ចង់បានលុយធានារ៉ាប់រង កុហកថាគ្រោះថ្នាក់ចរាចរ ចុងក្រោយជាប់ទោសធ្ងន់ក

2017-11-21 08:11:27
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសជនជាតិសិង្ហបុរីម្នាក់ឈ្មោះ A Karhik ត្រូវបានចាប់ខ្លួន និងកាត់ទោសឲ្យជាប់ពន្ធធនាគាររយៈពេល ៤ខែពីបទក្លែងបន្លំថា បានរងរបួសដោយសារគ្រោះថ្នាក់ចរាចរ ដើម្បីទទួលបានប្រាក់ធានារ៉ាប់រងពីក្រុមហ៊ុនធានារ៉ាប់រង China Taiping Insurance ចំនួនជាង ៥ ០០០ដុល្លារ។

លោក A Karhik (អាវខៀវ)

កាលពីមានអាយុ១៧ឆ្នាំ លោក Karthik និង មិត្តរួមសាលាម្នាក់ឈ្មោះ Krishna Kumar Rajagopal បានទៅជួបបុរសពីរនាក់ទៀត ឈ្មោះ Suresh និង Noel Antney Kypas ដើម្បីរៀបចំគម្រោងបោកប្រាស់លុយពីក្រុមហ៊ុនធានារ៉ាប់រង នៅថ្ងៃទី៤ ខែមិថុនា ឆ្នាំ២០១២។

លោក Suresh បានប្រាប់ Karthik និង Krishna ឲ្យស្នើសុំលិខិតបញ្ជាក់ពីគ្រូពេទ្យអំពីការរងរបួសក និងខ្នង ដោយសារគ្រោះថ្នាក់ចរាចរមួយ ដែលពួកគេជាអ្នកដំណើរអង្គុយនៅខាងក្រោយ និងបើកបរដោយលោក Noel។ បន្ទាប់មកគ្រូពេទ្យបានចេញលិខិតបញ្ជាក់រយៈពេល ៣ថ្ងៃ ដែលពួកគេយកទៅដាក់ពាក្យស្នើសុំលុយធានារ៉ាប់រងពីក្រុមហ៊ុន China Taiping Insurance និង Tokio Marine Insurance Singapore ។

ប៉ុន្តែនៅថ្ងៃទី៤ ខែកុម្ភៈ ឆ្នាំ២០១៣ ក្រុមហ៊ុន TMI បានដាក់ពាក្យស្នើសុំរបាយការណ៍របស់ប៉ូលិសអំពីគ្រោះថ្នាក់ចរាចរ ដែលបានកើតឡើងនៅផ្លូវ Portsdown កាលពីថ្ងៃទី៤ ខែមិថុនា ឆ្នាំ២០១២ ដោយសារតែក្រុមហ៊ុនគិតថា ពួកគេបានក្លែងបន្លំពាក្យស្នើសុំការធានារ៉ាប់រង។

ក្រុមហ៊ុនធានារ៉ាប់រង CTI និង TMI បានទទួលការស្នើសុំធានារ៉ាប់រងជាច្រើន ចំពោះការខូចខាតទ្រព្យសម្បត្តិនិងការរងរបួស ពីមនុស្សផ្សេងគ្នា ដែលបានអះអាងថា ពួកគេជាអ្នកដំណើរ និងអ្នកបើកបរក្នុងគ្រោះថ្នាក់ចរាចរនោះ។

ក្រោយមក ការស៊ើបអង្កេតបានបង្ហាញថា គ្រោះថ្នាក់ចរាចរនេះ ត្រូវបានរៀបចំឡើងដោយរថយន្ត ៣គ្រឿង ហើយបុរសម្នាក់ដែលជាប់ពាក់ព័ន្ធឈ្មោះ Rahamat Mohd ត្រូវបានកាត់ទោសឲ្យជាប់ពន្ធធនាគាររយៈពេល ៧៤ខែ ពីបទប៉ុនប៉ងបោកប្រាស់ក្រុមហ៊ុនធានារ៉ាប់រងជាង ១លានដុល្លារ។

ព្រះរាជអាជ្ញារង លោក Ian Enst Chai បានបង្ហាញសារគំរាមខ្លាំងៗទៅដល់សាធារណជនថាការបោកប្រាស់ការធានារ៉ាប់រង គឺជាករណីដែលមិនអាចលើកលែងទោសឲ្យបាន ដើម្បីទប់ស្កាត់ការកើនឡើងនៃឧក្រិដ្ឋកម្មបែបនេះ ដែលធ្វើឲ្យប៉ះពាល់យ៉ាងខ្លាំងដល់សាធារណជន។

ប៉ុន្តែអ្នកស្រី Sadhana Rai មេធាវីការពារក្ដីរបស់លោក Kathik បានអះអាងថា ជនជាប់ចោទគ្រាន់តែជាក្មេងជំទង់ប៉ុណ្ណោះ នៅពេលដែលរូបគេប្រព្រឹត្តបទល្មើស និងមិនទទួលបានផលចំណេញអ្វីពីការរៀបគម្រោងនេះឡើយ។ មិនតែប៉ុណ្ណោះ អ្នកស្រីក៏បានស្នើសុំឲ្យមានការសម្រាលទោសចំពោះលោក Kathik ផងដែរ។

យោងតាមនាយកដ្ឋានពាណិជ្ជកម្ម បានឱ្យដឹងថាចំនួនគ្រោះថ្នាក់ចរាចរណ៍ដែលបានរាយការណ៍ថាជាការក្លែងបន្លំបានកើនឡើងទ្វេដងពី ១៣ករណី នៅឆ្នាំ ២០១៦ រហូតដល់ ២៦ករណី នៅខែកញ្ញាឆ្នាំនេះ។ ចំណែកឯតួលេខនៃការកាត់ទោសក៏បានកើនឡើងផងដែរ សរុបចំនួនមនុស្ស ៦៦ នាក់ត្រូវបានចោទប្រកាន់ពីបទក្លែងបន្លំការធានារ៉ាប់រង កាលពីឆ្នាំមុន ដែលកើនឡើងជិត ៤០ ភាគរយពីចំនួន ៤៨ ករណីគិតត្រឹមឆ្នាំ ២០១៤៕

ចុចអាន៖

ប្រភព៖ Channelnewsasia ប្រែសម្រួល៖ សេង ឡុង