មូលហេតុ ឃឹម ឌីម៉ា ឈ្នះ តែមិនសប្បាយចិត្តសោះ នៅ Khmer Thai Fight

2017-11-25 13:28:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ឃឹម ឌីម៉ា បានឈ្នះពិន្ទុកីឡាកររុស្ស៊ី Mordinov ដោយពិន្ទុក្នុងព្រឹត្តិការណ៍អន្តរជាតិ Khmer Thai Fight នៅវិមានពហុកីឡដ្ឋានជាតិ។

ក្រោយពីការប្រកួតចប់ទៅនោះ កូននាគខ្មៅ ឌីម៉ា បានបញ្ជាក់ថាខ្លួនមិនពេញចិត្តចំពោះលទ្ធផលនេះទេ បើទោះជាបានយកឈ្នះហើយក្ដី។ មូលហេតុដោយសារតែរូបគេវាយមិនចេញសោះ ដូចជាអាក់ៗ ធ្វើឱ្យសមត្ថភាពខ្លួនប្រើមិនអស់ និងមិនអាចវាយដៃគូឱ្យសន្លប់បាន។ មួយវិញទៀត កត្តាសំខាន់នោះ គឺរូបគេទើបតែជាសះស្បើយពីរបួសដៃ ដូច្នេះហើយទើបបានជាមិនអាចប្រើប្រាស់វាឱ្យបានលឿន និងល្អ តាមចិត្តចង់បាន។

ម្ចាស់មេដាយមាសស៊ីហ្គេមរបស់កម្ពុជា បានយកឈ្នះកីឡាកររុស្ស៊ីដោយពិន្ទុ ដោយការប្រកួត៣ទឹកមកនោះ រូបគេបានព្យាយាមវាយកែងជាច្រើន ប៉ុន្តែហាក់ដូចជាមិនទទួលបានផលដូចអ្វីដែលខ្លួនធ្លាប់ធ្វើពីមុនទេ។

យ៉ាងណាមិញ ជ័យជម្នះនេះដែរ គឺជាជ័យជម្នះសំខាន់មួយសម្រាប់កម្ពុជា ព្រោះបានធ្វើឱ្យបរទេសស្គាល់ក្បាច់គុនបុរាណខ្មែរកាន់តែច្រើនឡើង។ មួយវិញទៀត វាជាព្រឹត្តិការណ៍ដំបូងនៅកម្ពុជា ដូច្នេះជ័យជម្នះគឺជារឿងសំខាន់បំផុតសម្រាប់អ្នកគាំទ្រ៕

អត្ថបទ៖ មុន្នីរម្យ