អាថ៌កំបាំងពីក្រោយរឿងរបស់ Disney ទាំង៦ ដឹងហើយរន្ធត់ចិត្តក្រៃលែង

2017-11-21 23:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តភាគច្រើនធ្លាប់បានទស្សនាខ្សែភាពយន្តរបស់ Walt Disney ហើយ មិនថាជាបែបលក្ខណៈគំនូរជីវចល ឬមនុស្សសម្ដែងពិតនោះទេ។ ភាគច្រើននៃសាច់រឿងចុងបញ្ចប់ តួអង្គសំខាន់ៗតែងតែទទួលបានភាពសប្បាយរីករាយ និងសុភមង្គល។ ទោះជាយ៉ាងណាក៏ដោយ អ្វីៗមិនដូចអ្វីដែលប្រិយមិត្តគ្រប់គ្នាបានឃើញឡើយ ការពិតនៃរឿងនីមួយៗ ពិតជាធ្វើឲ្យប្រិយមិត្តគ្រប់គ្នាគិតថាអ្វីដែលបានមើលកន្លងមកគឺជាការកុហក។

១. រឿង “Cinderella”

ក្នុងរឿងរបស់ Disney៖ តួ Cinderella ត្រូវម្ដាយចុងរបស់ធ្វើបាប មិនឲ្យចូលរួមពិធីជប់លៀងរបស់ព្រះរាជបុត្រ ចុងក្រោយបានជួបរាជបុត្រហើយក៏ត្រូវត្រឡប់មកផ្ទះវិញមុនពេលពាក់កណ្ដាលអាធ្រាត្រ ហើយក៏បានជ្រុះស្បែកជើងមួយចំហៀង។ រាជបុត្រក៏បានឲ្យមនុស្សស្រីទូទាំងនគរសាកស្បែកជើងនោះ។ ចុងបញ្ចប់បានរកឃើញព្រះនាង ព្រមទាំងរស់នៅជាមួយគ្នាយ៉ាងមានសុភមង្គល។

ក្នុងរឿងពិត៖ រឿងពិតរបស់អ្នកនិពន្ធ Charles Perrault នៅពេលដែលរាជបុត្រចេញបញ្ជាឲ្យមនុស្សស្រីក្រមុំទាំងអស់សាកស្បែកជើងនោះ ម្ដាយចុងរបស់ Cinderella បានបញ្ជាឲ្យកូនស្រីរបស់ខ្លួនកាត់ម្រាមជើងរបស់ពួកគេដើម្បីឲ្យពាក់ស្បែកជើងនោះចូល តែនៅតែមិនត្រូវ ។ នៅថ្ងៃរៀបការរបស់ Cinderella និងព្រះរាជបុត្រ ក៏មានសត្វព្រាបមកចឹកភ្នែករបស់បងប្អូនស្រីចុងរបស់ Cinderella ថែមទៀតផង។ ចំណែក Cinderella និងព្រះរាជបុត្រ ក៏រស់នៅជាមួយគ្នាយ៉ាងសុខសាន្ត។

២. រឿង “Sleeping Beauty”

ក្នុងរឿងរបស់ Disney៖ ព្រះនាងនៅក្នុងរឿងនេះ បានមុតម្រាមដៃ ដោយសារម្ជុលកីតម្បាញហើយក៏បានដេកជារៀងរហូត។ ក្រោយមកមានរាជបុត្របានមកសង្គ្រោះនាងដោយការថើប ហើយពួកគេរស់នៅជាមួយគ្នាយ៉ាងមានសេចក្ដីសុខ។

ក្នុងរឿងពិត៖ ក្នុងរឿងពិតរបស់អ្នកនិពន្ធ Giambattista Basile ព្រះនាងមិនបានដឹងខ្លួនដោយសារតែការថើបនោះទេ តែដោយសារការសម្រាលកូនភ្លោះរបស់នាងទៅវិញ។ រាជបុត្របានរួមដំណេកជាមួយនាងហើយចាកចេញចោលនាង ព្រោះតែរាជបុត្រនោះមានមហេសីរួចទៅហើយ។

៣. រឿង “Beauty and the Beast”

ក្នុងរឿងរបស់ Disney៖ Belle ត្រូវបានចាប់ខ្លួនដោយបិសាចតោ ដែលរស់នៅក្នុងវិមានដ៏ប្រណិតមួយ។ ក្រោយមក Belle បានដឹងថាបិសាចតោនោះបានជាប់បណ្ដាសារ នាងក៏បានថើបលោកហើយក្លាយខ្លួនជារាជបុត្រដ៏ស្រស់សង្ហា។

