណាម្នាក់ពីរឿងម្ដាយរបស់លោកពីមុនមកទេ ហើយក៏គ្មាននរណាម្នាក់ធ្លាប់បានស្ដាប់បទ "New Year's Day" ពីមុនមកដែរ ដូច្នេះហើយបានជានៅពេលដែល Taylor ច្រៀងបទនេះ ទស្សនិកជនដែលនៅក្នុងកម្មវិធីនោះផ្ទាល់ចាប់ផ្ដើមយំគ្រប់គ្នា។ ក្រោយពីបញ្ចប់ការសម្ដែងភ្លាម តារាចម្រៀង Taylor បានដើរទៅរកលោក Jimmy ហើយឱបលោកយ៉ាងណែន ដែលរឹតតែធ្វើឲ្យគ្រប់គ្នាកាន់តែរំជួលចិត្តថែមទៀត៕