ក្នុងរឿងពិត៖ រឿងពិតរបស់អ្នកនិពន្ធ Gabrielle-Suzanne Barbot de Villeneuve នាង Belle បានលួងលោមបិសាចតោឲ្យនាងបានទៅលេងបងប្អូនស្រីរបស់នាងបានមួយសប្ដាហ៍។ ដោយសារតែឃើញនាងមានមាសពេជ្រ ពាក់ពាសពេញខ្លួន បងប្អូនស្រីរបស់នាងបានលួងលោមនាង នៅឲ្យបានយូរជាងនេះ ក្នុងគោលបំណងពន្យារពេល ដើម្បីឲ្យបិសាចនោះខឹងហើយសម្លាប់នាងចោល។

៤. រឿង “Snow White”

ក្នុងរឿងរបស់ Disney៖ ព្រះនាង ព្រិលសត្រូវបានមេធ្មប់បំពុល ដោយសារប៉ោមមួយផ្លែ។ ប៉ុន្តែក្រោយមករាជបុត្រដ៏ស្រស់សង្ហា ក៏បានមកសង្គ្រោះព្រះនាងឲ្យរស់រានមានជីវិតឡើងវិញ។ ក្នុងរឿងនេះ មេធ្មប់បានស្លាប់ ព្រោះធ្លាក់ពីលើភ្នំ។

ក្នុងរឿងពិត៖ ក្នុងរឿងពិតរបស់អ្នកនិពន្ធBrothers Grimm មេធ្មប់មិនបានស្លាប់ដោយសារតែធ្លាក់ពីលើភ្នំនោះទេ។ ផ្ទុយទៅវិញ នាងត្រូវទទួលទន្តកម្ម ដោយឲ្យពាក់ស្បែកជើងដែក ហើយរាំនៅលើភ្លើងរហូតដល់ស្លាប់។

៥. រឿង “The Little Mermaid”

ក្នុងរឿងរបស់ Disney៖ ព្រះនាង Ariel ដែលជាបុត្រីរបស់ស្ដេចទេពមច្ឆានោះបានផ្លាស់ប្ដូរសំឡេងរបស់នាង ដើម្បីបានជើងដូចជាមនុស្ស។ នាងបានស្រលាញ់គ្នាជាមួយរាជបុត្រ Eric ហើយក៏រស់នៅជាមួយគ្នាយ៉ាងមានសុភមង្គល។

ក្នុងរឿងពិត៖ ចំណែករឿងពិតរបស់អ្នកនិពន្ធHans Christian Andersen វិញ គឺនៅពេលដែល Ariel មានជើងដូចជាមនុស្សនោះ ជើងរបស់នាងឈឺរហូត។ ពេលដើរម្ដងៗ នាងមានអារម្មណ៍ថា ដូចដើរលើកាំបិតអ៊ីចឹង។ ដោយសារតែការលំបាកបែបនេះ នៅចុងបញ្ចប់ ព្រះរាជបុត្របានរៀបការជាមួយនារីម្នាក់ផ្សេងទៀត ហើយ Ariel បានទម្លាក់ខ្លួនរបស់នាងចូលទៅក្នុងសមុទ្រដោយសារការខូចចិត្តហើយខ្លួនរបស់នាងបានរលាយទៅជាពពុះសមុទ្រ។

៦. រឿង "Mowgli”

ក្នុងរឿងរបស់ Disney៖ Mowgli គឺជាក្មេងប្រុសម្នាក់ដែល ឪពុកម្ដាយបោះបង់ចោលក្នុងព្រៃ។ ក្រោយមក ក៏មានខ្លាឃ្មុំ និង ខ្លារខិនមួយក្បាល រើសមកចិញ្ចឹម ដោយបានបង្រៀនឲ្យចេះច្រៀង ចម្រៀង និងចេះចិញ្ចឹមខ្លួនឯង។

ក្នុងរឿងពិត៖ នៅក្នុងសៀវភៅរបស់អ្នកនិពន្ធ Rudyard Kipling វិញ ក្រោយពីបានសម្លាប់សត្វខ្លាកំណាច Shere Khan មក Mowgli ក៏បានដឹងថាឪពុកម្តាយបង្កើតរបស់ខ្លួនត្រូវ កសិករក្នុងភូមិមូយចាប់ខ្លួន។ ដោយមានជំនួយពីសត្វចចក និងដំរី ពេលនោះ Mowgli ក៏បានបំផ្លាញភូមិនោះនិងសម្លាប់ប្រជាជនទាំងអស់ក្នុងភូមិយ៉ាងរង្គាល។ ក្រោយមក លោកត្រូវរត់គេចខ្លួន រហូត រកឃើញសេចក្ដីសុខនៅភូមិមួយ ដែលមានការត្រួតត្រាដោយជនជាតិអង់គ្លេស៕

ចុចអាន៖

ប្រភព៖ buzzfeed ប្រែសម្រួល៖ អន សុភក្ត្រា